زاڭ جوباسى تۋرالى باياندامانى ادىلەت ءمينيسترى مارات بەكەتاەۆ جاسادى. ول زاڭ جوباسىنىڭ اكىمشىلىك قۇقىق بۇزۋشىلىق تۋرالى كودەكستى ودان ءارى جەتىلدىرۋ, ىزگىلەندىرۋ جانە كەيبىر باپتاردىڭ اسىرەقاتاڭدىعىن تومەندەتۋ بويىنشا وزگەرىستەر مەن تولىقتىرۋلار ەنگىزۋدى كوزدەيتىنىن ايتتى. سونىڭ ىشىندە زاڭ جوباسى مىنا باعىتتاردى قاراستىرعان, دەي كەلىپ مينيستر ونىڭ ارقايسىسىن اتاپ بەردى. بىرىنشىدەن, اكىمشىلىك قۇقىق بۇزۋشىلىقتاردىڭ كەيبىر قۇرامدارى الىنىپ تاستالادى. رەتتەۋشى ورگانداردىڭ ۇستانىمىنا سايكەس ونى ازاماتتىق نەمەسە تارتىپتىك نورمالارمەن قاراستىرۋعا بولادى. سونىمەن بىرگە مەملەكەتتىك ورگانداردىڭ كەيبىر باقىلاۋ, قاداعالاۋ فۋنكتسيالارىن وڭتايلاندىرۋ جانە اۆتوماتتاندىرۋ سياقتى شارالار ەنگىزىلگەن. وسى ماقساتپەن 32 قۇرامدى الىپ تاستاۋ ۇسىنىلعان. ەكىنشىدەن, زاڭ جوباسىندا اكىمشىلىك قۇقىق بۇزۋشىلىقتاردىڭ جەكەلەگەن سانكتسيالارىن جەڭىلدەتۋ جانە تومەندەتۋ قاراستىرىلعان. بۇلار ىزگىلەندىرۋ ماقساتىمەن جاسالعان. ول ءۇشىن زاڭ جوباسىندا 40-تان استام قۇرام بويىنشا ايىپپۇل مولشەرىن ازايتۋ, 10 قۇرام بويىنشا اسىرەقاتاڭدىقتى تومەندەتۋ, 6 قۇرام بويىنشا ەسكەرتۋ ەنگىزۋ ۇسىنىلعان. جالپى, كودەكس قابىلدانعاننان بەرى ونىڭ اسىرەقاتاڭدىعىن تومەندەتۋ قاجەتتىلىگى بويىنشا العاشقى ۇسىنىستاردى دەپۋتاتتىق كورپۋس جاساعان. ولار مەملەكەتتىك ورگاندارعا دەپۋتاتتىق ساۋال تۇرىندە تۇسكەنى اتاپ ءوتىلدى. مينيستر زاڭ جوباسى بەرىلگەن رۇقساتتان ايىرۋ نەمەسە ونىڭ قولدانىلۋىن توقتاتۋ نەمەسە تىيىم سالۋدى كوزدەيتىن جەكەلەگەن اكىمشىلىك قۇقىق بۇزۋشىلىق ىستەردى قاراۋدى ۋاكىلەتتى ورگانداردىڭ قۇزىرەتىنە بەرۋدى قامتىعانىن جەتكىزدى. كونستيتۋتسيالىق رەفورمانىڭ اياسىندا اتقارۋشى مەملەكەتتىك ورگانداردىڭ جانە ولاردىڭ باسشىلارىنىڭ جاۋاپكەرشىلىگى ارتۋىنا بايلانىستى وسى باعىتتا جۇرگىزىلىپ جاتقان مەملەكەتتىك ساياسات اكىمشىلىك قۇقىق بۇزۋشىلىق تۋرالى زاڭنامادا دا ۇقساس رەفورمالاردى تالاپ ەتكەن, دەدى مينيستر ءوزىنىڭ بايانداماسىندا.
