دۇنيە جۇزىنەن كەلگەن پارلامەنت وكىلدەرىنىڭ جىل سايىنعى كەزدەسۋىنىڭ باستى تاقىرىبى - بەيبىتشىلىك, قاۋىپسىزدىك, زاڭ ۇستەمدىگى جانە ورنىقتى دامۋ. الەمنىڭ 178 ەلىنەن پارلامەنت وكىلدەرىن بىرىكتىرەتىن پارلامەنتارالىق وداق سياقتى حالىقارالىق بەدەلدى الاڭدا وسى ماسەلەلەردى تالقىلاۋ جالپىعا ورتاق ادامزاتتىق قۇندىلىقتاردىڭ تەك قانا ماقسات ەمەس, سونىمەن بىرگە زاماناۋي كوپتەگەن قاتەلەردىڭ الدىن الۋدىڭ ءتيىمدى جولى بولماق.
ءماجىلىس سپيكەرى نۇرلان نىعماتۋلين اتاپ وتكەندەي, ءبىزدىڭ ەلىمىز تاۋەلسىزدىكتىڭ العاشقى كۇننەن باستاپ بەيبىتشىلىكتى, كەلىسىمدى, قاۋىپسىزدىكتى ساقتاي وتىرىپ, جالپى ادامزاتتىق قۇندىلىقتارعا قۇرمەتتەۋ قاراۋ يدەياسىنىڭ جاقتاۋشىسى. وسى رەتتە, نۇرلان نىعماتۋلين:
- بۇل ەلىمىزدى ەڭ دامىعان الەمدەگى 30 ەلدىڭ قاتارىنا كىرۋ ماقساتىن قويعان قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ەرەن ەڭبەگى ەكەنى ءسوزسىز, - دەدى.
ودان ءارى نۇرلان نىعماتۋلين ءوز سوزىندە قازاقستاننىڭ جانە ەلىمىزدىڭ تۇڭعىش پرەزيدەنتىنىڭ تۇراقتى دامۋ ماقساتتارىنا جەتۋگە باعىتتالعان باستامالارعا نازار اۋداردى. بۇل جولدا, ءماجىلىس توراعاسى ءىس-قيمىلمەن ۇيلەستىرىلگەن بىرلەسكەن كۇش-جىگەردىڭ قاجەتتىگىنە توقتالدى.
- بۇل ماسەلەلەردى پارلامەنتارالىق وداق اسسامبلەياسى سياقتى ماڭىزدى ديالوگ الاڭىندا تالقىلاۋ ۇلتتىق زاڭنامالاردى بىرىزدەندىرۋ جانە جاقىنداستىرۋ ماقساتىندا ءبىزدىڭ ەلدەرىمىزدىڭ پارلامەنتتەرى اراسىنداعى ءوزارا ءىس قيمىلدى جان-جاقتى ىنتالاندىرۋعا, سونداي-اق زاڭنامالىق پراكتيكالار مەن يننوۆاتسيالىق زەرتتەۋلەر دەڭگەيىندە تاجىريبە الماسۋعا مۇمكىندىك بەرەدى - دەدى نۇرلان نىعماتۋلين.
اسسامبلەيانىڭ قورىتىندىسى اعىمداعى جىلدىڭ شىلدە ايىنا جوسپارلانعان تۇراقتى دامۋ جونىندەگى جوعارى دەڭگەي بۇۇ ساياسي فورۋمىنا قوسىلعان پارلامەنتتىك ۇلەس بولىپ تابىلادى. پارلامەنتارالىق وداق 1889 جىلى الەمدىك پارلامەنتتەردىڭ ءىس-ارەكەتىن ۇيلەستىرۋ ءۇشىن قۇرىلعان. قازاقستان پارلامەنتى 1993 جىلى پارلامەنتارالىق وداققا مۇشەسى رەتىندە قابىلداندى. قازىرگى ۋاقىتتا ول 178 ەل مەن 12 ايماقتىق پارلامەنتارالىق ۇيىمداردى بىرىكتىرەدى.