نۇر-سۇلتان قالاسىندا الەۋمەتتىك كومەكتىڭ كولەمى مەن سانى ارتقانىن جەتكىزگەن اكىم باقىت سۇلتانوۆ: «ەلباسىنىڭ تاپسىرماسىنا سايكەس نۇر-سۇلتان قالاسى ءوز تاراپىنان بيۋدجەتتىك باعدارلامالارداعى كۇتە تۇراتىن شارالاردى ارتقا قالدىرىپ, ۇنەمدەۋ جۇمىسىنىڭ ارقاسىندا الەۋمەتتىك سالاعا قوسىمشا قارجى ءبولىپ وتىر. ناقتى 13 شارا قابىلداندى. وعان 8 ملرد تەڭگەگە جۋىق قارجى بولىنبەك. ولاردىڭ 5-ءى بۇگىنگى بيۋدجەتتە بار. ال 8-ءى وسى ايدىڭ اياعىندا ءماسليحاتتا بيۋدجەتتى ناقتىلاۋ كەزىندە ناقتىلانادى», دەي كەلىپ, ەڭ الدىمەن وسىعان دەيىن كورسەتىلىپ كەلە جاتقان بەس ءتۇرلى الەۋمەتتىك كومەككە قوسىمشا قارجى بولىنگەنىن ايتتى.
اتاپ ايتقاندا, بۇعان دەيىن ەلوردادا 2 مىڭ وتباسى تۇرعىن ءۇي كومەگىنە يە بولعان بولسا, بيىل ونىڭ كولەمى 18 پايىزعا ارتپاق. ەكىنشىدەن, 18 جاستان اسقان مۇمكىندىگى شەكتەۋلى تۇلعالاردى كۇتۋشىلەردى تەگىن جولاقىمەن قامتاماسىز ەتۋ ءۇشىن قالالىق بيۋدجەتتەن 1,3 ملرد تەڭگە قاراستىرىلىپ وتىر. ءۇشىنشى, ۇيدە ءبىلىم الاتىن مۇمكىندىگى شەكتەۋلى بالالارعا كورسەتىلەتىن كومەك 25 مىڭ تەڭگەگە دەيىن (1,5 ەسەگە) جوعارىلاعان. ءتورتىنشى, مەملەكەتتىك الەۋمەتتىك تاپسىرىس اياسىندا تەگىن تەحنيكالىق جانە كاسىبي ءبىلىم الۋعا قولداۋ كورسەتىلەدى. بۇل ءۇشىن 3 مىڭ ادامعا 1 جارىم ملرد تەڭگە بولىنگەن. بەسىنشى, ءبىلىم بەرۋ, دەنساۋلىق ساقتاۋ جانە اسكەري سالادا جۇمىس ىستەيتىن بيۋدجەتتىك قىزمەتكەرلەرگە بەرىلەتىن تۇرعىن ءۇي سەرتيفيكاتىنىڭ سانىن 2 مىڭعا جەتكىزۋ ءۇشىن بيۋدجەتتەن 2 ملرد تەڭگە قاراستىرىلعان.
«قوسىمشا 8 الەۋمەتتىك شارانى ايتاتىن بولساق:
1) كوپبالالى وتباسىلاردىڭ بالالارى مەكتەپكە, كوللەدجگە, جوعارى وقۋ ورنىنا تەگىن بارۋ ءۇشىن 200 ملن تەڭگە ءبولىنىپ وتىر. ياعني 36 مىڭ بالا تەگىن جولاقىمەن قامتىلادى.
2) بۇعان دەيىن ەلوردامىزداعى بارلىق مەكتەپتەردە وقۋشىلار 4-سىنىپقا دەيىن تەگىن ىستىق تاماقپەن قامتىلعان بولسا, 1 قىركۇيەكتەن باستاپ كوپبالالى وتباسىلاردىڭ بالالارى 1-11 سىنىپقا دەيىن تەگىن تاماقتانا الادى. قازىر 32 مىڭ بالاعا تەگىن تاماق بەرىلۋ ءۇشىن 1 ملرد-قا جۋىق تەڭگە قاراستىرىلدى.
3) كوپبالالى جانە از قامتىلعان وتباسىلاردىڭ بالالارىنا, جەتىم بالالارعا ارنايى ساۋىقتىرۋ دەمالىسى ۇيىمداستىرىلادى. بيىل ءبىز 10 مىڭ بالاعا 500 ملن تەڭگە بولدىك.
4) مەكتەپ فورماسىمەن جانە وقۋ قۇرالدارىمەن تەگىن قامتاماسىز ەتۋ ءۇشىن 38 ملن تەڭگە ءبولىنىپ, 32 مىڭ بالاعا بەرىلەدى.
5) كوپبالالى جانە از قامتىلعان وتباسىلاردىڭ بالالارى, سونداي-اق مۇگەدەك بالالار بالاباقشاعا تەگىن بارۋىنا قولداۋ كورسەتىلەتىن بولادى. بۇگىنگى كۇنى «بالاپان» باعدارلاماسى بويىنشا ءار بالاعا ورىن ءۇشىن ءبىز 27 مىڭ تەڭگە تولەپ وتىرمىز, ال سىزدەر تاماق ءۇشىن 17 مىڭ تەڭگە تولەيسىزدەر. 1 قىركۇيەكتەن باستاپ كوپبالالى وتباسىلاردىڭ بالالارىنا بۇل قارجى بيۋدجەتتەن تولەنەتىن بولادى. بۇل ءۇشىن دە بيىلعا جارتى ملرد تەڭگە ءبولۋدى كوزدەپ وتىرمىز.
6) 180 مىڭ بالاعا ەلوردانىڭ جوو-نا تانىمال ماماندىقتار بويىنشا ءبىلىم الۋعا ارنايى گرانتتار بولىنبەك. بۇل ءۇشىن تاعى 25 ملن تەڭگە ءبولىنىپ, جىلىنا ءار بالاعا 500 مىڭ تەڭگە بەرىلەدى.
7) كوپبالالى انالارعا ءتىس دارىگەرى قىزمەتىن تەگىن ۇسىنۋ ءۇشىن بيۋدجەتتەن 400 ملن تەڭگە قاراستىرىپ وتىرمىز. 8) كوپبالالى وتباسىلارعا قىسقى وتىنمەن كومەكتەسۋ ءۇشىن قوسىمشا 1000 وتباسىعا قاراجات ءبولىندى», دەدى نۇر-سۇلتان اكىمى.
سونداي-اق قالا باسشىسى الەۋمەتتىك ماسەلەلەر بويىنشا ءۇش ايدىڭ ىشىندە 350 جەكە تۇلعانى قابىلداعانىن, 850 ادامنىڭ قابىلداۋدا كەزەكتە تۇرعانىن ايتا كەلىپ, جەكە ماسەلەلەردىڭ اۋدان, باسقارما دەڭگەيىندە دە شەشىمىن تابۋى ءۇشىن اۋدان اكىمدەرى مەن باسقارما باسشىلارى دا بەلسەندى بولۋى كەرەك ەكەنىن ەسكەرتتى.