***
ولتىرمەدى مەنى مۇڭ ەمدەمەدى, "پەرىشتە" دەپ سەنگەنىم "پەندە" مە ەدى؟! وزەگىمە ءورت قويىپ وزگەلەردەي, وكىندىرىپ كەتتىڭ عوي, سەن دە مەنى...
ساتقىندىعىن ءومىردىڭ ءبىر ۇقتىرىپ, ەسسىز شاقتى ەسكە ساپ... ۇمىتتىرىپ... سۇيرەپ كەلە جاتىرمىن "سۇيەگىمدى", كۇيرەپ كەلە جاتىرمىن ك ۇلىپ تۇرىپ...
ءبىرىن-ءبىرى ادامدار ساتادى, اقتاپ, الەم ءۇنسىز كۇناعا باتادى اپپاق. مەنىڭ جەڭىلىسىمە كۇلە قاراپ, اعاشتار تۇر قولدارىن شاپالاقتاپ.
الىستادى ارداقتىم "سەنەم" دەگەن, سول كۇن تەرىس اينالدى الەم مەنەن. مەن تاعى دا ەڭ ادال جالعىزدىقتى, جالعىز ءوزىم قارسى الدىم...ولەڭمەنەن...
***
جالقىلىعىمدى جاتسىندى اتىراپ, بار ماڭ, كوشەدە جالعىز قالدىم دا قارقىلداپ كۇلدىم. توسىنە كۇزدىڭ قۇلاعان جاپىراقتاردان, ساتقىندىق جايلى سۇيكىمسىز ءان تىڭداپ تۇرمىن...
ءان تىڭداپ تۇرمىن كوڭىلدىڭ وكپەسىن كونە, وتكەن شاعىمنىڭ كورىنە سۇيرەدىم, كومىپ... جاپىراقتاردى جىلاعان (كەكتەنسىن كىمگە؟), اسپانعا شاشىپ الاڭسىز بيلەگىم كەلىپ...
سەرت بەرگەن سەزىمدەرىنە لايىقتاي بەكەم, ساپ-سارى سوقپاقتارىنان جاڭىلىسپايدى. ...كۇز, سەنى قالاي "ساتقىن" دەپ ايىپتايدى ەكەم, جاپىراق بىتكەن ءان ايتسا ساعىنىش جايلى...
***
ءبىر-اق ءسوزىڭ ەستىلدى دە... جاندىم با؟ جاس ارىلدى كويلەگىمنىڭ جەڭىنەن. مەنمەنسىگەن باقتىڭ ءوزى الدىمدا, باسىن يزەپ امانداستى مەنىمەن.
ەلەمەدىم اسپانداعى ايدى دا, ارمانىممەن ويناپ جۇرگەن "قۋىسپاق". كەشە مەنى قان جىلاتقان قايعىعا, قۋانىشتى شاشىپ كەتتىم ۋىستاپ.
ءبىر سوزىڭنەن ءومىر كەتتى وزگەرىپ, وزەگىندە وتكەنشاقتىق كەك كۇلدى. قاراعايلار بولماشى ءبىر سوزگە ەرىپ, "مىنا قىزدىڭ ەسى اۋىسقان" دەپ تۇردى...
شىن باقىتتىڭ ءدامىن سولاي تاتىردىڭ, الەم تۇردى ءبىر-اق اۋىز سوزىڭدە. قۋانىشتى شاشىپ كەلە جاتىرمىن... بۇل مەنمىن بە؟.. تۇسىنبەدىم ءوزىم دە...
***
ءومىر مىناۋ: كىم جەڭىلدى, كىم ۇتتى؟
ءومىر مىناۋ: كۇيدىرۋگە قۇنىقتى.
...جالعانداعى جالعىز عانا «جەبەۋشىم»,
ول دا مەنى ۇمىتتى...
ۇم(ى)تىلماۋعا ۇمتىلسام دا نەشەمە,
ۇمىتىلدىم, سولاي ەكەن پەشەنە.
وتكەنىمدى شىعارعىم كەپ ەسىمنەن,
ۇزاق ءجۇردىم كوشەدە.
سولقىلىنان ساۋىعا الماي جارانىڭ,
كوشە ۇشىندا جالعىز ۇزاپ بارامىن.
«ەسكى ءانىمدى» ەسىمە ساپ شىرقايدى,
ەسكى شامى قالانىڭ.
وكپەلەمەي...
كىنالاماي,
سۇس قىلماي,
قايعىمنىڭ دا كەۋدەسىنەن قۇشتىم جاي.
...قارسى الدىمنان قاڭعىباس يت كەزىككەن,
ول دا كەتتى پىسقىرماي...
***
ارقاما اۋىر جۇك ارتىپ, جازعىرسىن, مەيلى, بۇل جالعان. تەرەكتەي كۇزگى قۋارتىپ, ساباعىمدى ءۇزسىن ءبۇر جارعان.
ۇيقىسىز تاڭدى اتىرىپ, سۋالدى نۇرى جاناردىڭ. قالامىمدى الدىم باتىرىپ, قاراشىعىنا عالامنىڭ.
ءبىر سيقىر قۇيدىم كوڭىلگە, تامشىسىمەنەن جاڭبىردىڭ. وكپەشىل مىناۋ ومىرگە, ولەڭ بوپ كەلگەن تاعدىرمىن.
جارقىلسىز, جۇمباق سەزىمسىز, جۇلدىزدىڭ كوردىم سونگەنىن. اپپاق بۇلتىنا كەبىنسىز, اسپاننىڭ كوردىم كومگەنىن.
عايىپقا ءسىڭدى تىرشىلىك, بۇلدىراپ كوزىم الدىندا. جىر جۇرەك قالدى تۇنشىعىپ, جوقپىن با, الدە, بارمىن با؟..
جانىمنىڭ دەرتى ولەڭ - مۇڭ, قول سوزدى بيىككە «مۇڭىم». ...ءتۇس كورىپ جاتقان الەمنىڭ, مەن, مۇمكىن, كەيىپكەرىمىن...
سۇراق
سىنايدى دا ەكەن عوي ءومىر بۇلاي, جىلايدى دا ەكەن عوي كوڭىل قۇلاي. قۇراق كورپە سەكىلدى جۇرەگىمدى, قايتەم سەنى جانشىعان شوگىر مۇڭ-اي؟!
قاناتىمدى شارپىلتىپ كۇيىككە مىڭ, جيىپ كەگىن جالعاننىڭ ءسۇيىپ شەرىن. تابانىمنىڭ استىندا تاپتالدى كەپ, اسپانتەكتەس قول جەتپەس بيىكتەگىم.
كۇيىمدى ۇرلاپ ىرعاقتى كوڭىلدەگى, جىلار شاقتا كوزدەن جاس توگىلمەدى. وزەۋرەگەن وكپەگە قيا-قيا, وگەيسىتىپ جىبەردى ءومىر مەنى.