قوس مەرەيتويعا قابات كەلگەن, ياعني ەۋرازيالىق باستامامەن بىرگە ەۋرازيالىق ەكونوميكالىق وداقتىڭ قۇرىلۋىنىڭ بەس جىلدىعىنا ورايلاستىرىلعان جيىندا ەلباسى ن.نازارباەۆتىڭ جانە رەسەي پرەزيدەنتى ۆ.ءپۋتيننىڭ قۇتتىقتاۋى جاريالاندى. قۇتتىقتاۋلاردى قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى دارحان كالەتاەۆ پەن رەسەي فەدەراتسياسى پرەزيدەنتى باسقارماسىنىڭ شەتەلدەرمەن ايماقارالىق جانە مادەني بايلانىستار جونىندەگى باستىعى ۆلاديمير چەرنوۆ وقىپ بەردى.
قۇتتىقتاۋ حاتتا ەلباسى: «مەن 1994 جىلى ماسكەۋ مەملەكەتتىك ۋنيۆەرسيتەتىنىڭ قابىرعاسىندا العاش رەت ينتەگراتسيالىق جوبانى قۇرۋ يدەياسىن جاريا ەتتىم. سول ساتتە مۇنداي ءبىرلەستىكتى قۋاتتى ەكونوميكالىق وداق رەتىندە تانىدىم, ول ەكونوميكانىڭ دامۋى ءۇشىن تۇراقتى جاعداي جاساۋعا جانە ازاماتتاردىڭ ءال-اۋقاتى ءۇشىن جاڭا مۇمكىندىكتەر جاساۋعا ىقپال ەتەدى. بۇگىن بۇل يدەيا شىندىققا اينالدى. بيىل ەۋرازيالىق ەكونوميكالىق وداق تۋرالى شارتقا قول قويىلعان ءساتتەن باستاپ بەس جىل جانە ەۋرازيالىق ينتەگراتسيا يدەياسىنا 25 جىل», دەپ اتاپ وتكەن. سونداي-اق ن.نازارباەۆ جاقىن بولاشاقتا ەاەو-نى الەمدىك ەكونوميكالىق جۇيەدە ەۋروپا مەن ءوسىپ كەلە جاتقان ازيا اراسىنداعى سەنىمدى كوپىر رەتىندە كورەتىنىن جەتكىزگەن. ونىڭ ايتۋىنشا, ەكونوميكالىق ينتەگراتسيا بويىنشا كۇش-جىگەر ءارتاراپتاندىرۋ مەن ەكونوميكانى ءوسۋدىڭ, باسەكەگە قابىلەتتىلىكتى نىعايتۋدىڭ, بيزنەس-احۋالدى جاقسارتۋدىڭ جانە ءبىزدىڭ مەملەكەتتەرىمىزدىڭ ينۆەستيتسيالىق تارتىمدىلىعىن ارتتىرۋدىڭ نەگىزگى كوزىنە اينالۋعا قابىلەتتى. قۇتتىقتاۋ حاتتاعى ءسوزىنىڭ سوڭىن ەلباسى: «كونفەرەنتسيا بارىسىندا ازىرلەنگەن ۇسىنىستار مەن باستامالار ءبىزدىڭ مەملەكەتتەر اراسىنداعى ديالوگتى دامىتۋ يگىلىگىنە قىزمەت ەتەتىنىنە سەنىمدىمىن», دەپ كونفەرەنتسيا قاتىسۋشىلارىنا تابىس تىلەگەن.
