سەنبى, 30 ماۋسىم 2012 7:30
بالۋاندارىمىز باپتى, كوڭىلىمىز كۇپتى…
قازاقتىڭ اتى اڭىزعا اينالعان بالۋاندارىنىڭ ءبىرى امانجول بۇعىباەۆ: «وسى سپورتقا 50 جىل ءومىرىمدى بەردىم. ەركىن كۇرەس قۇراماسىن 4 وليمپيادا ويىندارىنا باستاپ باردىم. جەتىستىگىمىز – 1996 جىلعى اتلانتا وليمپياداسىنداعى ماۋلەن مامىروۆ باۋىرىمىزدىڭ قولا مەدالى. وزگە ەلدەن كەلگەن بالۋاندار اراسىندا التىننان ولجا سالعاندار بار بولعانىمەن, ول كوڭىلگە دەمەۋ ەمەس.
سەنبى, 30 ماۋسىم 2012 7:30
بالۋاندارىمىز باپتى, كوڭىلىمىز كۇپتى…
قازاقتىڭ اتى اڭىزعا اينالعان بالۋاندارىنىڭ ءبىرى امانجول بۇعىباەۆ: «وسى سپورتقا 50 جىل ءومىرىمدى بەردىم. ەركىن كۇرەس قۇراماسىن 4 وليمپيادا ويىندارىنا باستاپ باردىم. جەتىستىگىمىز – 1996 جىلعى اتلانتا وليمپياداسىنداعى ماۋلەن مامىروۆ باۋىرىمىزدىڭ قولا مەدالى. وزگە ەلدەن كەلگەن بالۋاندار اراسىندا التىننان ولجا سالعاندار بار بولعانىمەن, ول كوڭىلگە دەمەۋ ەمەس.ء بىر قازاقتىڭ بالاسى وليمپ بيىگىنە شىقسا, ۇلكەن سپورتتاعى ءبىر ارمانىمىز ورىندالار ەدى. جاقسىلىق, ءشامىلدىڭ ماسكەۋ وليمپياداسىنداعى قوس التىنىنان بەرى وتىز جىلدان اسا ۋاقىت ءوتتى. ءبىر باۋىرىمىزدىڭ جاسىنداي جارق ەتىپ شىعاتىن ۋاقىتى جەتتى. سوندىقتان, لوندوننان كۇتەرىم كوپ», دەگەن.
سول تاريحي وقيعانى ءبارىمىز كۇتىپ ءجۇرمىز. لوندوندا التىنعا تالاسادى دەپ وتىرعان ساڭلاقتارىمىز دا بار. قۇداي كەسىرىنەن ساقتاسىن دەڭىز.
مەملەكەتىمىز تاۋەلسىزدىك العالى بەرى 4 وليمپيادالىق ويىندارعا قازاق بايراعىن كوتەرىپ باردىق. وسى ۋاقىتتار ارالىعىندا نە ۇتتىق, نە ۇتىلدىق؟ ءوسۋ, وركەندەۋ بار ما, الدە كەرى كەتتىك پە؟ وسى ءتورت وليمپيادانى نەگىزگە الىپ, ساراپتاما جاساۋعا تالپىنىپ كورەيىكشى.
1996 جىلى اتلانتا وليمپياداسىنا ەركىن كۇرەستەن التى, گرەك-ريم كۇرەسىنەن بەس بالۋان اپاردىق. ەركىن كۇرەس قۇراماسىنداعى جالعىز قازاعىمىز ماۋلەن مامىروۆ (52 كگ) قولا مەدالدى جەڭىپ الدى. ال ەلمادي جابرايىلوۆ (85 كگ) التىنشى ورىنمەن قورىتىندىلادى.
گرەك-ريم كۇرەسى التىنعا قول جەتكىزدى. داۋلەت تۇرلىحانوۆ قىرعىز ەلىنەن تاي كەزىنەن تانىپ, ەلگە اكەلگەن يۋري مەلنيچەنكو (57 كگ) وليمپ بيىگىنە شىقتى. 82 كيلودا سىنعا تۇسكەن داڭقتى ءداۋلەت تۇرلىحانوۆ قولا مەدالعا سىنىق سۇيەم جەتپەي توقتادى.
