اتاۋلى شارا جاستار جىلىنىڭ اياسىندا ۇيىمداستىرىلدى. باق سىناۋشىلار ءار ايماقتاعى جوعارى وقۋ ورىندارىندا ىرىكتەۋدەن ءوتىپ كەلگەن. سوندىقتان بولاشاق اۋدارماشى نەمەسە شەت ءتىلىنىڭ مامانى بولماسا دا, زامان تالابىنا ساي عالامدىق تىلدەردى مەڭگەرۋگە تالپىنىپ جۇرگەن تالاپكەرلەر وتە قابىلەتتى. ۇيىمداستىرۋشى, اعا وقىتۋشى قارلىعاش جالەلقىزى وسى جىلى 98 ستۋدەنت قاتىسىپ وتىرعانىن ايتتى. «رەسپۋبليكانىڭ ءار تۇكپىرىنەن جەتكەن جالىندى جاستاردىڭ باسىن قوساتىن وليمپيادانى فيلولوگيا فاكۋلتەتىنىڭ شەتەل تىلدەر كافەدراسى بەس جىلدان بەرى جىل سايىن ۇيىمداستىرىپ كەلەدى. قاتىسۋشىلاردىڭ 32-ءسى نەمىس تىلىندە, 62-ءسى اعىلشىن تىلىندە باق سىناۋدا», دەيدى. ونىڭ ايتۋىنشا, نازارباەۆ ۋنيۆەرسيتەتىنەن ەكى وقىتۋشى, «Inter press» حالىقارالىق ءتىل ورتالىعىنان كەلگەن ادىسكەر ۇزدىكتەردى انىقتاۋدا تاۋەلسىز ساراپشى بولماق. ال شارانى ۇيىمداستىرۋعا اقش, گەرمانيا مەن بريتانيا ەلشىلىكتەرى قولداۋ كورسەتكەن.
وليمپيادا ەكى تۋردان تۇرادى. ءبىرىنشى كەزەڭدە قاتىسۋشىلار ءتىلدىڭ B1/B2 دەڭگەيىنەن تىڭدالىم, لەكسيكا-گرامماتيكا جانە وقىلىم بويىنشا تەست تاپسىرسا, ەكىنشى تۋردا «بۇگىنگى جاس – ەرتەڭگى بولاشاق» (Today’s Youth – Tomorrow’s Future) تاقىرىبىندا جوبا قورعايدى. تەستىلەۋگە 2 ساعات بولىنسە, ەكىنشى كەزەڭدەگى ءار پرەزەنتاتسياعا 5 مينۋت ۋاقىت بەرىلگەن.
وليمپياداعا قاتىسۋشى ەرسۇلتان ومار سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ «ساۋلەت-قۇرىلىس» فاكۋلتەتىندە وقيدى. «وسىعان دەيىن وبلىستىق وقۋشىلار اراسىندا وتكەن تىلدىك وليمپياداعا قاتىستىم. رەسپۋبليكالىق دەڭگەيدەگى بايقاۋعا العاش كەلىپ تۇرمىن. ءبىرىنشى تۋر بۇرىننان تانىس تەستىلەۋدەن تۇرادى. مەن ءۇشىن ەكىنشى كەزەڭ قىزىق بولىپ تۇر. ويتكەنى وندا ءتىلدى قالاي مەڭگەرگەنىڭ عانا ەمەس, يدەياڭ, ويىڭ جانە ولاردى جەتكىزۋ قابىلەتىڭ سىنعا تۇسەدى», دەيدى ەرسۇلتان. ول قارسىلاستارىنىڭ مىقتى ەكەنىن سەزسە دە, جەڭىستەن ءۇمىتتى.
وليمپيادا قورىتىندىسى بۇگىن, ياعني 19 ءساۋىر كۇنى كەشكى ساعات 18.00-دە بەلگىلى بولادى.