كورمەنىڭ اشىلۋ سالتاناتىنا قر ۇلتتىق مۋزەيىنىڭ ديرەكتورى ا. نۇرازحان, وزبەكستانداعى قازاقستاننىڭ توتەنشە جانە وكىلەتتى ەلشىسى د. ساتىبالدى, وزبەكستان رەسپۋبليكاسى مادەنيەت ۆيتسە-ءمينيسترى ك. اكيلوۆا, وزبەكستان مەملەكەتتىك ونەر مۋزەيىنىڭ ديرەكتورى ۆ. فايزيەۆا قاتىستى.
كورمە اشىلار الدىندا بۇقارالىق اقپارات قۇرالدارى وكىلدەرى ءۇشىن ەكى مەملەكەتتىڭ رەسمي وكىلدەرىنىڭ قاتىسۋىمەن ءباسپاسوز وتىرىسى ۇيىمداستىرىلدى.
شارادا قازاقستان مەن وزبەكستان اراسىنداعى ىنتىماقتاستىق قارىم-قاتىناستى نىعايتۋ ماقساتىندا مۋزەيلەردىڭ مادەني بايلانىسىنىڭ ماڭىزى تۋرالى جان-جاقتى ءسوز قوزعالدى.
« ۇلى دالا: تاريح جانە مادەنيەت» كورمەسىنىڭ ماقساتى — قازاقستاننىڭ تاريحي-مادەني باي مۇراسىمەن تۇرعىنداردى تانىستىرۋ.
بۇل كورمە جوباسى بەلارۋس, ازەربايجان, رەسەي, قىتاي, پولشا, وڭتۇستىك كورەيا, تاتارستان رەسپۋبليكاسى سەكىلدى ەلدەردە تابىستى وتكىزىلگەن. «التىن ادام» كورمەسىن اتالعان ەلدەردە ميلليوننان استام كورەرمەن تاماشالادى. جوبا ءۇش جىل ىشىندە ىسكە اسىرىلادى, 2020 جىلدىڭ سوڭىنا دەيىن كورمە الەمنىڭ 20 جۋىق ەلىندە وتكىزىلەدى. اتالعان كورمە بيىل مالايزيا, يتاليا, تۇركيا جانە گرۋزيا مۋزەيلەرىندە ۇيىمداستىرىلماق. ال كەلەر جىلى اقش, اۆستريا, فرانتسيا, شۆەيتساريا مەن گەرمانيانىڭ مۋزەيلەرىندە وتكىزىلەدى.
كورمەنىڭ سالتاناتتى اشىلۋىندا قر ۇلتتىق مۋزەيىنىڭ ديرەكتورى الماز نۇرازحان قازاقستاندىقتاردى شاقىرتىپ, ىستىق ىقىلاسپەن قابىلداعان وزبەكستان مەملەكەتتىك ونەر مۋزەيىنىڭ ۇجىمىنا العىسىن ءبىلدىردى.
«التىن ادامنىڭ الەم مۋزەيلەرىنە شەرۋى» كورمە جوباسى تۇڭعىش پرەزيدەنت – ەلباسى ن. نازارباەۆتىڭ “رۋحاني جاڭعىرۋ” باعدارلاماسى اياسىندا قولعا الىنعان بولاتىن. بۇگىن, مىنە, جەتىنشى مەملەكەتكە تابان تىرەدىك. وزبەكستاندىقتار بىزگە جات ەمەس, تاريح, مادەنيەت, سالت-ءداستۇر, ءدىني ۇعىمدارىمىز ورتاق قالىپتاسقاندىقتان, بۇگىنگى كورمە سىزدەرگى قىزىقتى بولادى دەپ ويلايمىن», — دەدى ا. نۇرازحان.
وزبەكستان مەملەكەتتىك ونەر مۋزەيىندەگى كورمەگە كيىمى التىن, ال باس كيىمى جەبە, قار بارىسى, ارقار, جىلقى جانە قۇس بەينەسىندەگى التىنمەن اشەكەيلەنگەن «التىن ادامنىڭ» رەكونسترۋكتسياسى ۇسىنىلىپ وتىر. سونىمەن قاتار اتالعان كورمەدەن ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب.د.د V-IV عع.) ارحەولوگيالىق ولجالارىنىڭ كوللەكتسياسىن تاماشالاۋعا بولادى.
«التىن ادام» — 1960–1970-جىلدارى الماتىنىڭ ماڭايىندا تانىمال ارحەولوگ كەمال اقىشەۆ زەرتتەپ جۇرگەن ەسىك قورعانىنان تابىلعان قازاقستان رەسپۋبليكاسىنىڭ سيمۆولى. ەجەلگى دالا بيلەۋشىسىنىڭ تاجىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالدى, ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلدى.كورمەدە سول سياقتى تاقساي (باتىس قازاقستان وبلىسى), تالدى-2 (قاراعاندى وبلىسى) جانە بەرەل (شىعىس قازاقستان وبلىسى) سىندى ساق قورعاندارىنان تابىلعان ارحەولوگيالىق بىرەگەي ولجالار دا كورسەتىلدى. ەسىك قورعانىنان تابىلعان زاتتار اراسىندا ەجەلگى جازبا ەسكەرتكىشتەرىنىڭ ءبىرى رۋنا جازۋمەن جازىلعان جازباسى بار كۇمىس توستاعاننىڭ ەكسپوزيتسيادان الار ورنى ەرەكشە.
كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 127 زات ۇسىنىلدى. كورمەگە ۇسىنىلعان قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى — بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن, بۇرىنعى ءداۋىردىڭ ەسىمدەرى بەلگىسىز شەبەرلەرى جاساعان عاجاپ تۋىندىلاردىڭ از عانا بولىگى.