ەلىمىزدە بيزنەس-ورتانى دامىتۋ جانە ساۋدا قىزمەتىن رەتتەۋ ماسەلەلەرى تۋرالى زاڭعا وزگەرىستەر مەن تولىقتىرۋلار ەنگىزىلدى. ول بويىنشا «قورعاس» شىحو ەەا ورنالاسقان بوندتىق قويمادان حالىقارالىق پوشتا جونەلتىلىمدەرىن تىكەلەي جىبەرۋ مۇمكىندىگى تۋدى. بۇل تۋرالى «قازپوشتا» اق باسقارما توراعاسى ساكەن سارسەنوۆ وزىنىڭ فەيسبۋكپاراقشاسىندا جازدى.
«مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس-ورتانى دامىتۋ جانە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنا قول قويدى. ەنگىزىلگەن تۇزەتۋلەر قازپوشتاعا «قورعاس» شىحو ەەا اۋماعىندا ورنالاسقان بوندتىق قويمادان حالىقارالىق پوشتا جونەلتىلىمدەرىنىڭ ءترانزيتىن رەتتەۋگە مۇمكىندىك بەرەدى», – دەپ جازدى س.سارسەنوۆ.
ونىڭ ايتۋىنشا, ەندىگى ۋاقىتتا قىتاي ەلىنىڭ پوشتا قىزمەتتەرىنە جۇگىنبەي قىتايدىڭ لوگيستيكالىق كومپانيالارى مەن ەۋرووداق ەلدەرىنە قازپوشتا ارقىلى سالەمدەمەلەردى تىكەلەي جەتكىزۋگە بولادى. سونداي-اق, قازاقستاندا جۇكتى رەسىمدەۋ ۋاقىتى دا ايتارلىقتاي قىسقارادى. «اتالعان سەرۆيستى ەنگىزۋ ەكسپورتتى دەكلاراتسيالاۋ جانە تاۋارلاردى قايتا يمپورتتاۋ كەزىندە حالىقارالىق پوشتا جونەلتىلىمدەرىن كەدەندىك رەسىمدەۋدى جەڭىلدەتەدى. قازپوشتا كاسىپكەرلەرگە كەدەندىك رەسىمدەۋدىڭ وڭايلاتىلعان ءتۇرىن ۇسىناتىن بولادى. ەندى كەز-كەلگەن پوشتا بولىمشەسىندە تاۋارلارعا ارنالعان قۇجاتتاردى كەدەن ورگاندارىنا بارماي, كەدەندىك الىمداردى تولەمەي رەسىمدەۋگە بولادى», – دەيدى قازپوشتا باسشىسى. ودان بولەك, زاڭعا ەنگىزىلەتىن تۇزەتۋلەر زاڭدى تۇلعالار ءۇشىن تاۋارلاردى جەڭىلدەتىلگەن ەكسپورتتاۋ سەرۆيسىن ەنگىزۋگە جانە ەكسپورتتاۋشىلارعا تاۋارلارعا ارنالعان پوشتا قۇجاتتارىن (كەدەندىك دەكلاراتسيا: CN 22 جانە CN 23) پايدالانۋعا مۇمكىندىك بەرەدى.
الماتى