قازاق كۇرەسىنىڭ دامۋ تاريحى تەرەڭدە جاتىر. توي-دومالاق, جيىن-مەركە, ءتۇرلى باسقوسۋلار پالۋانداردىڭ بەلدەسۋىنسىز وتكەن ەمەس. قازىرگى تاڭدا ەلىمىزدە جەكپە-جەك ونەرىن الەمدىك باسەكەگە لايىقتى سپورت دەڭگەيىنە شىعارۋ ماڭىزدى مىندەتتەردىڭ بىرىنە اينالىپ وتىر.
وسىعان وراي, 2017 جىلى استانا وتكەن جالپى قۇرىلتايدىڭ كەزەكتى وتىرىسىندا حالىقارالىق Qazaq kuresi فەدەراتسياسىن قۇرۋ تۋرالى شەشىم قابىلدانعان بولاتىن.
بۇگىندە فەدەراتسيانى مەملەكەت قايراتكەرى, قازاقستان رەسپۋبليكاسىنىڭ ەنەرگەتيكا ءمينيسترى قانات بوزىمباەۆ باسقارادى. قازاق سپورتىنىڭ اڭىزى, وليپيادا چەمپيونى جاقسىلىق ۇشكەمپىروۆ, وليمپيادا ويىندارىنىڭ قولا جانە كۇمىس جۇلدەگەرى, تانىمال پالۋان داۋلەت تۇرلىحانوۆ سىندى ازاماتتار فەدەراتسيانىڭ ۆيتسە-پرەزيدەنتتەرى رەتىندە تاعايىندىلدى.
حالىقارالىق قازاق كۇرەسى فەدەراتسياسى – تەك «حالىقارالىق» مارتەبەسىمەن شەكتەلمەيدى. الەمدىك دەڭگەيدەگى قازاق كۇرەسى تۋرنيرلەرىنىڭ بەلسەندى ۇيىمداستىرۋشىسى رەتىندەگى ەلىمىزدەگى بىرەگەي قوعامدىق ۇيىم.
سونىمەن قاتار, حالىقارالىق قازاق كۇرەسى فەدەراتسياسى – ۇلتتىق سپورت ءتۇرىن الەمدىك دەڭگەيدە دامىتىپ, حالىقارالىق سەرىكتەستەر مەن سپورتشىلاردىڭ باسىن بىرىكتىرىپ جۇرگەن بىرلەستىك.
حالىقارالىق فەدەراتسيانىڭ قۇرىلعانىنا از بولسا دا, وسى ۋاقىت ارالىعىندا اۋقىمدى شارالار مەن ناتيجەلى جۇمىستار اتقارىلدى. فەدەراتسيا قۇرامىنا ەۋروپا مەن ازيا ەلدەرىنىڭ 28 ۇلتتىق فەدەراتسياسى كىرەدى. ەسەسىنە الەمدە ۇلتتىق سپورتىمىزعا قىزىعۋشىلىق تانىتقاندار سانى كۇن ساناپ ارتۋدا.
فەدەراتسيا جىل سايىن حالىقارالىق تۋرنيرلەر مەن ءىس-شارالار وتكىزۋدى داستۇرگە اينالدىرعان. فەدەراتسيا قۇرىلعان 2 جىل ىشىندە: قازاق كۇرەسىنەن الەم چەمپيوناتى-2017 (استانا, قازاقستان), 2018 جىلى جاتتىقتىرۋشىلار مەن تورەشىلەرگە ارنالعان حالىقارالىق سەمينار (تبيليسي, گرۋزيا), 2018 جىلى قازاق كۇرەسىنەن I ەۋروپا چەمپيوناتى (باتۋمي, گرۋزيا), 2018 جىلى وقۋ-جاتتىعۋ جيىنى (الماتى, قازاقستان), 2018 جىلى I ازيا چەمپيوناتى (استانا, قازاقستان), فەدەراتسيا قولداۋىمەن «الەم بارىسى» ءتۋرنيرى وتكىزىلدى. سونداي-اق, 2018 جىلى - 3 ۇلتتىق چەمپيونات وتكىزىلسە, بيىل ۇلتتىق چەمپيوناتتار سانى 10-عا جەتتى.
2019 جىلدىڭ ماۋسىم ايىندا فەدەراتسيا پولشاداعى ۆروتسلاۆ قالاسىندا II ەۋروپا چەمپيوناتىن وتكىزەدى. بۇل چەمپيوناتقا ەۋروپانىڭ 23 ەلىنەن 100 پالۋان جينالادى دەپ كۇتىلۋدە. حالىقارالىق Qazaq kuresi فەدەراتسياسى شەتەلدىك باپكەرلەرگە ارنالعان وقۋ-جاتتىعۋ سەمينارلارى مەن پالۋانداردىڭ شىعىندارىن ءوز موينىنا الادى.
البەتتە, قارقىندى قولداۋدىڭ ارقاسىندا ۇلتتىق سپورتىمىز بۇگىندە الەمگە كەڭ ناسيحاتتالىپ, ۇلكەن تانىمالدىلىققا يە. قازاق كۇرەسىمەن گرۋزيا, قىتاي, ەۋرووداق ەلدەرى, يران جانە ت.ب. ەلدەرى اينالىسا باستادى.
حالىقارالىق قازاق كۇرەسى فەدەراتسياسى جىل سوڭىنا دەيىن ەۋروپا چەمپيوناتىن, الەم چەمپيوناتىن, الەم كۋبوگىن جانە ت.ب. كوپتەگەن شارالار وتكىزۋدى جوسپارلاپ وتىر.