دجۋليان اسسانج 2012 جىلدان بەرى ەكۆادوردىڭ لوندونداعى ەلشىلىگىندە تىعىلىپ كەلگەن ەدى. وعان شۆەتسيا تاراپى جىنىستىق قارىم-قاتىناسقا تۇسۋگە كۇشتەدى دەپ ايىپ تاققان-تۇعىن. سونداي-اق ۇلىبريتانيا اسسانجدى تۇتقىنداۋعا شەشىم قابىلداعان بولاتىن. كەيىنىرەك شۆەتسيا وعان تاعىلعان ايىپتى نەگىزسىز دەپ تاپقان. ايتسە دە, بريتان كورولدىگى ونى قاماۋعا الۋ تۋرالى شەشىمدى وزگەرتكەن جوق.
«اسسانج لوندوننىڭ ورتالىق پوليتسيا ۋچاسكەسىنە اكەلىندى. ول ۆەستمينستەر ماگيستراتتىق سوتىنىڭ الدىنا بارعانشا سوندا بولادى», دەپ مالىمدەدى مەتروپوليتان پوليتسياسى.
ءوز كەزەگىندە ەكۆادور پرەزيدەنتى لەنين مورەنو تۋيتتەردەگى پاراقشاسىندا نەلىكتەن دجۋليان اسسانجدى بوسقىن رەتىندە تانۋدان باس تارتقانىن ءتۇسىندىردى.
«دجۋليان اسسانج حالىقارالىق كونۆەنتسيا مەن كۇندەلىكتى پروتوكولدى قايتا-قايتا بۇزعانى ءۇشىن دەربەس شەشىم رەتىندە ەكۆادور وعان بوسقىن مارتەبەسىن بەرۋدەن باس تارتتى», دەپ جازدى ول.
The Guardian باسىلىمىنىڭ مالىمەتىنە سۇيەنسەك, وسىدان ەكى اي بۇرىن Wikileaks سايتىندا ەكۆادور پرەزيدەنتى لەنين مورەنو مەن ونىڭ وتباسىنىڭ سىبايلاس جەمقورلىققا, كۇشتەپ اقشا تارتىپ الۋعا قاتىسى بار ەكەنى جاريالانعان. سونداي-اق جەكە سۋرەتتەرىن دە تاراتقان. الايدا ەل پرەزيدەنتى تاعىلعان ايىپتاردى جوققا شىعاردى.
Wikileaks سايتى 2006 جىلى قۇرىلعان بولاتىن. سودان بەرى وندا جاسىرىن اقپارات بەرۋشىلەردەن الىنعان قۇپيا قۇجاتتار جاريالانىپ كەلەدى. اسىرەسە, 2010 جىلى يراكتاعى جانە اۋعانستانداعى اقش-تىڭ اسكەري وپەراتسيالارى تۋرالى قۇجاتتار الەمدى ءدۇر سىلكىندىردى. بۇدان بولەك, گۋانتانامو تۇرمەسىندەگى جاعداي تۋرالى مالىمەتى دە الەم نازارىن اۋداردى.