2000 جىلى سيدنەيدە وتكەن وليمپيادا ويىندارىنا ەركىن كۇرەستەن التى بالۋان, گرەك-ريمنەن بەس بالۋان اپاردىق. يسلام بايرامۋكوۆ (97 كگ) قانا فينالعا ءوتتى. كۇمىسكە قاناعاتتاندى. گەننادي لاليەۆ ءتورتىنشى, ءماۋلەن مامىروۆ التىلىققا كىردى. ال گرەك-ريم بالۋاندارىنىڭ ءبيىگى سەرگەي ماتۆيەنكونىڭ (97 كگ) التىنشى ورىندا قالدى.
2004 جىلى افينادا وتكەن وليمپياداعا 12 بالۋان اپارىپ, ءۇش مەدال الىپ قايتتىق. گەننادي لاليەۆ (74 كگ) فينالدا جۇمىر جەرگە داڭقى شىققان بۋۆايسار سايتيەۆتان عانا تىزگىن تارتتى.
ال گرەك-ءريمشى گەورگي تسۋرتسۋميا اقتىق ايقاستا, تەرەزەسى تەڭ كۇرەستىڭ سوڭعى سەكۋندتارىندا حاسان باروەۆقا ۇپاي بەرىپ قويدى. قولدا تۇرعان التىننان قاپيادا ايىرىلىپ قالدىق. محيتار مانۋكيان (66 كگ) قولا مەدال ءۇشىن تارتىستا ءمۇلت كەتكەن جوق.
2008 جىلعا كەلەيىك. قىتايدىڭ بەيجىڭ وليمپياداسىندا قازاق كۇرەسى ءوسۋ ۇستىندە ەكەندىگىن تانىتتى. قىزدار كۇرەسىن قوسقاندا 16 بالۋان اپاردىق. ەركىن كۇرەس – التى, گرەك-ريم – التى, قىزدار كۇرەسى – 4 بالۋان.
ەركىن كۇرەستە تەيمۋراز تەگيەۆ (96 كگ) فينالدا عانا ءسۇرىندى. ماريد مۋتاليموۆ (120 كگ) ءۇشىنشى ورىنعا شىقتى. ال گرەك-ريمشىلەر اسەت مامبەتوۆ (96 كگ) پەن نۇرباقىت تەڭىزباەۆ (60 كگ) قولا مەدالدان سالىم سالدى. ەركىن كۇرەستەگى ءۇشىنشى قولا مەدالدى ەلەنا شالىگينا (63 كگ) اپەردى. بۇل قىزدا مىنەز, جاۋىنگەرلىك رۋح دەگەنىڭىز جەتەدى. العاشقى جەكپە-جەگىندە رەسەيلىك و.كارتاشەۆادان ۇتىلعان ەلەنا باسقا كەزدەسۋلەرىندە كوڭىلدە تيتتەي كۇمان قالدىرماي تاماشا جەڭگەن.
بۇگىنگە دەيىنگى جاعدايىمىز وسى. ەكى كۇرەستەن 15 بالۋان اپارا جاتىرمىز. بۇل جاعىنان وتكەن وليمپياداداعى جولدامالاردان ۇتىلعان جوقپىز. جاڭالىق تا بار. اتلانتادا ەركىن كۇرەستە ءماۋلەن مامىروۆتان باسقا قازاق بولماسا, بۇگىنگى قۇرامادا ەكەۋىنەن باسقاسى – ءوز قانداستارىمىز. گرەك-ريمدىك المات كەبىسباەۆتى الەمدىك ساراپشىلار التىنعا تالاساتىنداردىڭ ساناتىنان كورەدى. وعان لوندوندا قازاق بايراعىن كوتەرىپ شىعاتىن بالۋان شولاقتىڭ نەمەرەسى نۇرماحان تىناليەۆتى قوسىڭىز. ەركىن كۇرەس بالۋاندارى دا جۇلدەسىز قايتپايمىز دەسەدى. بۇرىنعى وليمپيادالىق ويىندارعا قاراعاندا, ءوسۋ ۇستىندەمىز. بۇل كوڭىلدەگى كورىكتى وي. تورەشى – لوندون.
الماتى.
