سۋ باسۋ قاۋپى جوق

جيىندا ءسوز العان ۆيتسە-مينيستر يۋ.يلين ەلىمىزدىڭ كەيبىر وڭىرلەرىنە جاۋىن-شاشىن كوپ جاۋعانىمەن, سۋ تاسقىنى بويىنشا جاعداي قالىپتى ەكەنىن ايتتى. ونىڭ مالىمەتىنشە, قازىرگى تاڭدا ەلدى مەكەندەردى سۋ الۋ قاۋپى جوق. «وتكەن اپتادا تۇركىستان, جامبىل وبلىستارىندا توتەنشە جاعدايلارعا دايىندىق كۇشەيتىلىپ, قوسىمشا بولىمشەلەر جىبەرىلدى. اقمولا, قىزىلوردا جانە سولتۇستىك قازاقستان وبلىستارىنداعى توپ­تاردىڭ جۇمىسىن كۇشەيتۋ ءۇشىن ورتا­لىق قۇتقارۋ جاساعىنىڭ قىز­مەت­كەرلەرى جونەلتىلدى», دەدى ول. 

سونداي-اق اتالعان ۆەدومستۆو وكىلى توتەنشە جاعدايلاردىڭ الدىن الۋ بويىنشا اتقارىلعان ناقتى شارالارعا توقتالدى. ايتالىق, جا­زىق­تىق وزەندەردە مۇز وتكەلىنىڭ ءوتۋىن قامتاماسىز ەتۋ جانە مۇز كەپتەلىسىنىڭ الدىن الۋ ماقساتىندا شىعىس قازاقستان, قاراعاندى, قوستاناي, سولتۇستىك قازاقستان وبلىستارىندا 26 مۇز جارۋ جۇمىسى جۇرگىزىلگەن. باتىس قازاقستان وبلىسىندا جالپى اۋدانى 215 مىڭ شارشى مەتر مۇزدى كەسۋ جۇمىستارى اياقتالدى.

يۋ.يلين اتاپ وتكەندەي, «قاز­گيد­رومەت» بەرەتىن اپتا سايىنعى مەتەورولوگيالىق بولجامعا سايكەس 1-5 ءساۋىر ارالىعىندا قوستاناي, سول­تۇس­تىك قازاقستان, شىعىس قازاق­ستان, اقمولا جانە قاراعاندى وبلىستارىندا (14-20 مم دەيىن) جاۋىن-شاشىن بولۋى مۇمكىن, ول جاع­دايدى قيىنداتۋى ىقتيمال. 

شارا بارىسىندا ءمينيستردىڭ ورىنباسارى اقمولا وبلىسىنىڭ بۋراباي اۋدانىنداعى كەنەسارى بوگەتىندەگى جاقىندا ورىن العان جاعدايعا دا توقتالدى. 30 ناۋرىزدا ساعات 19.00-دە قالىڭ قاردىڭ ەرۋى سالدارىنان سۋ كوتەرىلىپ, اعىن سۋ بوگەتتى بۇزىپ كەتكەن. يۋ.ءيليننىڭ ايتۋىنشا, بوگەتتەن تاسىپ اققان سۋ حان وزەنىنە بارىپ قۇيىلعان. سوندىقتان يۆانوۆ سۋ قويماسى جارىلىپ كەتۋدەن امان تۇر. يۆانوۆ سۋ قويماسىنىڭ ماڭىندا يۆانوۆو ەلدى مەكەنى بار. كوكشەتاۋ قالاسى مەن يۆانوۆونى سۋ باسۋ قاۋپى جوق.

اتالعان ۆەدومستۆو وكىلىنىڭ اقپا­راتىنا سۇيەنسەك, 25-31 ناۋرىز ارالىعىندا اقمولا, شىعىس قازاق­ستان, باتىس قازاقستان, سولتۇستىك قا­زاق­ستان جانە ەلوردانىڭ اينالا­سىن­داعى ەلدى مەكەندەردەن 440 مىڭ تەكشە مەتر قار سۋى سورىلدى, وزەن دەڭگەيىنىڭ كوتەرىلۋى سالدارىنان اۋىلداردى سۋ باسۋ فاكتىلەرى تىركەلمەگەن.

ايدانا شوتبايقىزى,

«Egemen Qazaqstan»