ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكەن تۇساۋكەسەر راسىمىنە اكادەميك سەيىت قاسقاباسوۆ, پروفەسسور سەرىك نەگيموۆ, تۇركىتانۋشى قارجاۋباي سارتقوجا ۇلى, تاريحشى تۇرسىنحان زاكەن ۇلى جانە ت.ب. زيالى قاۋىم قاتىستى. كەزدەسۋگە ەۇۋ-دەگى دايىندىق بولىمىندە شەتەلدەن كەلىپ وقىپ جاتقان جاستار دا جينالدى.
جيىندى جۇرگىزگەن الاشتانۋشى عالىم ديقان قامزابەك ۇلى اۆتوردىڭ شىعارماشىلىعىنا توقتالىپ, ەڭبەكتەرىن تانىستىردى. «ءجادي شاكەن ۇلى شەكارانىڭ ار جاعىندا وقىپ جەتىلسە دە, بۇكىل پاراساتىن, ەڭبەگىن ەلىنە ارناعان ازامات. «قارالى كوش» رومانىمەن قازاق ادەبيەتىندە ءوز ورىن العان قالامگەردىڭ قازىرگە دەيىن 10-نان اسا كىتابى جارىق كوردى. بۇگىن بايتۇرسىنوۆ الىپبيىندە قايتادان باسىلىپ شىعىپ جاتقان «قارالى كوش» 2016 جىلى تۇرىك تىلىنە اۋدارىلعان. بالالار ادەبيەتىندە دە قالام تەربەگەن جازۋشىنىڭ اڭگىمەلەرى وقۋلىقتارعا ەنگىزىلدى», دەدى د.قامزابەك. فولكلورشى سەيىت قاسقاباسوۆ «قىتاي قازاقتارىنىڭ ادەبيەتىندە» قىزىقتى دەرەكتەر كەلتىرىلگەنىن ايتىپ, قازاق ادەبيەتىنىڭ ءبىر بۇتاعى بولعان قازىنانى تەرەڭدەي زەرتتەۋ الداعى ۋاقىتتىڭ ەنشىسىندە ەكەنىن جەتكىزدى. «بۇل ءبىزدىڭ وقىرماندارعا كوپ ماعلۇمات بەرەدى. قىتايداعى قازاقتاردىڭ رۋحانياتى جايلى ءبىز ءالى تولىق مالىمەت الا الماي ءجۇرمىز. سونىڭ ءبارى جۇيەلى تۇردە زەرتتەلىپ جاتسا قۇبا-قۇپ. ءجاديدىڭ ەڭبەگىن سونىڭ جاقسى باستاماسى دەپ ويلايمىن», دەدى عالىم. «قارالى كوش» سوڭعى جيىرما جىلدىقتا جارىق كورگەن رومانداردىڭ ىشىندەگى سۇبەلىسى ەكەنىن اتاپ وتكەن فيلولوگيا عىلىمدارىنىڭ دوكتورى سەرىك نەگيموۆ: «1999 جىلدان بەرى ناعىز كلاسسيكالىق دارەجەگە كوتەرىلگەن 2-3 روماندى عانا اتار ەدىم. ول رامازان توقتاروۆتىڭ «ابايدىڭ جۇمباعى», قاجىعالي مۇحانبەتقالي ۇلىنىڭ «تار كەزەڭ» روماندارى. سولاردىڭ قاتارىندا تۇرعان وسى – «قارالى كوش». ءجاديدىڭ جازۋشىلىق شەبەرلىگىن وسى روماننان انىق بايقاۋعا بولادى. سول زامانداعى قىتايداعى قازاقتىڭ تاقسىرەتىن كورسەتەتىن ساي سۇيەگىڭدى سىرقىراتار سۋرەتتەۋلەردى وقىعاندا ۇستارانىڭ جۇزىندە, ينەنىڭ ۇشىندا بولعانداي كۇي كەشكەنىم بار. مۇنداي سۋرەتكەرلىكتى ەرەكشە دارىن دەپ ەدىم», دەي كەلىپ 40 بالۋاننىڭ ءومىر تاريحى بەرىلگەن «التاي الىپتارىن» دا ەرەكشە اتاپ ءوتتى.
قازاقستان جازۋشىلار وداعىنىڭ, ەۋرازيا جازۋشىلار وداعىنىڭ مۇشەسى, حالىقارالىق شىڭعىسحان اكادەمياسىنىڭ اكادەميگى ءجادي شاكەن ۇلىنىڭ بۇعان دەيىن «ءبىر ۋىس ساۋلە», «جۇرەك نەگە جىلايدى» سياقتى اڭگىمەلەر جيناعى, بالالارعا ارنالعان «اق بالاپان», «ارمانشىل بالا» كىتاپتارى, ادەبي سىن-زەرتتەۋ تاقىرىبىندا جازىلعان «جالعىزدىڭ ءۇنى» كىتابى جارىق كورگەن.