__________________________________
دىچكو انۇراندى كەرەمەت ايتادى
ال شاپيەۆكە ويلانۋ كەرەك
شتاتتاعى ۇلتتىق كوماندالار ديرەكتسياسىنىڭ ءباسپاسوز حاتشىسى ارداق توعىموۆپەن تاۋ باۋرايىنداعى وقۋ-جاتتىعۋ جيىنىنىڭ سوڭعى كۇندەرىن وتكىزىپ جاتقان ەركىن كۇرەس جانە بوكس قۇرامالارىنا باردىق. ارداقتىڭ كوزدەگەن ماقساتى – سپورتشىلارىمىزدىڭ ءانۇراندى قالاي ورىندايتىنىن بايقاۋ, دۇرىسى – تەكسەرۋ. ديرەكتسيانىڭ مۇنىسى تۇسىنىكتى. ويتكەنى, حالىقارالىق جارىستاردى بىلاي قويعاندا, ەلىشىلىك جارىستاردا دا قازاق مەملەكەتىنىڭ ءانۇرانىن ورىنداۋدا جاڭساقتىققا جول بەرىلگەن, قازاق بايراعىمەن كۇل-قوقىس تاسىلعان تەلەسيۋجەت تە ەستە. بۇل – مەملەكەتتىك ءرامىزدى قورلاۋ عانا ەمەس, ءوزىڭدى دە سىيلاي المايتىندىعىڭنىڭ ۇلگىسى, ۇلكەن جاۋاپسىزدىق. وتانىڭ – قازاقستان, ارقا سۇيەرىڭ قازاق ەلى بولعاننان كەيىن مەملەكەتتىك اتريبۋتتاردى كوزدىڭ قاراشىعىنداي ساقتاپ, ۇلى ماحابباتپەن ءسۇيۋىڭ كەرەك. بۇل – ءمىندەتتەۋ, كۇشتەۋ ەمەس, ابزال بورىشىڭ.
اۋەلى «تاۋ سامالى» دەمالىس ۇيىندەگى ەركىن كۇرەس بالۋاندارىنا باردىق. كوڭىل-كۇيلەرى جامان ەمەس. بۇرىن قاپ تاۋىنىڭ جىگىتتەرىنە نەگىزدەلەتىن قۇراما ورنىن ءوز جىگىتتەرىمىز باسقان. ءانۇراندى ايتتى. ءبىلەدى ەكەن. ال ابدۋلحاكيم شاپيەۆ بىلمەيدى. ول وليمپياداعا قاتىسۋعا مۇمكىندىكتى قازاقستاننان ىزدەسە, وندا وسى مەملەكەتتىڭ رامىزدەرىن ايالاۋى قاجەت. بەيجىڭ وليمپياداسىنىڭ كۇمىس جۇلدەگەرى تيمۋراز تەگيەۆ وقۋ-جاتتىعۋ جيىنىن ءوزىنىڭ وسەتياسىندا وتكىزىپ جاتىر. لوندوندا قۇراماعا قوسىلادى. وسى جىگىتتە بۇلا كۇشپەن قوسا تەنتەكتىك دە جەتەدى. بەيجىڭدە گرۋزين بالۋانىنىڭ قاباعىن جارىپ ءجىبەردى, گۋانچجوۋدا يران بالۋانىن باسپەن كەۋدەدەن سوقتى. وزىندە جەتپەگەنىن كوكىرەككە سالاتىن بۇل جىگىتتىڭ دە ءانۇرانىمىزدى بىلەتىنىنە كۇدىگىمىز بار. ويتكەنى, بەيجىڭدە فينالدان سوڭ يىعىنا ءمۇسىلىم وڭداعانوۆ قۇستاي ۇشىپ بارىپ جاپقان قازاق بايراعىن كەيىن سەرپىپ تاستاپ, كوڭىلىمىزدى سۋىق تارتتىرعان. قازاقستاننىڭ ءاركىم كىرەم دەسە ەسىگى اشىق قورا ەمەستىگىن ول ءتۇسىنۋى كەرەك. تۇسىنبەسە قاتال ءتۇسىندىرىلسىن.