ال ۆ.پۋتين قۇتتىقتاۋ سوزىندە ەۋرازيالىق كەڭىستىك ەلدەرى وتكەن عاسىردىڭ شيرەگىندە تەڭ قۇقىقتى مەملەكەتتەردى بىرىكتىرۋ يدەياسىنان تابىستى ارەكەت ەتەتىن ەكونوميكالىق وداققا جول تارتقانىن تىلگە تيەك ەتكەن. «ەۋرازيالىق ينتەگراتسيا جوباسى ءوزىنىڭ تيىمدىلىگىن تولىعىمەن دالەلدەدى. شەكارالىق جانە وڭىرارالىق ىنتىماقتاستىقتى قارقىندى دامىتۋ, سونداي-اق ءتۇرلى سالالارداعى جوبالاردى بىرلەسىپ دامىتۋ جالعاسىن تاۋىپ كەلەدى. بۇدان بولەك, ەۋرازيالىق ەكونوميكالىق وداق شەڭبەرىندەگى ينتەگراتسيالىق پروتسەستەر رەسەي مەن قازاقستان اراسىنداعى قارىم-قاتىناستار مەن وداقتاستىقتى نىعايتۋعا قوسىمشا مۇمكىندىك بەرەدى», دەلىنگەن رەسەي پرەزيدەنتىنىڭ قۇتتىقتاۋ حاتىندا.كونفەرەنتسيا ءۇش سەسسيادان تۇردى. «نۇرسۇلتان نازارباەۆتىڭ ەۋرازيالىق باستاماسى: يدەيالار جانە ىسكە اسىرۋ جولدارى» اتتى العاشقى سەسسيادا ەكى ەلدىڭ ىنتىماقتاستىعىن ارتتىرۋ باعىتىنداعى سالەمدەمەلەر مەن قۇتتىقتاۋلار جولداندى. جوعارىدا اتالعان قۇتتىقتاۋلاردى ەكى ەلدىڭ لاۋازىمدى تۇلعالارى, ۋنيۆەرسيتەت وكىلدەرى, جاۋاپتى ۆەدومستۆو باسشىلارى جالعادى. ال «ەۋرازيالىق ەكونوميكالىق وداق: XXI عاسىردىڭ سىن-قاتەرلەرى, تيىمدىلىك فاكتورلارى جانە حالىقارالىق مارتەبەنى ارتتىرۋ» اتتى پانەلدىك سەسسياسىندا قوس مەملەكەت ساراپشىلارى بايانداما جاسادى. ايتالىق, «استانا» حالىقارالىق عىلىمي كەشەنى ەۋروپالىق جانە امەريكاندىق زەرتتەۋلەر ورتالىعىنىڭ باسشىسى مۇرات لاۋمۋلين ەاەو اياسىندا ەۋرازيالىق ينتەگراتسيانىڭ قايشىلىقتارى مەن مۇمكىندىكتەرى تاقىرىبىن تارقاتسا, رەسەي سىرتقى ىستەر مينيسترلىگى مەملەكەتتىك حالىقارالىق قاتىناستار ينستيتۋتىنىڭ پرورەكتورى ەۆگەني كوجوكين ەۋرازيالىق باستامانىڭ وتكەنى, بۇگىنى مەن بولاشاعىن باياندادى.
اتالعان پانەلدىك سەسسيالاردىڭ اياسىندا قاتىسۋشىلار ءححى عاسىردىڭ سىن-قاتەرلەرى الدىندا ەاەو-نىڭ ءتيىمدىلىگى مەن حالىقارالىق مارتەبەسىن ارتتىرۋ, حالىقارالىق كەڭىستىكتىڭ زاماناۋي جۇيەسىندەگى ۇلكەن ەۋرازيانىڭ ءرولى, ەۋرازيالىق كەڭىستىكتەگى ەكونوميكالىق ينتەگراتسيانىڭ پەرسپەكتيۆالىق باعىتتارى سىندى ماسەلەلەر بويىنشا پىكىر الماستى.
سونىمەن قاتار كونفەرەنتسيا بارىسىندا رەسەي فەدەراتسياسى قوعامدىق پالاتاسى مەن قازاقستان ازاماتتىق اليانسى اراسىنداعى ىنتىماقتاستىق تۋرالى مەموراندۋمعا سالتاناتتى قول قويۋ ءراسىمى بولىپ ءوتتى.
ايتا كەتەيىك, ەۋرازيالىق ەكونوميكالىق وداق, قازاقستان مەن رەسەي پارلامەنتتەرى, پرەزيدەنتتەر اكىمشىلىكتەرى, سىرتقى ساياسات ۆەدومستۆولارىنىڭ باسشىلارى, قازاقستان استاناسىندا ورنالاسقان شەتەل ديپلوماتيالىق ميسسيالارىنىڭ باسشىلارى, ەۋرازيالىق ەكونوميكالىق وداققا مۇشە مەملەكەتتەردىڭ جەتەكشى ساراپشىلارى مەن قوعام قايراتكەرلەرىن قوسقاندا شاراعا 300-گە جۋىق ادام قاتىستى.