تۇركىستان قالاسىن دامىتۋ بويىنشا قالا اكىمى الىپبەك وسەرباەۆ بايانداما جاسادى. ول وبلىس اكىمىنىڭ تاپسىرماسىنا سايكەس, ءتيىستى شارالار قولعا الىنىپ, جۇيەلى تۇردە جۇمىستاردىڭ اتقارىلىپ جاتقانىن مالىمدەدى.
«قالا اۋماعىندا 10 گۇلزار سالۋ تۋرالى جۇمىستى ۇيلەستىرۋ باعىتىندا, حالىق كوپ شوعىرلانعان ورتالىق كوشەلەر بويىنان كوپشىلىك پايدالاناتىن قوعامدىق ورىنداردىڭ سانىن ارتتىرۋ ماقساتىندا بىرنەشە الاڭشالاردى اشۋ جوسپارلانىپ وتىر. وسىعان سايكەس, نەگىزگى كوشەلەر بويىنان جالپى اۋماعى 172,2 گەكتاردى قۇرايتىن قولايلى جەرلەر انىقتالدى. بۇگىندە سول اۋماقتارداعى 148 ءتۇرلى باعىتتاعى نىساندى مەملەكەت مۇقتاجدىعىنا الۋ جۇمىستارى جۇرگىزىلۋدە» دەدى قالا باسشىسى.
سونداي-اق, قالا اكىمى شاھارداعى عيماراتتاردىڭ قورشاۋلارى مەن جول بويىنداعى تەمىر شارباقتاردى الىپ تاستالاتىنىن ايتتى. بۇل جۇمىستار ناتيجەسىندە قالانىڭ شىرايىن ارتتىرادى دەدى. سونىمەن قاتار, جيىندا قالا ورتالىعىنداعى بازارلاردى سىرتقا شىعارۋ بويىنشا ءتيىستى جۇمىستار جۇرگىزىلىپ جاتقانى دا ايتىلدى. وسى ماقساتتا قالا سىرتىنان جالپى كولەمى 25 گەكتار بولاتىن جەر تەلىمى انىقتالعان. بازارلارعا ۇسىنىلاتىن جەرلەردىڭ ينفراقۇرىلىمىن جۇرگىزۋگە جوبالىق-سمەتالىق قۇجاتتامالاردى دايىنداۋ ءۇشىن جەرگىلىكتى بيۋدجەتتەن قارجى قارالعان.
باياندامامەن تانىسىپ شىققان وبلىس باسشىسى قالانى دامىتۋعا باعىتتالعان جۇمىستاردى جۇيەلى تۇردە ۋاقىتىلى اتقارۋدى جانە وبلىس ورتالىعىنا لايىق جاڭادان سالىنۋى ءتيىس بىرقاتار جوبالاردى اتادى.
«وبلىس ورتالىعىندا حالىق ۋاقىتىن ءتيىمدى وتكىزەتىن ورىندار مەن مەديتسينالىق مەكەمەلەر اشىلۋ كەرەك. وسىعان بايلانىستى تۇركىستان قالاسىندا 10 شاعىن فۋتبول الاڭى مەن 10 تەننيس كورتى سالىنۋى ءتيىس. ودان بولەك, مۇندا يپپودروم مەن مۇز سارايى بوي كوتەرۋى قاجەت. مادەنيەتىڭ ورداسى رەتىندە وپەرا تەاترىن سالۋدى دا تاپسىرامىن» دەدى وبلىس اكىمى.
ال, تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ باستىعى الىبەك تىلەگەنوۆ 2019 جىلعا سالىق سالۋ بازاسىن كەڭەيتۋ بويىنشا مىندەتتەر تۋرالى بايانداما جاسادى. ونىڭ سوزىنشە, بۇگىنگى كۇنگى باستى مىندەتتەردىڭ ءبىرى, بيۋدجەتكە تۇسەتىن سالىقتار جانە مىندەتتى تولەمدەر بويىنشا بەرەشەك سومالاردى ازايتۋ. بۇل رەتتە, دەپارتامەنت باسشىسى بەرەشەگى بار بورىشكەرلەردىڭ وبلىس جانە اۋدانارالىق قايتا تىركەۋدەن وتۋىنە جول بەرمەۋ, جالعان كاسىپكەرلىكپەن كۇرەسۋ ماقساتىندا, مەملەكەتتىك كىرىستەر ورگاندارى, ادىلەت ورگاندارى جانە ازاماتتارعا ارنالعان ۇكىمەت اراسىندا مەموراندۋم ۇيىمداستىرىپ, ورىندالۋىن قاتاڭ باقىلاۋعا الۋ قاجەتتىگىن ايتتى.
كىرىستەر دەپارتامەنتىنىڭ جۇمىسىمەن تانىسقان شىققان وبلىس باسشىسى جۇمىستى جۇيەلەندىرىپ, ءتيىستى شارالاردى قولعا الۋدى تاپسىردى.