ۇلتتىق كوميسسيا وكىلىنىڭ مالىمەتىنە سۇيەنسەك, قازاقستان قازىرگى تاڭدا گەندەرلىك كورسەتكىشتەر بويىنشا ورتالىق ازيادا كوش باستاپ تۇر. 1999 جىلدان بەرى ۇلتتىق كوميسسيانىڭ قولداۋىمەن «قازاقستاننىڭ ايەلدەرى مەن ەرلەرى» ستاتيستيكالىق جيناعى شىعارىلا باستادى. جيناق – ۇلتتىق گەندەرلىك ساياساتتىڭ ماڭىزدى رەسۋرستارىنىڭ ءبىرى. ول ايەلدەردى, بالالاردى جانە وتباسىن قولداۋ مەن دامىتۋعا باعىتتالعان بارلىق ماسەلەلەرگە قاتىستى مالىمەتتەرگە نەگىزدەلگەن.
2019 جىلعى 1 قاڭتارداعى ستاتيستيكالىق دەرەكتەرگە سايكەس, قازاقستان حالقىنىڭ سانى 18,4 ملن. سونىڭ ىشىندە 9,5 ملن-ى – ايەلدەر. بۇگىندە قازاقستاندا 4 ملن-نان استام وتباسى بار, ونىڭ 340 مىڭنان استامى كوپ بالالى وتباسىلار. كوپ بالالى وتباسىلاردىڭ 132 606-سى – قالالىقتار, ال 207 771-ءى اۋىلدا تۇرادى.
وتىرىستا سونىمەن قاتار ەلىمىزدەگى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ بويىنشا 2017-2019 جىلدارعا ارنالعان ءىس-شارالار جوسپارىنىڭ اقمولا وبلىسىندا ورىندالۋ بارىسى تالقىلاندى. اتالعان وبلىس اكىمىنىڭ ورىنباسارى اينا ەرمەكقىزى وڭىردە قابىلدانىپ وتىرعان شارالاردىڭ ءناتيجەسىندە انا مەن بالا ءولىمىنىڭ ازايعانىن جانە سايكەسىنشە حالىقتىڭ ءوسىمى بايقالاتىنىن ايتتى. 2018 جىلى بالا ءولىمىنىڭ كورسەتكىشى 15,4 پايىزعا ازايعان.
بۇدان بولەك, ۇلتتىق كوميسسيا ءمۇشەلەرى بەيجىڭ دەكلاراتسياسى مەن ءىس-ارەكەتتەر تۇعىرناماسىن جۇزەگە اسىرۋ بويىنشا بۇۇ-نىڭ سالالىق كوميتەتىنە جولداناتىن ۇلتتىق شولۋدىڭ جوباسىمەن تانىستى.
وتىرىس سوڭىندا گ.ابدىقالىقوۆا مەملەكەتتىك ورگاندار مەن جاۋاپتى ۆەدومستۆو وكىلدەرىنە بىرقاتار ناقتى تاپسىرمالار بەردى.
ايدانا شوتبايقىزى,
«Egemen Qazaqstan»