ال ءبىزدىڭ بوكسشىلارىمىز شەتىنەن التىن عوي. قازاق سپورتى وليمپيادا باعدارلاماسىندا سىرتتان سپورتشى قاجەتسىنبەسە, ول – بوكس. باس باپكەر مىرزاعالي ايتجانوۆ ايتقانداي, قۇراماداعى ءبىرىنشى بوكسشىلاردى كەز كەلگەن جاعدايدا اۋىستىرا الاتىن ەكىنشى, ءۇشىنشى قۇرام بار. ول ءۇشىن قازاقستان بوكس فەدەراتسياسىنىڭ پرەزيدەنتى تيمۋر ق ۇلىباەۆ باستاعان ازاماتتارىمىزعا حالىق اتىنان مىڭ العىس! وسى جىگىتتەر ءانۇراندى جاي ايتقان جوق, جۇرەگىمەن ايتتى. كىل قازاقتىڭ ورتاسىندا ءوزىمىزدىڭ ورىس يۆان دىچكو بار. قۇدايدىڭ قۇدىرەتى, وسى يۆان ءانۇراندى جەكە ايتقاندا ءبىر مۇدىرگەن جوق. ءسوزىن دە, ءانىن دە بۇزبادى.
مەنىڭ ەلىم, مەنىڭ ەلىم
تۋعان جەرىم مەنىڭ – قازاقستانىم! – دەپ شىرقاعاندا كۇندەي كۇركىرەيدى.
ەركىن كۇرەستەگى قۇرامامىزدىڭ باس باپكەرى التاي تاناباەۆ بىزگە: «بوكسشىلاردى جاقسى كورەسىڭدەر, ءبىزدى ەلەي بەرمەيسىڭدەر», دەپ بازىنا ايتقان. قۇداي-اۋ, بوكسشىلاردى قايدان جاقسى كورمەيسىڭ. ارقايسىسىنان قازاق اۋىلىنىڭ جۋسان ءيىسى بۇرقىراپ تۇر عوي. ءبارى ءبىر ءۇيدىڭ بالاسىنداي تاتۋ. ءبىرى – ءبارى ءۇشىن, ءبارى – ءبىرى ءۇشىن. سالماق قۋام دەپ جانىعىپ جۇرگەن ەشكىم جوق. قايتا ادىلبەك نيازىمبەتوۆ سالماعىن تولتىرا الماي ءجۇر. ءبارى جاراۋلى اتتاي بايگەگە دايىن.
مىرزاعالي ايتجانوۆ باستاعان باپكەرلەر جاتتىعۋدا قاتال, دەمالىس ساعاتتارىندا قامقور اعا. كاپيتان سەرىك ساپيەۆتىڭ جەيدەسىنەن ساۋلاعان تەر بالاعىنان تامشىلايدى. قۇراماداعى ەڭ جاس بوكسشى, الەمدىك جارىستاردا ءالى باستىقپاعان ءىلياس ءسۇلەيمەنوۆ تۇيدەكتەتە ۇرعاندا باپكەرلەرىنىڭ قولىنداعى لاپانىڭ ورتاسىن تەسىپ جىبەرە جازدايدى. قارسىلاستارى جاي وعىنداي جىلدام, بۇلت ەتىپ كۇتپەگەن جەرىڭنەن شىعا كەلەتىن ابجىلدىگىنە وراي «شايتان» دەپ لاقاپ ات قويعان عاني جايلاۋوۆ قانداي كەرىم.
سۇمەكتەگەن تەرمەن جاتتىعۋ جاساپ ءجۇرىپ, ارا-اراسىنداعى دەمالىستا سۇحبات بەرىپ قويادى. ازىلقوي. مىرزعالي ايتجانوۆقا: «اعا-اۋ, ينتەرۆيۋ بەرۋگە امبەباپ بولىپ الدىق. تاڭەرتەڭ ۇيقىدان تۇرعاندا گازەت ءتىلشىسىن شاقىر, كامەرا اكەل, ايتپەسە جاتتىعۋدى باستامايمىن دەيتىن شىعارمىز», دەپ كۇلەدى, مىرزاعاليدىڭ دا جاۋابى دايىن.
– لوندوننان ولجالى ورال. سوسىن مەن سەنى ينتەرۆيۋ بەرۋدەن ءارتىس قىلىپ جىبەرەمىن, – دەيدى ك ۇلىپ.
ارقايسىنىڭ ءوز جاتتىقتىرۋشىسى بار. ءار جاتتىعۋ وتكەن سايىن تامىر سوعىستارىن تىڭدايدى. بوكسشى زورىعىپ كەتپەۋى كەرەك. تاۋعا ورمەلەۋ, تاس لاقتىرۋ, فۋتبول ويناۋ, مادەني دەمالىس… جاتتىعۋ وسىلاي جالعاسىپ جاتىر.
