كونكۋرستىڭ باس دەمەۋشىسى تابيعي رەسۋرستاردى ءوندىرۋ مەن وڭدەۋ, ەنەرگەتيكا, لوگيستيكا جانە ماركەتينگ سالالارىندا الەمدەگى ەڭ ءىرى ارتاراپتاندىرىلعان كومپانيالاردىڭ ءبىرى - Eurasian Resources Group (ERG) كومپانياسى. ەۋرازيالىق توپ (ERG) جىل سايىن ەلىمىزدىڭ رۋحاني ءومىرىن دامىتۋعا ولشەۋسىز ۇلەس قوسىپ, ادەبي-مادەني شارالارعا دەمەۋشىلىك جاساپ كەلە جاتىر.
رەسپۋبليكالىق «SEMSER» ادەبي كونكۋرسى ۇزدىك پروزا, ۇزدىك پوەزيا, ۇزدىك ادەبي سىن دەگەن 3 اتالىم بويىنشا وتەدى. باس جۇلدە - 1 000 000 تەڭگە! ءار اتالىمنىڭ جەڭىمپازدارىنا 500 000 تەڭگەدەن جۇلدە تىگىلىپ وتىر. سونىمەن قاتار, ارنايى ادەبي سىيلىقتار دا بار. گران-پري يەگەرىنە «SEMSER» ادەبي سىيلىعى تابىستالادى. ال قالعان جۇلدەگەرلەرگە التىن توسبەلگى تاعىلادى.
ادەبي كونكۋرس رەسمي تۇردە جاريالانعان كۇننەن باستاپ, 45 جاسقا دەيىنگى بارلىق قالامگەرلەر ءوز شىعارمالارىن «مادەنيەت پورتالىنا» وزدەرى ورنالاستىرۋعا بارلىق مۇمكىنشىلىكتەر قاراستىرىلعان. كونكۋرس ونلاين رەجيمدە, بارشا قازاقستاندىقتاردىڭ كوز الدىندا اشىق تۇردە جۇرگىزىلەدى. سونىمەن قاتار, وقىرماندار ءوزى ۇناتقان شىعارمالارعا داۋىس بەرە الادى. مۇنىڭ بارلىعى قازىلار القاسىنىڭ قورىتىندى شىعارۋ كەزىندە ەسەپكە الىنادى.
ادەبي بايگە تەك مەملەكەتتىك تىلدە وتەتىنىن ايتا كەتۋ قاجەت. كونكۋرس تۋرالى تولىق اقپاراتتى «مادەنيەت پورتالىنان» وقي الاسىزدار.