بۇل وتكەن جىلدىڭ سايكەس كەزەڭىمەن سالىستىرعاندا 38%-عا كوپ كورسەتكىش.
العاشقى ۇشتىكتى باستاپ تۇرعان «سارىارقااۆتوونەركاسىپ» جشس كوش باستاعان. زاۋىت قاڭتار-اقپان 1 078 جەڭىل كولىك قۇراستىرىپ, تاجىكستانعا 108 كولىك ەكسپورتتاعان.
«ازيا اۆتو» كاسىپورنى 1401 كولىك قۇراستىرسا, «سەماز» 36 بىرلىك كوممەرتسيالىق تەحنيكا جيناعان. «كاماز ينجينيرينگ» 48 جۇك كولىگىن, ال Daewoo Bus 16 اۆتوبۋس شىعارعان.
ال «قازاۆتووندىرىس» قازاقستان اۆتوموبيل سالاسى كاسىپورىندارى وداعى سوڭعى 3 ايدا ەلىمىزدە 323 988 كولىك قۇرالى تىركەۋگە الىنعانىن جانە بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 13,8% ارتىق ەكەنىن جاريالادى. «305 460 بىرلىك كولىك قۇرالى ەكىنشى رەت تىركەلدى. ەسەپكە ءبىرىنشى رەت الىنعان اۆتوكولىكتەردىڭ سانى 18 528 بولدى», – دەپ حابارلادى وداقتىڭ ءباسپاسوز قىزمەتى.
قازاقستان ەسكى كولىكتەردەن ارىلا الماعان.
ەسەپتىك كەزەڭدە ەكىنشى رەت تىركەلگەن كولىكتەردىڭ كورسەتكىشى 38,8%-دى قۇراپ, كولىك جۇرگىزۋشىلەرىنىڭ دەنى زاۋىتتان شىققانىنا 20 جىل بولعان تەمىر تۇلپارلاردى تاقىمداپ جۇرگەنىن كورسەتكەن. ال سۋ جاڭا كولىك مىنەتىندەردىڭ قاتارى وتكەن جىلى 4,7% بولسا, بيىل 3,4%-عا ءتۇسىپ قالعان.
الماتى, تۇركىستان وبلىستارى مەن الماتى قالاسى ەسكى كولىك كوپ ساتىلعان ايماق دەپ تانىلعان. «ماشينا قۇراستىرۋ سالاسى ەل ەكونوميكاسىنا مۋلتيپليكاتيۆتى اسەر ەتۋىن جالعاستىرىپ جاتىر. بۇگىنگى تاڭدا ەل اۋماعىندا جۇرگەن تانىمال 10 كولىك برەندىنىڭ 7-ءى وتاندىق ءونىم سانالادى. اۆتوكولىكتى جەڭىلدىكپەن نەسيەلەندىرۋ باعدارلاماسى جۇزەگە اسىرىلعاننان بەرى 14 مىڭعا جۋىق كولىك ساتىلدى. اۆتونەسيەلەندىرۋگە بولىنەيىن دەپ جاتقان 10 ملرد تەڭگە مەن كوممەرتسيالىق تەحنيكاعا قاراستىرىلاتىن ليزينگ تۇتىنۋشىلاردىڭ بەلسەندىلىگىن ارتتىرىپ, كولىك ساۋداسىنىڭ كولەمىن ارتتىرادى دەپ ۇمىتتەنەمىز», – دەدى قازاقستان اۆتوبيزنەس قاۋىمداستىعىنىڭ ۆيتسە-پرەزيدەنتى انار ماقاشەۆا.
گۇلبارشىن ايتجانبايقىزى,
«ەqemen Qazaqstan»
الماتى