2019 جىلعى 16 ساۋىردەگى ۇكىمەت وتىرىسىنداعى يندۋستريا جانە ينفراقۇرىلىمدىق دامۋ ءمينيسترى شيكىزاتتىق ەمەس ەكسپورتتى ىلگەرىلەتۋ ماسەلەسى بويىنشا مالىمدەمە جاسادى.
يندۋستريالدى دامۋ مەملەكەتتىك باعدارلاماسى اياسىندا 2018 جىلى ىسكە قوسىلىپ, ەكسپورتقا باعىتتالعان جاڭا وندىرىستەر بيۋدجەتى 458 ملن اقش دوللارىن قۇراعان. شىعارىلاتىن ءونىمنىڭ 50%-ءتى ەكسپورتقا باعىتتالعان.
«ەكسپورتقا باعىتتالعان جوبالاردى 500 ملرد تەڭگە قارجىمەن قولداۋ ەكسپورتتىڭ وسۋىنە وڭ ىقپال ەتەدى» دەدى مينيستر.
ءمينيستردىڭ اقپاراتىنا سۇيەنسەك, الەمدىك نارىقتارداعى تۇتىنۋ مەن سۇرانىستىڭ ءوسۋىن ەسكەرە وتىرىپ, بيىل بىرقاتار سالالارداعى تاۋارلار ەكسپورتى كولەمىنىڭ ءوسۋى كۇتىلىپ وتىر. ولار:
- ترانسفورماتورلاردى, اككۋمۋلياتورلار مەن مويىنتىرەكتەردى ەكسپورتتاۋدى ۇلعايتۋ ەسەبىنەن ماشينا جاساۋ;
- فەرروقورىتپالار مەن بولات قۇبىرلارىن ءوندىرۋدى ۇلعايتۋ ەسەبىنەن مەتاللۋرگيا;
- سونداي-اق حيميا جانە جەڭىل ونەركاسىپ سالالارى.