…تۋعان قازاقستانىنىڭ نامىسى ءۇشىن وسى جىگىتتەردىڭ ەشقايسىنىڭ ايانارى جوق.
الماتى.
سۋرەتتە: يۆان دىچكو.
______________________________
قازاق بايراعى جەلبىرەپ بارىپ, جەلكىلدەپ قايتسىن
سپورت ارداگەرلەرى وسىنداي اقتىلەۋ ايتتى
قاراعاي, شىرشالارى تىك شانشىلعان اسقاق الاتاۋدىڭ قولاتىنداعى جۇماق جەرگە ورنالاسقان “اقبۇلاق” سپورت-ساۋىقتىرۋ كەشەنىنە اعالارىمىزدىڭ باستاۋىمەن تاعى كەلدىك. ول – ءمۇسىلىم دايىربەكوۆ. قازاقستان بوكس ارداگەرلەرى ۇيىمىنىڭ توراعاسى, مەتسەنات. ءبىزدىڭ بىلگەنىمىزدەي, ءمۇسىلىم اعا بايلىعى اسىپ-توگىلىپ جاتقان جان ەمەس. تاپقان-تايانعانىن تاقىمىنىڭ استىنا باسىپ, تاقىستانىپ وتىرعان كوپ شال-شاۋقانعا جانە سورپاسى قوسىلمايدى. ەلدىڭ ءۇمىتىن ارقالاپ بارا جاتقان شويىن جۇدىرىق باتىرلارىمىزعا اقتىلەۋ ايتىپ, باپكەر, ماسساجشى, دارىگەرىنە دەيىن باس-باسىنا اقشالاي سىيلىق بەرمەكشى.
ەكىنشىسى – سەرىك ابدەناليەۆ. قازاقستان تاۋەلسىزدىگىن العاندا ۇلت بوكسىنىڭ باس باپكەرى بولعان, كەيىن ءوزىنىڭ ۇيعارىمىمەن داڭقتى بوكسشى ءابدىسالان نۇرماحانوۆقا وتكىزگەن, تابانى كۇرەكتەي 16 جىل قازاق بوكسىنىڭ مەملەكەتتىك جاتتىقتىرۋشىسى بولعان جاقسى اعامدى كەيىنگى جىلدارى جوعالتىپ الىپ جۇرگەم. اقتاۋ اسىپ كەتىپتى.
سەرىك ابدەناليەۆ – قازاقستانعا بوكس قولعابىن ارقالاپ كەلگەن شوقىر بولتەك ۇلىنىڭ قول استىندا ءتالىم العان, ەڭ العاشقى سپورت شەبەرى. ءتورت الەم چەمپيوناتىندا تورەشى, سيدنەيدە الەمدەگى ۇزدىك 50 ءتورەشىنىڭ قاتارىنا كىرگەن, بەكزات, بولات, ەرماحان مەن مۇقتارحاندار سيدنەي شارشى الاڭىنىڭ ءتورت بۇرىشىندا سۇركىل سالعاندا قازاق باتىرلارىنىڭ جەڭىسى ۇرلانباۋىنا ەڭبەك سىڭىرگەن ازاماتىڭىزدىڭ ءبىرى وسى. سەرىك ابدەناليەۆتەن بوكس ءالىپبيىن ۇيرەنىپ, قالالىق تالاي جارىستاردا توپ جارعان, ۇلتجاندى ازاماتتارىمىزدىڭ ءبىرى قىرىمبەك كوشەرباەۆ ماڭعىستاۋ وبلىسىنىڭ اكىمى بولىپ تۇرعاندا شوقىر بولتەك ۇلى اتىنداعى سپورت ءىزباسارلارىن دايىندايتىن مەكتەپ اشىپ, باسشىلىققا ۇستازىن شاقىرعان ەكەن. لوندوندا انىق مەدال كۇتىپ وتىرعان ءۇش بوكسشىمىز بولسا, سونىڭ ءبىرى – ادىلبەك نيازىمبەتوۆ. باكۋدە وتكەن الەم چەمپيوناتىنىڭ ءفيناليسى شوقىر ءبولتەك ۇلى اتىنداعى سپورت مەكتەبىنىڭ تۇلەگى.
