• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
قوعام 24 ءساۋىر, 2019

«Eurasian Book Fair 2019» كورمەسىنە 13 ەلدەن 90 كومپانيا قاتىسۋدا

1090 رەت
كورسەتىلدى

ەلوردادا نۇر-سۇلتان قالاسى اكىمدىگى مەن «فوليانت» باسپاسىنىڭ ۇيىمداستىرۋىمەن «Eurasian Book Fair 2019» حالىقارالىق كىتاپ كورمە-جارمەڭكەسى اشىلدى. سالتاناتتى جيىنعا قر مادەنيەت جانە سپورت ءمينيسترى ارىستانبەك مۇحامەدي ۇلى قاتىستى.

سالتاناتتى شارادا قۇتتىقتاۋ ءسوز سويلەگەن مينيستر كورمە-جارمەڭكە «كورمە» ورتالىعىندا 24 جانە 27 ءساۋىر ارالىعىندا جۇمىس ىستەيتىنىن,  اتالمىش شارا بيىل ءتورتىنشى رەت ۇيىمداستىرىلىپ وتىرعانىن, Eurasian Book Fair 2019 كورمە-جارمەڭكەسىنە 13 ەلدىڭ 90 كومپانياسى قاتىسىپ جاتقانىن جەتكىزدى. ولاردىڭ اراسىندا رەسەي, ءازىربايجان, ارمەنيا, تاجىكستان, قىرعىزستان, وزبەكستان, تۇركيا, قىتاي, يران, پولشا, بەلگيا, لاتۆيا, ۋكراينا ەلدەرى بار. 

سونداي-اق «فوليانت», «الماتى كىتاپ», «اتامۇرا», «مەكتەپ», «قازاق ەنتسيكلوپەدياسى» سياقتى قازاقستاننىڭ جەتەكشى باسپالارى, «مانن, يۆانوۆ ي فەربەر», «بەلىي گورود», «روزوۆىي جيراف», «كومپاسگيد», «ساموكات» سياقتى رەسەيدىڭ اتاقتى باسپالارى قاتىسۋشىلاردىڭ قاتارىندا. 

– حالىقارالىق كىتاپ كورمە-جارمەڭكەسىن وتكىزۋدىڭ باستى ماقساتى – كىتاپتى ناسيحاتتاۋ, قاتىسۋشىلاردىڭ ادەبي مۇراسىن دامىتۋ, وقىرمان مادەنيەتىن قالىپتاستىرۋ,  – دەدى مادەنيەت جانە سپورت ءمينيسترى ارىستانبەك  مۇحامەدي ۇلى.

ۇيىمداستىرۋشىلاردىڭ ايتۋىنا قاراعاندا كورمە اياسىندا تۇساۋكەسەرلەر, ادەبي ەكسكۋرسيالار, پوەزيالىق باعدارلار, اۆتورلارمەن, باسپاگەرلەرمەن, سۋرەتشىلەرمەن, پوليگرافيستەرمەن وتەتىن كەزدەسۋلەر  سىندى 150-دەن استام ءىس-شارا بار. سونىمەن قاتار شارا اياسىندا كىتاپتاردى باسپا باعاسى بويىنشا ساتىپ الۋ مۇمكىندىگى قاراستىرىلعان. بالالار ءۇشىن شەبەرلىك ساباقتارى, كونكۋرستار, ەرتەگىلەر جەلىسى بويىنشا ۇيىمداستىرىلاتىن ينتەراكتيۆتى كۆەستەر, انيماتورلاردىڭ قاتىسۋىمەن وتەتىن ويىن-ساۋىق باعدارلامالار وتەدى.

كورمە-جارمەڭكەنىڭ العاشقى كۇنى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, قر ۇعا اكادەميگى ەرلان ءباتتاش ۇلى سىدىقوۆتىڭ «شاكارىم» اتتى كىتابىنىڭ تۇساۋەسەر ءراسىمى بولدى. شارانى اكادەميك ديحان قامزابەك ۇلى جۇرگىزىپ وتىردى. جيىندا اكادەميك-عالىمدار جابايحان ءابدىلدين, بولات كومەكوۆ, ەلتاڭبا اۆتورى جانداربەك مالىبەكوۆ, پۋبليتسيست-دراماتۋرگ سۇلتان ورازالين, جازۋشى تۇرلىبەك مامەسەيىتوۆ, پروفەسسور راحىمجان تۇرىسبەك ءسوز سويلەپ, اۆتوردىڭ «شاكارىم» ەڭبەگىنە قاتىستى وي-پىكىرلەرىن ءبىلدىردى.

ءوز كەزەگىندە ءسوز العان ەرلان ءباتتاش ۇلى سىدىقوۆ سان تىلگە اۋدارىلعان ەڭبەكتىڭ ارعى-بەرگى تاريحىنا توقتالا كەلىپ, جاعىمدى جاڭالىق – ءسۇيىنشى حاباردى جاريا ەتتى: اعىمداعى جىلى اكادەميك ەرلان سىدىقوۆتىڭ «قۇنانباي» اتتى كىتابى رەسەي ەلىنەن  «جزل» سەرياسى بويىنشا جارىق كورمەكشى. «ءسۇيىنشى حابار» دەپ وتىرعانىمىز وسى!

تۇساۋكەسەر راسىمگە قاتىسۋشىلار ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عالىمدارىنىڭ ەڭبەكتەرى قويىلعان كورمەنى ارالاپ, ەستەلىك سۋرەتكە ءتۇستى.

 

سوڭعى جاڭالىقتار