بايانداما اياقتالعان سوڭ سۇراق بەرۋ ءراسىمى باستالدى. سونىڭ ىشىندە دەپۋتات زاۋرەش امانجولوۆا جۋىردا عانا دوپينگ قولدانۋ سياقتى قيتۇرقى تاسىلمەن جەڭىستەرگە جەتىپ جاتقاندارعا, سپورتتىق جارىستى ۇيىمداستىرۋشىلار مەن سپورتشىلاردى ساتىپ الاتىندارعا قارسى جاۋاپكەرشىلىكتى كۇشەيتۋ تۋرالى زاڭ جوباسى قارالعانىن ەسكە سالىپ, ال بۇگىنگى زاڭ جوباسى سوندا بەلگىلەنگەن ايىپپۇلدىڭ كولەمىن 200 اەك-تەن 100 اەك-كە ازايتۋدى ۇسىنىپ وتىرعانى قالاي دەگەن سۇراق قويدى. سونىمەن بىرگە ول اكىمشىلىك تۇتقىنداۋدىڭ دا نەگە الىپ تاستالعانىن تۇسىنبەگەنىن جەتكىزدى. وعان مينيستر م.بەكەتاەۆ جاۋاپ بەرىپ, بۇل تۇزەتۋدىڭ اسىعىستىقتان ەنگىزىلىپ كەتكەنىن, «سوندىقتان ونى بۇرىنعى كۇيىندە قالدىرۋمەن كەلىسەمىز», دەدى. وسى جەردە تالقىلاۋعا سپيكەر ارالاسىپ, وزگەرىستى ەنگىزگەن ناقتى كىم ەكەنىن انىقتادى. وعان وزگەرىس مادەنيەت جانە سپورت مينيسترلىگىنەن كەلگەندىگى ايتىلدى. ن.نىعماتۋلين ءوزىنىڭ سۇراعىن اياعىنا دەيىن جەتكىزىپ, وتىرىسقا قاتىسىپ وتىرعان مادەنيەت جانە سپورت ءمينيسترىنىڭ ورىنباسارى ەرلان قوجاعاپانوۆتان وزگەرىستى نەگە ەنگىزگەندەرىن سۇرادى. ە.قوجاعاپانوۆ بۇل جەردە وزدەرىنىڭ كىناسى بار ەكەنىن مويىنداپ, ۇسىنعان ادامنىڭ جازالاناتىنىن جەتكىزدى. ال ءوزى وسى باپتى ودان ءارى قاتاڭداتىپ, قىلمىستىق جاۋاپكەرشىلىككە دەيىن جەتكىزۋ قاجەت ەكەنىن دە قولدايتىنىن ايتىپ قالدى. بىراق ونىڭ تەز وزگەرگىشتىگىن سپيكەر قاتاڭ سىنعا الدى. «كۇنى كەشە عانا جۇمىس توبىنا ءسىزدىڭ اتىڭىزدان حات كەلىپ, جاۋاپكەرشىلىكتى قاتايتۋ كەرەكتىگىمەن كەلىستىڭىزدەر. بىراق ءىس جۇزىندە سىزدەر وسىنداي قيتۇرقى تاسىلدەرمەن كۇرەس جۇرگىزىپ جاتقان جوقسىزدار. تەك اۋىزبەن عانا ايتاسىزدار. جۇمىس توبىنا كەشە عانا حات جازعانىڭىز سونىڭ ايعاعى. وعان دەيىن ىزگىلەندىرۋدى سىلتاۋراتىپ, جاۋاپكەرشىلىكتى ازايتۋدى ۇسىندىڭىزدار» دەپ ناقتى ەسكەرتۋلەر جاسادى. ە.قوجاعاپانوۆ بۇل پىكىرلەرمەن تولىق كەلىسەتىنىن ايتتى.
