جيىن بارىسىندا ۇكىمەت باسشىسىنىڭ ورىنباسارىنا وبلىستاعى ءىرى كاسىپورىنداردىڭ الەۋمەتتىك مىندەتتەردى ورىنداۋ باعىتىندا اتقارىپ جاتقان جۇمىستارى تۋرالى باياندالدى.
– ەگەر 15-20 جىل بۇرىن مەملەكەت شاعىن بيزنەسكە اياعىنان تۇرۋعا كومەكتەسسە, قازىر كەرىسىنشە, بيزنەس مەملەكەت پەن قوعامعا قول ۇشىن بەرۋدە. كاسىپكەرلەردىڭ ينۆەستيتسيالارى وڭىرلەردىڭ الەۋمەتتىك دامۋىنا اسەر ەتە باستادى. بۇعان ەلباسىنىڭ سول كەزدەگى شەشىمى ىقپال ەتتى. ءدال وسىندا, جەزقازعاندا ون جىل بۇرىن ءبىزدىڭ تۇڭعىش پرەزيدەنتىمىز بيزنەستىڭ الەۋمەتتىك جاۋاپكەرشىلىگى تۋرالى ماسەلەنى كوتەرگەن بولاتىن, – دەدى جيىندا قاراعاندى وبلىسىنىڭ اكىمى ەرلان قوشانوۆ.
ەسكە سالساق, 2008 جىلى جەزقازعاندا بيزنەستىڭ الەۋمەتتىك جاۋاپكەرشىلىگى جونىندە ءبىرىنشى فورۋم وتكەن بولاتىن. ەلىمىزدىڭ تۇڭعىش پرەزيدەنتى سول كەزدە وسى تاقىرىپتى العاشقى بولىپ كوتەرىپ, وتاندىق ءىرى كاسىپورىنداردىڭ الەۋمەتتىك جاۋاپكەرشىلىگىن قۇرۋ جونىندە تاپسىرمالار بەرگەن ەدى.
جالپى, قاراعاندى وبلىسىندا بيزنەستىڭ الەۋمەتتىك جاۋاپكەرشىلىگىنە, دەمەۋشىلىككە جانە قايىرىمدىلىق شارالارىنا باسا نازار اۋدارىلادى. بيىل الەۋمەتتىك جوبالار بويىنشا ءىرى كومپانيالارمەن ارادا 48 مەموراندۋمعا قول قويۋ جوسپاردا بار. وسى ماقساتتار ءۇشىن 3 ميلليارد تەڭگەگە جۋىق قارجى قاراستىرىلعانىن دا ايتا كەتكەن ءجون.
جيىندا ءسوز العان گۇلشارا ابدىحالىقوۆا باستى ماقسات بيزنەس وكىلدەرى جانە جۇمىس بەرۋشىلەر تاراپىنان جۇمىسشىلار الدىندا ەڭبەكاقى بويىنشا قارىزدارعا جول بەرمەۋ ەكەندىگىن اتاپ ءوتتى.
– ەكىنشى ماسەلە, جالاقىنى بىرتىندەپ كوتەرۋ. تاعى ءبىر ماڭىزدى ماسەلە – ەڭبەك قاۋىپسىزدىگى. وڭىردەگى ءىرى كاسىپورىنداردا قىزمەتكەرلەر ءۇشىن لايىقتى ەڭبەك شارتتارىن جاساۋ قاجەت. بيزنەستىڭ الەۋمەتتىك جاۋاپكەرشىلىگى جەزقازعان ءۇشىن دە اسا ماڭىزدى, سەبەبى, قازىر مەملەكەت الەۋمەتتىك ماسەلەلەرگە, كوپبالالى جانە از قامتىلعان وتباسىلارعا ەرەكشە كوڭىل بولۋدە. الداعى ءۇش جىلدا الەۋمەتتىك جوبالار مەن باعدارلامالارعا 2,3 ملرد تەڭگە بولىنەدى, – دەدى گۇلشارا ابدىقالىقوۆا.
ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ وڭىردەگى ءىرى كاسىپورىنداردى الەۋمەتتىك جاۋاپكەرشىلىككە باسا نازار اۋدارۋعا شاقىردى. ەڭ باستى مىندەت – جۇمىسسىزدىقتى بولدىرماۋ. ول ءۇشىن ءوندىرىس وشاقتارىندا جۇمىس ورىندارىن ساقتاپ قالۋ كەرەك. سونىمەن بىرگە, كوپبالالى جانە از قامتىلعان وتباسىلاردى قولداۋ ماقساتىنداعى قايىرىمدىلىق جوبالارعا دا ايرىقشا كوڭىل ءبولۋ كەرەكتىگىن اتاپ ءوتتى مينيستر.
– ءبىز ەلىمىز بويىنشا مىڭنان استام ءىرى كاسىپورىندى زەرتتەدىك. ولاردا قانشا كوپبالالى قىزمەتكەرلەر بار جانە ولاردىڭ قانشاسىندا باسپانا جوقتىعىن انىقتادىق. بۇل ماسەلە ۇكىمەت وتىرىسىندا قارالدى. ءبىز كاسىپورىنداردان وسى قىزمەتكەرلەردى ءبىرىنشى كەزەكتە باسپانامەن قامتاماسىز ەتۋدى جانە بالا كۇتىمىنە بايلانىستى ۇيدە وتىرعان كوپبالالى قىزمەتكەرلەردى, مۇگەدەك بالالاردى اسىراپ وتىرعان انالاردى قولداۋدى سۇرايمىز, – دەدى ب.ساپارباەۆ.
ءوڭىردىڭ شاعىن جانە ورتا بيزنەس وكىلدەرى جىل سايىن كوپبالالى وتباسىلارعا, مۇگەدەكتەرگە, ۇوس ارداگەرلەرىنە 100 ملن تەڭگەگە جۋىق قارجىعا اتاۋلى الەۋمەتتىك كومەك كورسەتەتىنىن دە ايتا كەتكەن ءجون. بۇدان بولەك, دەمەۋشىلەر مەن مەتسەناتتاردىڭ كومەگى ارقاسىندا سوڭعى ەكى ايدىڭ ىشىندە الەۋمەتتىك از قامتىلعان 10 وتباسى باسپانالى بولدى.
قاراعاندى وبلىسى,
جەزقازعان قالاسى