ون جىلدان بەرى الەمدە كەڭ تاراپ كەلە جاتقان «PechaKucha» العاش رەت توكيودا 2003 جىلى ۇيىمداستىرىلعان. كەيىن سان-فرانتسيسكو, امستەردام, مەلبۋرندە جالعاسىن تاپقان. لوندوندا وتكەن «PechaKucha»-عا ەكى مىڭ ادام قاتىسقان. ال ەلىمىزدە اتالعان فورماتتاعى باسقوسۋ 4 جىلدان بەرى وتكىزىلىپ كەلەدى ەكەن. وسى ۋاقىتتا ءوزىنىڭ بەلگىلى ءبىر اۋديتورياسىن دا قالىپتاستىرىپ ۇلگەرىپتى.
مينيسترلىك قولداعان وسى جولعى شاراعا 100-گە جۋىق تىڭداۋشى كەلدى. ۇيىمداستىرۋشىلاردىڭ ايتۋىنشا, ادەتتە 400-500 ادامنان جينالادى, ءتىپتى كەي كەزدەرى ءبىر كينو زالى تولاتىن كورىنەدى. وسى جولعى از جينالۋىنىڭ سەبەبىن ولار كەلۋشىلەردىڭ ۇنەمى ءوتىپ وتىراتىن كۇنىنە ۇيرەنىپ قالۋىمەن ءتۇسىندىردى. قازاقستان كاسىپوداقتار فەدەراتسياسى وقۋ ورتالىعىنىڭ ديرەكتورى, باس قالاداعى «PechaKucha»-نىڭ ۇيىمداستىرۋشىسى نۇرلان دوسىم بۇل جيىندى ۇيىمداستىرۋدا 20 سانىنىڭ ايرىقشا ءمانى بار ەكەنىن جەتكىزدى. ماسەلەن, ەلورداداعى «PechaKucha» ءار ايدىڭ 20-دا 20 ساعات 20 مينۋتتا باستالادى. «جاپوندار ءۇشىن 20 سەكۋند التىن ۋاقىت سەكىلدى. ءويتكەنى ولار وسى ۋاقىت ىشىندە ءبىر ەسەپتى شىعارىپ, ول بىتكەندە جىلدام كەلەسىسىنە ءوتىپ وتىرادى. «PechaKucha»-دا دا سپيكەرگە 20 سلايدتان تۇراتىن پرەزەنتاتسياسىنىڭ ءار پاراقشاسىن تۇسىندىرۋگە نەبارى 20 سەكۋند بەرىلەدى. ودان كەيىن كەلەسى بەت اشىلىپ كەتەدى», دەيدى ۇيىمداستىرۋشى ن.دوسىم. ونىڭ ايتۋىنشا, ءار سپيكەرگە بەرىلگەن ۋاقىت شەكتەۋلى بولعانىمەن, بايانداماسى ءبىتكەننەن كەيىن سۇراقتارعا جاۋاپ بەرىپ, تىڭداۋشىلارمەن ەركىن ديالوگقا تۇسە الادى. «ءبىز بۇل شارانى تەك ادامدار ءۇشىن جاسايمىز. كوڭىلدى نەمەسە دەمالاتىن جەر ىزدەگەن جاستار تۇنگى كلۋبقا, بولماسا قۇمار ويىندارعا بارماي, ىستىق كوفە, ءتۇرلى تاتتىلەردەن ءدام تاتا وتىرىپ وسىنداي ويلى ورتا قالىپتاستىرعانىن قالايمىز. بارلىعى – تىڭداۋشىلارعا تەگىن. ولار بوس ۋاقىتىن ءتيىمدى ءوتكىزسە, جەتىستىككە جەتكەن جانداردىڭ ويىن, جاڭا يدەيالارىن تىڭداسا, ءبىر-بىرىمەن اڭگىمەلەسىپ, سىرلاسسا, دوس, يدەيالاس, سەرىكتەس ادام تاپسا دەپ ۇيىمداستىرامىز», دەيدى ن.دوسىم.
«PechaKucha» ساحناسىندا قوعام قايراتكەرلەرى, كاسىپكەرلەر, سپورتشىلار, شىعارماشىلىق ادامدارى ءسوز سويلەيدى. وسى جولعى جيىندا دا ءار سالادا جەتىستىككە جەتكەن جاندار بىلگەنىمەن ءبولىستى. «100 جاڭا ەسىم» جوباسىنىڭ جەڭىمپازى ءامىر قۋات «عىلىم جەڭەدى» اتتى پرەزەنتاتسياسى ارقىلى ءوز ويىن ورتاعا سالدى. ول ادامدى عىلىمي تۇرعىدان تابىستى ەتەتىن ءدۇنيە تۋرالى ايتتى. ال «داۆاي سحوديم» جوباسىنىڭ اۆتورى باقداۋلەت يساەۆ كاسىپتى نولدەن باستاپ, قالاي دوڭگەلەتىپ اكەتۋگە بولاتىنىن باياندادى. توعىز تىلدە ءسويلەي الاتىن ساياسات نۇربەك «قازاقستانداعى جاڭا ماماندىقتاردىڭ اتلاسى» اتتى پرەزەنتاتسياسىندا بولاشاقتى بارلاپ, جاستاردىڭ قاي سالاعا بەت بۇرۋى كەرەكتىگىن حالىقارالىق زەرتتەۋلەر ءناتيجەسى ارقىلى كورسەتتى. كوفە-برەيكتەگى ۇزىلىستەن كەيىن يتاليادا وتكەن IronMan سۋپەرمارافونىنىڭ جەڭىمپازى دياس دۇيسەبەكوۆ جەتىستىك فورمۋلاسىمەن تىڭداۋشىلاردى شابىتتاندىردى. ال رەسەيلىك شوۋ-بيزنەس جۇلدىزدارىنا بەينەبايان ءتۇسىرىپ جۇرگەن قۇدايبەرگەن ەسكەنوۆ تابىس تابۋمەن قوسا تانىمالدىققا يە بولۋدىڭ قىر-سىرىمەن ءبولىستى. «100 جاڭا ەسىم» جوباسىنىڭ جەڭىمپازى, حورەوگراف انۆارا سادىقوۆا ەرەكشە دارىنىمەن جانە ءوزىن ءوزى جەڭە الاتىن قاسيەتىمەن تىڭدارمانداردى ءتانتى ەتىپ, كوركەم بيىمەن كەشتىڭ شىمىلدىعىن جاپتى.