زاڭ جوباسىن تالقىلاۋ بارىسىندا دەپۋتاتتار قۇقىق بۇزۋشىلىق ارەكەتتەر ءۇشىن جاۋاپكەرشىلىكتى كۇشەيتۋ, سونىمەن قاتار ىزگىلەندىرۋدىڭ ناقتى ولشەمدەرىن بەلگىلەۋگە قاتىستى بىرقاتار ماسەلەلەر كوتەردى. سونىڭ ىشىندە, بيۋدجەتتى ءتيىمسىز يگەرۋگە, جول-كولىك وقيعاسى بولعان جەردى تاستاپ كەتۋگە بايلانىستى جازانى انىقتاۋعا قاتىستى ناقتى تالاپتار قاجەتتىلىگى ايتىلدى. وسى رەتتە, ن.نىعماتۋلين: «جۇمىس توبى زاڭ جوباسىن ازىرلەۋشىلەرمەن, سونداي-اق قۇزىرلى مەملەكەتتىك ورگاندارمەن بىرلەسىپ, ەكىنشى وقىلىمعا دەيىن بيۋدجەتتىك قارجىلاردىڭ ءتيىمسىز پايدالانىلعانىن انىقتاۋ ءۇشىن بارلىق شارالاردى ازىرلەۋى قاجەت. ولار وسى كودەكس اياسىندا مەملەكەتتىك بيۋدجەت قارجىلارىن يگەرۋ بارىسىندا مەملەكەتتىك ورگاندار اكىمشىلىك باعدارلامالارىنىڭ ءبىرىنشى باسشىلارى ءۇشىن جەكە جاۋاپكەرشىلىكتى انىقتاۋعا مۇمكىندىك بەرەدى», دەدى. سونداي-اق دەپۋتاتتار, ساپاسى تومەن تۋريستىك قىزمەت كورسەتكەنى ءۇشىن تۋروپەراتوردى ليتسەنزياسىنان ايىرۋ نەمەسە قىزمەتىن توقتاتۋدى قاراستىراتىن نورمانىڭ دۇرىستىعى تۋرالى ماسەلە كوتەردى. ءماجىلىس توراعاسى مادەنيەت جانە سپورت مينيسترلىگىنىڭ وسى سۇراق بويىنشا ۇستانىمىنىڭ كومەسكىلىگىنە دە نازار اۋداردى.
وسىنداي قىزۋ تالقىلاۋلاردان كەيىن زاڭ جوباسى ءبىرىنشى وقىلىمدا ماقۇلداندى. وسى وتىرىستا كەيبىر زاڭنامالىق اكتىلەرگە تۇرعىن ءۇي قاتىناستارى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى دا قارالدى. بۇل قۇجات ەلباسى ن.نازارباەۆتىڭ كوپ بالالى وتباسىلار مەن جۇمىس ىستەيتىن جاستاردى تۇرعىن ۇيمەن قامتاماسىز ەتۋ جونىندەگى تاپسىرماسىن جۇزەگە اسىرۋ ءۇشىن ازىرلەنگەن. زاڭ جوباسى باسقا ماسەلەلەرمەن قاتار «التىن القا», «كۇمىس القا» جانە بۇرىن «باتىر انا» اتاعىن العان, سونداي-اق ءى جانە ءىى دارەجەلى «انا داڭقى» وردەنىمەن ماراپاتتالعان كوپ بالالى انالاردى تۇرعىن ۇيمەن قامتۋدىڭ قولجەتىمدى جولىن قاراستىرعان. قازىر كەزەككە تۇرعان كوپ بالالى وتباسىلاردىڭ سانى 31725 ەكەن. ولاردى تۇرعىن ۇيمەن قامتاماسىز ەتۋ ماقساتىندا «نۇرلى جەر» باعدارلاماسى بويىنشا جىل سايىن 50 ملرد تەڭگە بولىنۋدە. سونىڭ ارقاسىندا جىل سايىن كەمىندە 6 مىڭ پاتەر تاپسىرىلادى. زاڭ جوباسى ولاردى پاتەر كەزەگىنە تۇرعان جالپى ءالجۋاز توپتاردىڭ تىزىمىنەن الىپ, باسقا تىزىلىممەن قامتۋدى تالاپ ەتكەن. زاڭ جوباسىنىڭ ماڭىزدىلىعىن پالاتا توراعاسى اتاپ ءوتىپ, ونىڭ ورىندالۋى مۇقتاج ادامدارعا اسا قاجەت ەكەنىن ايتتى.
سونىمەن بىرگە وتىرىستا 1992 جىلعى 15 مامىرداعى ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر اراسىنداعى اسكەري-تەحنيكالىق ىنتىماقتاستىقتىڭ نەگىزگى پرينتسيپتەرى تۋرالى كەلىسىمگە وزگەرىستەر ەنگىزۋ تۋرالى ءتورتىنشى حاتتامانى راتيفيكاتسيالاۋ تۋرالى زاڭ جوباسىنا قورىتىندى ازىرلەۋدىڭ مەرزىمى بەلگىلەندى.