ءۇشىنشى اعامىز “اقبۇلاقتان” قوسىلدى. ءماديحان ساۋدانبەكوۆ 12 جىل الماتى وبلىسى بوكس فەدەراتسياسىنىڭ پرەزيدەنتى بولعان سپورت ارداگەرى. كەيىنگى كەزدە دەنساۋلىعىنا بايلانىستى باسشىلىقتى وتكىزىپ, ءوزى ۆيتسە-پرەزيدەنتى قىزمەتىندە قالعان. ء“ماديحان” اتتى شارۋا قوجالىعى بار. “اقبۇلاقتىڭ” ەتەگىندە الما باۋى, كوكونىس جەرى ونىمگە مالىنىپ تۇر. جىلقىسىن سويىپ, باۋ-باقشا ونىمدەرىن كوتەرىپ, قىمىز-قىمىرانىن ارقالاپ جۇرەتىن اعامىزدى بۇگىنگىنىڭ اتىمتاي جومارتى دەسەڭ جاراسادى. سپورت كەشەنىنىڭ مەيرامحاناسىندا قازاقستان بوكس قۇراماسى, ولارعا دايىندالۋعا كومەكتەسۋگە كەلگەن ەكىنشى قۇراما, اعا بۋىنمەن بىرگە جاتتىعۋ جاساپ جۇرگەن جاسوسپىرىمدەر قۇراماسى جانە قوس قۇرامانىڭ باپكەرلەرى قاتىسۋىمەن اس بەرىلىپ, قۇران وقىلدى. باتا جاسالدى.
– مەن دۇنيە ءجۇزىنىڭ كوپتەگەن مەملەكەتتەرىندە بولدىم, – دەدى ءمۇسىلىم دايىربەكوۆ. – وزگە باتىرلارىمەن قوسا سپورتتاعى جامپوزدارىنا ەسكەرتكىش قويعاندارىن كوردىم. ءبىزدىڭ ءبۇگىنگى باتىرلارىمىز سەندەرسىڭدەر. ەشقايسىڭدى بولەكتەي المايمىز. مەملەكەتتىڭ اتىن ءدۇنيە جۇزىنە ءماشھۇر ەتۋگە, ەلدىڭ مەرەيىن اسقاقتاتۋعا ارقايسىڭ-اق لايىقتىسىڭدار. جۇيكەلەرىڭ تەمىردەي مىقتى بولسىن, قارسىلاستارىڭنىڭ اتاق-داڭقىنان سەسكەنبەڭدەر. قازىر الەم قازاق بوكسىمەن ساناسادى. قورىقسا, سەندەردەن قورىقسىن. وليمپياداداعى ءاربىر جەكپە-جەكتەرىڭدى فينالدىق جەكپە-جەك دەپ ۇعىڭدار.
– ۆانيا, سەن ايتشى. ەشكىمنەن قورىقپايمىن. مەملەكەتىمنىڭ جەڭىسى ءۇشىن كەز كەلگەن قارسىلاسىمدى ۇرىپ جىعامىن دەپ ايتشى؟
– ۇرامىن! – دەپ كۇندەي كۇركىرەيدى يۆان دىچكو.
ءبىزدىڭ ەڭ اۋىر سالماقتاعى بوكسشىمىز, قىتايدىڭ بەتكە ۇستاعان باس بوكسشىسى, بەيجىڭ وليمپياداسىنىڭ كۇمىس جۇلدەگەرى جان جەلەيدى جولداما ءۇشىن جولىنان سىرىپ تاستاعان ءبىزدىڭ وسى يۆان.
سەرىك ابدەناليۆ تە اتالى سوزدەر ايتتى.
