حالىق تاڭداۋىن جاساۋدا ءتورتىنشى بيلىكتىڭ اتقاراتىن ءرولى زور. وسى ورايدا باس رەداكتورلار كلۋبىنىڭ مۇشەلەرى 2019 جىلدىڭ 9 ماۋسىمىندا وتەتىن كەزەكتەن تىس پرەزيدەنتتىك سايلاۋىن اقپاراتتىق تۇرعىدا قامتاماسىز ەتكەندە ەتيكالىق نورمالاردى ۇستانۋ تۋرالى حارتيانى قارادى. باس رەداكتورلار كلۋبىنىڭ ۆيتسە-پرەزيدەنتى مارات باشيموۆ حارتيانىڭ اتا زاڭعا, «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا جانە «بۇقارالىق اقپارات قۇرالدارى تۋرالى» زاڭىنا سايكەس ازىرلەنگەنىن جەتكىزدى. «الەمنىڭ بارلىق ەلىندە بۇقارالىق اقپارات قۇرالدارى ەلدەگى ەلەۋلى وقيعالار كەزىندە ءاردايىم ەتيكالىق نورمالاردى ۇستانۋ تۋرالى حارتيانى ەسكەرەدى. بۇل مىندەتتى تۇردە ورىندالاتىن نورمالار جيىنتىعى بولماعانىمەن, جۋرناليستەردىڭ جۇمىسى بارىسىندا ايرىقشا ەسكەرىلەتىن كاسىبي ەتيكا كورسەتكىشتەرى بولماق», دەي كەلە, كلۋب مۇشەلەرىنە ءوز ويلارىن ورتاعا سالۋدى ۇسىندى. «ەكسپرەسس ك» گازەتىنىڭ باس ديرەكتورى ءادىلحان ءنۇسىپوۆ سايلاۋ ناۋقانى ءادىل, زاڭ اياسىندا ءوتۋ كەرەكتىگىنە توقتالىپ: «البەتتە مۇنداي حارتيانى قولداعان ابزال. جارناماعا جول بەرمەي, وبەكتيۆتى تۇردە جازۋ قاجەت. وسى نورمالاردى قولداۋ ماقساتىندا قۇجاتقا قول قويامىز», دەدى. جينالعان باسقا دا باق باسشىلارى باستامانى قولدايتىنىن ايتىپ, حارتياعا قول قويدى.
ايتا كەتەيىك, اتالعان قۇجاتتىڭ باستى ماقساتى رەتىندە:
- سايلاۋ بارىسىنىڭ بارلىق كەزەڭدەرىن – ورتالىق جانە باسقا سايلاۋ كوميسسيانىڭ قىزمەتى, سايلاۋ كامپانياسىنىڭ نەگىزگى كەزەڭدەرى, پرەزيدەنتتىككە ۇمىتكەرلەر مەن ولاردىڭ سايلاۋ الدىنداعى اكتسيالارى, داۋىس بەرۋ قورىتىندىسىنىڭ ءتارتىبى, بارىسى جانە وتكىزىلۋى تۋرالى باق-تىڭ كاسىبي, وبەكتيۆتى جانە جەدەل تۇردە كورسەتۋى ارقىلى ازاماتتاردىڭ سايلاۋ قۇقىعىنىڭ تولىق ىسكە اسىرىلۋىنا جاردەمدەسۋ;
- قازاقستان رەسپۋبليكاسىنىڭ قولدانىستاعى زاڭناماسىنا ءسايكەس بارلىق تىركەلگەن پرەزيدەنتتىككە ۇمىتكەرلەرگە باق-تا اقپارات بەرۋگە تەڭ رۇقسات بەرۋ;
- سايلاۋ پروتسەسىنىڭ بارىسى مەن ونىڭ ناتيجەلەرى, سونداي-اق بارلىق پرەزيدەنتتىككە ۇمىتكەرلەر مەن ولاردىڭ سايلاۋ شتابتارىنىڭ قىزمەتى, كوزقاراستارى مەن ساياسي ۇستانىمدارى, باعدارلامالارى تۋرالى وتاندىق باق-تىڭ ادەكۆاتتى, تولىق جانە انىق مالىمدەۋىن قامتاماسىز ەتۋ كوزدەلگەن.