بالىق ونىمدەرى كوپ جاعدايدا ەلىمىزگە شەت مەملەكەتتەردەن جەتكىزىلەدى. ال جاڭا جوبا بۇل باعىتتاعى يمپورتتىق تاۋارلاردىڭ كولەمىن ازايتىپ, كەرىسىنشە ەكسپورتتىق ۇلەستىڭ كورسەتكىشىن كوتەرۋدى كوزدەيدى.
– ەلباسى نۇرسۇلتان نازارباەۆتىڭ 2018 جىلعى 5 قازانداعى قازاقستان حالقىنا جولداۋىندا بۇل ماسەلە جونىندە بيزنەس پەن سالا وكىلدەرىنە جاۋاپتى مىندەتتەر جۇكتەلگەن. ءبىز تۇڭعىش پرەزيدەنت تاپسىرماسىنا ناقتى ىسپەن جاۋاپ قايتارۋدى قاجەت دەپ تاپتىق. قازىر وسى ونىمگە قىزىعۋشىلىق تانىتىپ وتىرعان تۇتىنۋشىلار ەلىمىزدىڭ ءوز ىشىنەن دە, شەتەلدەردەن دە تابىلادى. ءبىز مۇنداي تۇجىرىمعا ءتيىستى ماركەتينگتىك زەرتتەۋلەر جۇرگىزىلگەننەن كەيىن كەلىپ وتىرمىز, – دەيدى جابىق سۋ سالىنىپ جاتقان زاۋىتتىڭ ديرەكتورى نۇرلان قۇماروۆ.
اتالعان جوبا بيىل ءىىى توقساندا پايدالانۋعا بەرىلمەك. قازىر انالىق بالىقتاردىڭ ءوسىپ-ونۋىنە ارنالعان قۇرىلىس بولىكتەرى تولىقتاي اياقتالعان. وعان افريكالىق انالىق جايىندار اكەلىندى. بالىقتاردى ازىقتاندىرۋ مەن ءوسىرۋ الاڭدارىنىڭ قۇرىلىستارى جۇرگىزىلۋدە. جوبانىڭ جالپى قۇنى 1 ميلليارد 535 ميلليون تەڭگەنى قۇرايدى. ونىڭ 15 پايىزىنا جەكە ينۆەستورلىق قاراجات تارتىلسا, 85 پايىزدىق قوماقتى بولىگى «بيزنەستىڭ جول كارتاسى-2020» باعدارلاماسى شەڭبەرىندە پايىزدىق مولشەردى سۋبسيديالاۋ ارقىلى قارجىلاندىرىلعان. زاۋىت قۇرىلىسى تولىق اياقتالعان كەزدە 42 ادام جاڭا جۇمىس ورنىمەن قامتىلماق. وندىرىستە جىلىنا 1,5-2 مىڭ توننا ءونىم شىعارىلادى.جارقىن جوبا تۋرالى ماتەريال ازىرلەۋ كەزىندە پارلامەنت سەناتىنىڭ دەپۋتاتى مۇحتار جۇماعازيەۆكە جولىعىپ, وي-پىكىرىن سۇراعان ەدىك. سەناتور اقتوبەگە كەلگەن ساپارىندا زاۋىت قۇرىلىسىنىڭ قازىرگى جاي-كۇيىمەن تولىق تانىسىپ شىعىپتى. ونىڭ ايتۋىنشا, «مۇراگەر» جشس قولعا العان جوبا وتاندىق ءونىم تۇرلەرىن كوبەيتۋگە سۇبەلى ۇلەس قوسا الادى.
– ماعان اقتوبە وبلىسىنىڭ اۋىل شارۋاشىلىعىنا قاتىستى ماسەلەلەر جاقسى تانىس. سونىڭ ىشىندە بالىق ءوسىرۋ ءىسىنىڭ جاي-كۇيىنە كەلسەك, وڭىردە ونى كاسىپكە اينالدىرا بىلگەندەر جەتكىلىكتى. ال بالىقتى وسىرۋمەن قوسا وڭدەۋ ءىسى بۇل وبلىستا تۇڭعىش رەت قولعا الىنىپ وتىر, سونىڭ ءىشىندە جايىن ەتى ءوڭىر تۇرعىندارى ءۇشىن تاڭسىق تاعام دەۋگە بولادى. رەسپۋبليكادا تۇقى بالىق پەن بەكىرەنى جابىق سۋ ايدىنىندا وسىرۋشىلەر ءۇشىن مەملەكەت تاراپىنان قارجىلاي كومەك كورسەتىلەدى. مۇنداي سۋبسيديانى جايىن ءوسىرىپ, ونىڭ ەتىن وڭدەۋشىلەر ءۇشىن دە بەلگىلەسە ارتىق ەتپەيدى دەپ بىلەمىن. بالىقتىڭ بۇل ءتۇرىنىڭ توعاندا تەز وسەتىنى دە وسىنداي وڭتايلى شەشىم قابىلداۋعا سەبەپ, – دەدى سەناتار.
بالىق پەن بەكىرە شارۋاشىلىعى دەگەندە ويىمىزعا ەڭ الدىمەن اتىراۋ مەن اقجايىق, كارى كاسپي ورالادى. ەندى مىنە, بۇل اقتوبە ايماعىندا دا قولعا الىندى. ءبىر ايىرماشىلىعى, الدىڭعى اتالعان وڭىرلەردە بالىق نەگىزىنەن تابيعي سۋ ايدىندارىنان اۋلانسا, ءبىزدىڭ وبلىستا بۇل كاسىپ الەمدىك ۇردىستەرگە ساي جابىق سۋ ايدىنىندا جۇرگىزىلەدى. «مۇراگەر» كومپانياسى باستاماشى بولعان بالىق ءوسىرۋ مەن وڭدەۋ ءىسى ەرتەڭ ءىرى دە ىرگەلى كاسىپورىنعا, ءدامدى دە ساپالى بالىق ونىمدەرىن شىعاراتىن الىپ كومبيناتقا اينالاتىنىنا سەنىم مول. اقتوبە