قاراعاندى وبلىسىنداعى شەت اۋدانىندا كۇن ەلەكتر ستانساسىنىڭ قابىرعاسى قالانا باستادى. اقادىر ەلدى مەكەنىنىڭ ماڭىندا بوي كوتەرەتىن بۇل نىساننىڭ قۇرىلىسى بيىلعى جىلدىڭ ماۋسىم ايىندا اياقتالادى دەپ جوسپارلانعان.
جوبالىق قۇنى 55 ميلليون ەۋرو بولاتىن بولاشاق كۇن ەلەكتر ستانساسىنىڭ اۋماعى 120 گەكتار جەردى الىپ جاتىر. ونىڭ قۋاتتىلىعى 50 مۆت قۇرايدى. كەلىسىمشارتقا ساي, العاشقى ەلەكتر ەنەرگياسى 30 ماۋسىمدا وندىرىلە باستايدى. قازىرگى تاڭدا ەلەكتر قۋاتىنا قوسىلۋ جۇمىستارى جۇرگىزىلۋدە. جاقىن ارادا مۇندا 150 مىڭ پانەل مەن قۋاتتى قوسالقى ستانسالار جەتكىزىلۋى ءتيىس.
– جۇمىس كەستە بويىنشا جۇرگىزىلۋدە. «KEGOC» قوسالقى ستانسالارىنان ءبىزدىڭ قوسالقى ستانسالارعا دەيىنگى بۇل جەلى بىرنەشە كۇننەن كەيىن دايىن بولادى. ءبىز ءۇشىن بۇل جوبانى وسى جىلدىڭ 30 ماۋسىمىندا اياقتاۋ وتە ماڭىزدى, – دەيدى ينۆەستور كومپانيا – «SES Saran» جشس-ءنىڭ باس ديرەكتورى ەۆگەني گرەبەننيكوۆ.