«كەلەر جىلدان باستاپ «بيۋدجەتكە قاتىسۋ» پيلوتتى جوباسىن باستاۋدى ۇسىنامىن, مۇندا ءار اۋدانعا ناقتىلى سوما اۋدارىلادى, ال ونى تۇرعىنداردىڭ وزدەرى ماڭىزدى باعىتتار بويىنشا بولەتىن بولادى», - دەپ مالىمدەدى قالا اكىمى باۋىرجان بايبەك.
«بيۋدجەتكە قاتىسۋ» جوباسى بويىنشا قالا تۇرعىندارىنىڭ ۇسىنىسى «Open Almaty» جۇيەسى ارقىلى قابىلدانادى. جۇيەدە اقپارات جاريالانعاننان كەيىن داۋىسقا سالۋ ارقىلى ۇزدىكتەر انىقتالادى. جالپى قالا اۋداندارىنا بولىنەتىن قارجى قالا بيۋدجەتىنىڭ ءبىر پايىزىن قۇرايدى, بۇل شامامەن 4 ملرد. تەڭگە.
قازىرگى كەزدە الماتى اكىمدىگى وزىق تاجىريبەلەر نەگىزىندە ءتيىمدى ءارى ۇنەمدى جۇمساۋ قاعيداسى بويىنشا بيۋدجەت شىعىندارىن وڭتايلاندىرۋدا. «نۇر وتان» پارتياسىنىڭ فراكتسياسىمەن بىرگە بيۋدجەت شىعىندارىنا قوسىمشا ساراپتاما جۇرگىزىلدى, سوندىقتان قوعامدىق كەڭەستىڭ قاراۋىنا تاعى 7 ميلليارد تەڭگەدەن استام قارجىنى قىسقارتۋ ۇسىنىلادى. قالا اكىمىنىڭ ايتۋىنشا, بۇۇ-نىڭ ۇسىنىستارىنا سايكەس دامىعان ەلدەردىڭ بيۋدجەتى وسىلايشا 0,5% دان 1%-عا دەيىنگى كولەمدە جاساقتالادى. مۇنداي باستاما لوندوندا, ريمدە, بەرليندە, پاريجدە, ماسكەۋدە ەنگىزىلگەن.
«ءبىز ءۇشىن قوعامدىق پىكىردى ەستۋ عانا ەمەس, بيۋدجەتتىك شەشىمدەردىڭ ورىندالۋىنا جاۋاپكەرشىلىكتى كۇشەيتۋ ءارى ازاماتتىق باستامالاردى قارجىلاندىرۋ ماڭىزدى. مۇنداي كوزقاراس ءوز قالاسىنا دەگەن جاۋاپكەرشىلىكتى نىعايتادى. ال قالا باسقارمالارى كەرى بايلانىس ارنالارى ارقىلى ءىرى جوبالاردى تۇرعىندارمەن, بيزنەسپەن, ساراپشىلارمەن بىرگە تالقىلاعاندارى ءجون. قوعامدىق كەڭەس مۇشەلەرى بارىنشا بەلسەندىلىك تانىتۋلارى ءتيىس دەپ ەسەپتەيمىن» دەپ اتاپ ءوتتى قالا باسشىسى باۋىرجان بايبەك.
قالا جوبالارى تۇرعىندار تاراپىنان تالقىلانىپ, بيۋدجەت تە قالا جۇرتشىلىعىنىڭ ۇسىنىسى نەگىزىندە قۇرىلادى. ال اكىمدىكتە شاعىمدار مەن ۇسىنىستار ۇنەمى زەرتتەلىپ وتىرادى. الماتى اكىمدىگىنىڭ بارلىق الەۋمەتتىك جەلىلەردە رەسمي اككاۋنتتارى بار, Instagram پاراقشاسىندا تىركەلگەندەر سانى بۇگىندە ەكى ءجۇز مىڭ شاماسىندا. كۇن سايىن «Open Almaty» بىرىڭعاي جۇيەسىنە 500 ءوتىنىش تۇسسە, بارلىعى دا ساراپتالىپ, نازارعا الىنادى.