ەكى جىلدىڭ جەمىسىن تارازىلاعان جيىن

ەكى كۇنگە سوزىلعان كونفەرەنتسيا جۇمىسىنا يتاليا, رەسەي جانە ەلىمىزدىڭ عالىمدارى مەن ساراپشىلارى قاتىستى. 

عىلىمي جيىننىڭ مودەراتورى ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ رەكتورى, بيولوگيا عىلىمدارىنىڭ كانديداتى, قاۋىمداستىرىلعان پروفەسسور نۇرلان سەرعاليەۆ ءوزىنىڭ كىرىسپە سوزىندە «بولاشاققا باعدار: رۋحاني جاڭعىرۋ» باعدارلاماسىنىڭ قوعام ساناسىن دامىتۋعا قوسقان ۇلەسى تۋرالى ايتا كەلىپ, وسى باعدارلاما اياسىندا ءبىر عانا باتىس قازاقستان وبلىسى اۋماعىندا 1 مىڭنان اسا ءىس-شارا وتكەنىن حابارلادى. بۇل ىسكە قالتالى كاسىپكەرلەرمەن قاتار قاراپايىم اۋىل ازاماتتارى دا جاپپاي ۇلەس قوسقان. ەكى جىل ىشىندە اتقارىلعان يگىلىكتى ىستەردى قارجىعا شاقساق, 3 ملرد تەڭگەگە جۋىقتايدى ەكەن. ياعني وسىنداي قارجىعا 892 جوبا جۇزەگە اسقان.

- جەكەلەگەن ادامداردىڭ كومەگىمەن قازتالوۆ اۋدانىندا اكۋشەرلىك-امبۋلاتوريالىق پۋنكت, شىڭعىرلاۋ اۋدانىندا كوپىر سالىندى. دارىگەرلىك نىساننىڭ ارقاسىندا قانشاما اۋىل تۇرعىنىنىڭ تۇرمىس ساپاسى جاقسارسا, كوپىر قۇرىلىسى پايدالانۋعا بەرىلگەن سوڭ بىرنەشە اۋىل جول بەينەتىنەن قۇتىلدى. تابيعاتتىڭ كوكتەم مەن كۇز سەكىلدى جاعدايسىز ۋاقىتىندا ۇلكەن جەرمەن قاتىناس ءۇزىلىپ, وقشاۋ قالاتىن اۋىلدىڭ تالاي جىلعى ماسەلەسى وسىلاي شەشىلدى. ءبىز ەلىن سۇيگەن, تۋعان اۋىلىنا جاردەم قولىن سوزعان كاسىپكەر ازاماتتارعا العىس ايتامىز, - دەدى باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ.

«رۋحاني جاڭعىرۋ» باعدارلاماسى التى باعىت, ءتورت كىشى باعدارلامادان تۇرادى.

PhD دوكتورى, يتالياندىق ارحەولوگ جان-لۋكا بونورا ءوز سوزىندە قازاقستاندا الەمگە سىرىن اشپاعان قۇندى قازىنالار كوپ ەكەنىن اتاپ ايتتى. شەتەلدىك عالىم ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىندە ءبىلىم الىپ جاتقان بولاشاق تاريحشى-ارحەولوگتارمەن بىرلەسە تىڭ جوبانى جۇزەگە اسىرماق جوسپارىن ورتاعا سالدى.

- ءبىز كونەدەن كەلە جاتقان كاسپي تەڭىزى جاعالاۋىن مەكەندەگەن ءتۇرلى حالىقتاردىڭ تۇرمىس-تاريحىن ءار داۋىرگە ساي زەرتتەيمىز. الدىمىزدا اۋقىمدى جۇمىس كۇتىپ تۇر. تابىلعان جادىگەرلەرگە جان-جاقتى تالداۋ جاسالادى. وسى ارقىلى ءبىز ارحەولوگ مامانداردىڭ جاڭا بۋىنىن قالىپتاستىرامىز, - دەيدى جان-لۋكا بونورا.

باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پەداگوگيكا فاكۋلتەتى عىلىم ءبولىمىنىڭ جەتەكشىسى, فيلولوگيا عىلىمدارىنىڭ دوكتورى, پروفەسسور مۇرات سابىر ورال قالاسىندا زاماناۋي كىتاپحانا جوقتىعىنا قىنجىلىس ءبىلدىردى. جۇبان مولداعاليەۆ اتىنداعى باتىس قازاقستان وبلىستىق عىلىمي-كوپشىلىك كىتاپحانا ءحىح عاسىردا سالىنعان كونە عيماراتتا ورنالاسقان. ول جەردە وقىرماننىڭ بۇگىنگى تالابىنا ساي قىزمەت كورسەتۋ مۇمكىن ەمەس. عالىمنىڭ پىكىرىنشە, قازاقستاننىڭ باتىس وڭىرىندە ەڭ ناشار كىتاپحانا ورال قالاسىندا.

- ءبىز عىلىم مەن بىلىمگە جاستاردى شاقىرامىز دەيمىز. بىراق كەشكى ساعات 6-دان كەيىن جابىلىپ قالاتىن, ىشىندە اسحاناسى جوق كىتاپحانامەن عىلىمعا جاستاردى قىزىقتىرا المايمىز. مىسالى, تۇركيادا 24 ساعات قىزمەت كورسەتەتىن كىتاپحانالار بار. ستۋدەنتكە ارزان تاماق ۇسىناتىن, ىشىندە قونىپ قالۋعا بولاتىن, ەلەكتروندى ەسەپ ارقىلى كىتاپحاناعا ەڭ كوپ كەلەتىن وقىرماندى انىقتاپ, وعان جەكە ۇستەل ۇسىنىپ, ءتىپتى ارنايى ستيپەنديا تاعايىندايتىن كىتاپحانالار بىزدە دە بولۋى كەرەك, - دەيدى مۇرات بوكەنباي ۇلى.

بۇدان كەيىن ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ دوكتورى ابات قىدىرشاەۆ, ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى جاڭابەك جاقسىعاليەۆ, باتىس قازاقستان وبلىستىق «زامان» وندىرۋشىلەر قاۋىمداستىعى قوعامدىق بىرلەستىگىنىڭ توراعاسى ايگۇل تۇركينا جانە باسقالارى ءسوز سويلەپ, وزدەرىن تولعاندىرعان ماسەلەلەردى ورتاعا سالدى. كونفەرەنتسيا قورىتىندىسىندا قارار قابىلداندى.

سۋرەتتى تۇسىرگەن رافحات حالەلوۆ

باتىس قازاقستان