– ءبىزدىڭ زامانىمىزدا بوكسشىلاردا ءدال سەندەردەگىدەي جاعداي بولعان جوق. وقۋ-جاتتىعۋ جيىندارىندا ءبىر بولمەدە 6-10 بوكسشى جاتقان كۇندەر بولدى. ال, سەندەرگە ۇكىمەت ۇلكەن كوڭىل ءبولىپ وتىر. قازاقستان بوكس فەدەراتسياسى بار جاعدايدى تۋعىزۋدا. تاۋەلسىزدىك العاننان بەرى قازاقستان بوكسى ءبىر وليمپيادادان التىنسىز قايتقان جوق. قاتارلارىڭدا سىرتتان شاقىرىلعان بوكسشى جانە جوق, ءبارى ءوزىمىزدىڭ تۇلەكتەر. سەندەردىڭ دە التىنمەن ورالاتىندارىڭا سەنگىم كەلەدى. سوڭىنا دەيىن ايقاس سالۋ كەرەك. تورەشىلەر شابۋىل جاساۋشىعا ارتىقشىلىق بەرەدى. سيدنەيدە ەرماحان ءۇشىنشى راۋندتا ەكى ۇپايعا ۇتىلىپ جاتتى. سوڭعى راۋندتىڭ بىتۋىنە 30 سەكۋند قالعاندا الاپات ايقاس سالدى. قاشقاقتاعان مارين سيموننىڭ ەكى اياعىن ءبىر ەتىككە تىعىپ, تولاسسىز اۋىر سوققىلاردىڭ استىنا الدى. قولىنان شىعىپ بارا جاتقان جەڭىستى وسىلايشا ج ۇلىپ الدى.
وسىنداي اعالارىڭنىڭ ونەگەسى سەندەرگە ساباق بولسىن دەپ ايتىپ وتىرمىن. باپكەرلەرىڭ ايقاس كەزىندە ءبارىن كورىپ وتىرادى. كەڭەسىن ورىنداۋعا تىرىسىڭدار. جەڭىسپەن ورالىڭدارشى, باۋىرلارىم.
ال ءماديحان اعا باتا بەردى. ءبىز دە بىلگەنىمىزدى ايتتىق. مەملەكەت تاراپىنان لوندونعا ءۇش جۋرناليست, ءبىر فوتوكوررەسپوندەنت كەتىپ بارا جاتسا, سونىڭ ءبىرى – ەل گازەتى “ەگەمەننىڭ” ءتىلشىسى. قۇس قاناتىمەن جەتەتىن حابارىمىزدىڭ ءسۇيىنشىسى كوپ بولعاي دەپ تىلەدىك.
قازاقستان بوكس قۇراماسىنىڭ كاپيتانى, ەكى دۇركىن الەم چەمپيونى سەرىك ساپيەۆ ادەتتەگى ورىسشا جورعالاتقانىن قويىپ, ءوز انا تىلىندە سويلەدى. ءبىزدىڭ سەرىك قانىق سويلەيدى ەكەن. “موينىمىزداعى جاۋاپكەرشىلىك جۇگىن قاتتى سەزىنەمىز. ەل ارتقان ءۇمىتتى اقتاۋعا بارىمىزدى سالامىز”, دەدى ناركەسكەندەي قىلپىپ, ۇلى ايقاسقا دايىن تۇرعان الامانىمىز.
باس باپكەر مىرزاعالي ايتجانوۆ قۇراما اتىنان اقساقالدارعا راحمەت ايتتى.
– ماسەلە بەرگەن جانە العاندا ەمەس. ەڭ باستىسى – كوڭىل. ءبىز جىگىتتەرىمىزدىڭ يىعىندا كاتەپتى قارا نار كوتەرەردەي جۇك ارتتىق. ۇكىمەت كومەكتەسىپ جاتىر. فەدەراتسيا جاعدايلارىن جاسايدى دەپ سىرتتاي بەرسەك, مەملەكەت نامىسىن قورعاۋعا بارا جاتقان باتىرلار جان جىلۋىن, ەلدىڭ ماحابباتىن, ايالى الاقاننىڭ ىستىق تابىن قايدان الادى؟.. ءمىنە, ءجىگىتتەر! كوپتى كورگەن اعالارىمىز جونىمەن كەلدى. قۇران وقىلدى. باتا بەرىلدى. اقجارىلقاپ تىلەكتەرىن ايتتى. ەلدىڭ اماناتىن جەتكىزدى. راحمەت ايتايىق.
بوكسشىلارىمىز دا ارقالانىپ قالدى. دۇنيەجۇزىنىڭ شويىن جۇدىرىق جىگىتتەرىنە قارسى تۇرۋعا ارقاشان دايىن ەكەندىكتەرىن ايتتى. «قازاق! قازاقستان!» دەپ ۇران تاستاسا, جۇرەگى مىڭنان تايسالمايتىن الاش اسىلدارىنىڭ بايلامى وسى. اعالار تىلەگى قابىل بولعاي.
باقتيار تايجان,
«ەگەمەن قازاقستان».
الماتى.