- بيىلعى ماۋسىمدا پاريج, دۋباي جانە رابات قالالارىندا الەم كۋبوگىنىڭ ءۇش كەزەڭى اياقتالدى. سونداي-اق, زالتسبۋرگ قالاسىندا ا سەرياسى كەزەڭى مارەسىن جەتتى. دەسە دە, راباتتاعى ءتۋرنيردىڭ ماڭىزدىلىعى جوعارى. وسى كەزەڭنەن باستاپ وليمپيادالىق رەيتينگ ۇپايلارى جاڭا جۇيەمەەن ەسەپتەلمەك. ەگەر وسىعان دەيىن سپورتشىلار جيعان ۇپايدىڭ جارتىسى عانا پايداعا اسسا, ەندى بارلىق ۇپاي تولىعىمەن كاراتەشىنىڭ ەنشىسىنە جازىلماق. بۇل سپورتشىلاردىڭ رەيتينگتەگى جاعدايىن الدەقايدا جاقسارتۋعا بەرىلگەن ۇلكەن مۇمكىندىك. ماروككوداعى تۋرنيرگە الەمنىڭ 77 مەملەكەتىنەن 700 سپورتشى قاتىستى. ولاردىڭ بارلىعى دا وليمپيادا ۇپايى ءۇشىن جانتالاسقانى ءسوزسىز.
بۇل سىندا ءبىزدى كاراتەشىلەر دە وزدەرىن جاقسى قىرىنان كورسەتتى. ءبىرىنشى كەزەكتە 60 كەلىدە سىنعا تۇسكەن دارحان اسادىلوۆكە توقتالعىم كەلەدى. ول بىلتىردان بەرى ءوزى قاتىسقان جارىستاردىڭ بارىنەن جۇلدەمەن ورالىپ ءجۇر. راباتتاعى پرەمەر-ليگا كەزەڭىندە ول ادەتتەگىدەي كىل مىقتىلارمەن ءبىر توپقا ءتۇستى.
برازيليالىق بروز, يتاليالىق كرەچەنزو, جاپوندىق ساگو مەن تۇرىك ەراي دارحاننىڭ باستى قارسىلاستارى سانالادى. پرەمەر-ليگا كەزەڭىندە ءاسادىلوۆ ازۋلى سپورتشىلاردىڭ بارىنەن باسىم ءتۇستى. سونداي-اق, دارحان جىل باسىنان بەرى قاتارىنان ءۇش التىن يەلەندى. ول دۋباي, زالتسبۋرگ جانە راباتتا تۇعىر بيىگىنەن كورىنگەن جالعىز سپورتشى.
وسىلايشا, دارحان وليمپيادالىق رەيتينگتەگى ءتورتىنشى ورىنعا تۇراقتادى.
84 كەلىدەگى يگور چەحمارەۆتىڭ جۇلدەسى دە ءبىز ءۇشىن باعالى. ول رەيتينگتە جوعارىلاۋ ءۇشىن بارىن سالۋدا. يوردانياداعى ازيا چەمپيوناتىندا, شانحايداعى تۋرنيردە جۇلدەگەرلەر قاتارىنان كورىندى. ال راباتتاعى قولا مەدال ءبىزدىڭ سپورتشىنىڭ رەيتينگتەگى ورنىن نىعايتۋعا كومەكتەسەرى ءسوزسىز. ۇلتتىق قۇرامانىڭ وزگە مۇشەلەرى جۇلدەگە ىلىكپەسە دە, بىرنەشە اينالىمعا دەيىن سۇرىنگەن جوق.
راباتتاعى تۋرنيرگە قازاقستان كومانداسى ۇزاق ءارى تىڭعىلىقتى تۇردە دايىندالدى. الماتى وبلىسىنداعى ۇوك بازاسىندا وقۋ-جاتتىعۋ جيىندارىن وتكىزىپ, جارىس قارساڭىندا فرانتسيا قۇراماسىمەن بىرلەسكەن دايىندىق كەزەڭىندە بولدىق.
ەندى مامىر ايىنداعى وليمپيادالىق رەيتينگتىڭ ايتارلىقتاي وزگەرىسكە ۇشىرايتىنى انىق. ماروككوداعى جارىس قورىتىندىسى سول كەزدە ەسەپكە الىنادى, دەيدى جاستالاپ ساناۋوۆ.