2018 جىلدىڭ ماۋسىم ايىندا كاسىپكەرلەردى قولداۋ جونىندە كەيبىر زاڭ اكتىلەرىنە وزگەرىستەر ەنگىزىلىپ, قۇرىلىس سالاسىنداعى اتقارىلىپ جاتقان جۇمىستاردىڭ ساپاسىن تەكسەرۋ بويىنشا بىرقاتار قۇزىرەتتىلىكتەر قىسقارتىلعانى بەلگىلى بولدى. وبلىس اكىمىنىڭ تىكەلەي تاپسىرماسىنا سايكەس, وڭىردەگى قۇرىلىس نىساندارىنا باقىلاۋدى كۇشەيتۋ ماقساتىندا «زاڭسىز, نەگىزگى قۇجاتتارسىز جانە ساپاسىز قۇرىلىستاردى بولدىرماۋ ءىس-شارالار جوسپارى» ازىرلەنىپ, بەكىتىلدى. 2018 جىلى قۇرىلىس ساپاسىنا قاتىستى 168 اكىمشىلىك ءىس قوزعالعان بولسا (ايىپپۇل سوماسى 18,1 ميلليون تەڭگە), ونىڭ 114-ءى نەمەسە 68 پايىزى (ايىپپۇل سوماسى 12 ميلليون تەڭگە) اتالعان ءىس-شارا ناتيجەسىندە انىقتالعان. اعىمداعى جىلدىڭ العاشقى توقسانىنىڭ وزىندە 89 ءىس قارالسا (ايىپپۇل سوماسى 9,2 ميلليون تەڭگە), ونىڭ 74-ءى نەمەسە 83 پايىزى (ايىپپۇل سوماسى 8 ميلليون تەڭگە) ءىس-شارا ناتيجەسىندە بەلگىلى بولعان.
جامبىل وبلىستىق مەملەكەتتىك ساۋلەت-قۇرىلىس باقىلاۋ باسقارماسى تاراپىنان وبلىس اۋماعىنداعى ليتسەنزياتتاردىڭ ەلەكتروندى دەرەكتەر بازاسى قۇرىلىپ, ليتسەنزياتتار بويىنشا بارلىق مالىمەتتەر ەنگىزىلۋدە. ناتيجەسىندە وبلىستا تىركەلگەن 1500 ليتسەنزياتتىڭ 700-ءى قىسقارتىلدى. ياعني, بۇگىنگى كۇنى جامبىل وبلىسىنداعى قۇرىلىس سالاسىنداعى ليتسەنزياتتاردىڭ سانى 800-ءدى قۇراپ وتىر. اتالعان دەرەكتەر بازاسى قۇرىلىس سالاسىنداعى اتى بار دا زاتى جوق مەكەمەلەردىڭ ليتسەنزيا الۋىنا شەكتەۋ قويۋعا مۇمكىندىك بەرىپ وتىر. ال, بۇل ءوز كەزەگىندە قۇرىلىس ساپاسىنىڭ ارتۋىنا سەپتىگىن تيگىزەرى ءسوزسىز.
جيىندا وبلىس اكىمىنىڭ تاپسىرماسىنا سايكەس قۇرىلىپ, قولدانىسقا ەنگىزىلىپ جاتقان وڭىردەگى «قۇرىلىس نىساندارىنىڭ ەلەكتروندى دەرەكتەر بازاسىنىڭ» تيىمدىلىگى, پايدالى تۇستارى كەڭىنەن ءسوز بولدى. دەرەكتەر بازاسى مونيتورينگ جۇرگىزۋدى, قىزىل سىزىقتىڭ ساقتالۋىن, قۇرىلىس مادەنيەتىن, زاڭدىلىعىن, ساپاسىن قامتاماسىز ەتىپ, قۇرىلىس نىساندارىنىڭ باستالعان كۇنىنەن پايدالانۋعا بەرىلگەنگە دەيىنگى ارالىقتا باقىلاۋعا, قۇرىلىس كولەمىن انىقتاۋعا, زاڭ بۇزۋشىلىقتاردىڭ الدىن الۋعا تولىق مۇمكىندىك بەرەدى. سونىمەن قاتار, اسقار مىرزاحمەتوۆ جۇرگىزىلىپ جاتقان ءاربىر قۇرىلىستىڭ ساپالى اتقارىلۋى ادام ءومىرىنىڭ قاۋىپسىزدىگىمەن بايلانىستى ەكەنىن باسا ايتىپ, بۇل باعىتتاعى جۇمىستار قاشاندا نازاردان تۇسپەۋ كەرەكتىگىن ەسكەرتتى. اكىم مەردىگەرلەردىڭ قۇرىلىس جۇمىستارىن باقىلاۋ شارالارىنا تاپسىرىس بەرۋشىلەرمەن قاتار اۋىلدىق وكرۋگ اكىمدەرى دە بارىنشا اتسالىسۋ كەرەكتىگىن تىلگە ايتتى. سونىمەن قاتار, قۇرىلىسى اياقتالىپ, پايدالانۋعا تاپسىرىلعان نىسانداردىڭ كەپىلدىك مەرزىمى ارالىعىندا پايدالانۋ كەزىندەگى ساپاسىنا دا جۇيەلى تۇردە مونيتورينگ جۇرگىزۋدى تاپسىردى.