وبلىستىق دەنساۋلىق ساقتاۋ باسقارماسىنىڭ جانە بۇۇ بالالار قورىنىڭ (يۋنيسەف) ۇيىمداستىرۋىمەن اشىلعان وقۋ ورتالىعى مەديتسينالىق قىزمەتتىڭ ساپاسىن دا باقىلاپ وتىرادى. ورتالىقتىڭ اشىلۋى شەڭبەرىندە وبلىس اكىمدىگى مەن يۋنيسەف-ءتىڭ قازاقستانداعى وكىلى اراسىندا مەموراندۋم ءتۇزىلدى. حالىقارالىق ۇيىم وكىلى يۋري وكساميتنىيمەن كەزدەسكەن وبلىس اكىمى ومىرزاق شوكەەۆ رەسۋرستىق ورتالىقتىڭ اشىلۋى ءوڭىر ءۇشىن ماڭىزدى وقيعا ەكەنىن اتاپ ءوتتى. «بالالاردىڭ دەنساۋلىعىن جاقسارتۋ باستى نازاردا بولۋى قاجەت. بۇل باعىتتا ءبىز قولدان كەلگەن كومەگىمىزدى ايامايمىز. جاقىن ارادا ورتالىقتىڭ جۇمىسى ءوڭىردەگى اياعى اۋىر ايەلدەر مەن كىشكەنتاي ءبۇلدىرشىندەرى بار وتباسىلاردىڭ دەنساۋلىعىن, ءال-اۋقاتىن جاقسارتۋعا وڭ سەپتىگىن تيگىزەتىنىنە سەنىمدىمىن», دەدى ءو.شوكەەۆ. ال يۋنيسەف-ءتىڭ وكىلى ەكىجاقتى كەلىسىمگە ريزاشىلىعىن ءبىلدىرىپ, ورتالىقتا الداعى ۋاقىتتا بىلىكتى ماماندار دايارلاناتىنىن جەتكىزدى. «بالا ءومىرىنىڭ العاشقى جىلدارى ونىڭ فيزيكالىق جانە پسيحيكالىق دەنساۋلىعىنىڭ ءارى قاراي دامۋىن ايقىندايدى. بالانىڭ ميى شامامەن 80%-عا ءۇش جاسقا دەيىن قالىپتاسادى. سوندىقتان يۋنيسەف اياعى اۋىر ايەلدەر مەن كىشكەنتاي بالالارى بار وتباسىلارعا پاتروناج قىزمەتىن كورسەتەتىن باعدارلامالاردى قولدايدى, ويتكەنى كىشكەنتاي بالالاردىڭ دامۋىنا جاردەمدەسۋ – بالالار قۇقىعىن جۇزەگە اسىرۋدىڭ ەڭ ءتيىمدى ستراتەگيالارىنىڭ ءبىرى», دەدى يۋنيسەف-ءتىڭ قازاقستانداعى وكىلى يۋ.وكساميتنىي.
ءبىلىم بەرۋ رەسۋرستىق ورتالىعى اياعى اۋىر ايەلدەر مەن كىشكەنتاي بالالارى بار وتباسىلار ءۇشىن وزىق ۇلگىدەگى كەشەندى قىزمەت كورسەتە الاتىن پاتروناجدى مەدبيكەلەردى دايارلايتىن بولادى. مامانداردىڭ ايتۋىنشا, مۇنداي ءتاسىل اۋىلدىق جانە قالالىق وتباسىلارعا كورسەتىلەتىن قىزمەتتەردىڭ ساپاسى مەن حالىقتىڭ ولارعا دەگەن قاناعاتتانۋشىلىق دەڭگەيىن جاقسارتادى. ورتالىقتا مەديتسينالىق جانە الەۋمەتتىك قىزمەتكەرلەر يۋنيسەف جانە ددسۇ-نىڭ ۇسىنىمدارىنا ساي ەرتە جاستاعى بالالاردىڭ دامۋى, دۇرىس تاماقتانۋى جانە ولارعا قالاي قاۋىپسىز ورتا قامتاماسىز ەتۋ كەرەكتىگى جونىندە زاماناۋي بىلىمدەرىن جەتىلدىرە الادى. وعان قوسا, ماماندار ءوز بىلىمدەرىن تاجىريبەدە ىسكە اسىرادى, بالانىڭ دامۋ بولمەسىندە – قانداي ويىندار ونىڭ تولىق دامۋىنا جاعداي جاسايتىنىن زەرتتەيدى, اسحانادا – كىشكەنتايلارعا الۋان ءتۇرلى جانە پايدالى تاعامداردى قالاي دايىنداۋ كەرەكتىگىن مەڭگەرەدى. سونداي-اق اتا-انالارمەن قالاي قارىم-قاتىناس ورناتۋدى جانە ولارعا دۇرىس تاربيە بەرۋ جونىندەگى اقپاراتتى ءبولىسۋدى ۇيرەنەدى.
ساپالى ءبىلىم بەرەتىن مەكەمەلەردى قۇرۋ, دەنساۋلىق ساقتاۋ جۇيەسىنە قاجەتتى انا مەن بالانىڭ دەنساۋلىعىن قورعايتىن مەديتسينالىق جانە الەۋمەتتىك قىزمەتكەرلەردىڭ ساپاسىن جاقسارتۋدى قامتاماسىز ەتۋ نەگىزگى ماقساتى سانالاتىن ورتالىق قاجەتتى قۇرالدارمەن تولىق جابدىقتالعان. يۋنيسەف-ءتىڭ دەنساۋلىق ساقتاۋ جانە تاماقتانۋ باعدارلاماسىنىڭ ۇيلەستىرۋشىسى قانات سۇحانبەرديەۆتىڭ ايتۋىنشا, وقۋ ورتالىعىنىڭ ماماندارى حالىقارالىق وزىق تاجىريبەلەرگە ساي ءبىلىم العان. بۇل ۇلگى 2016-2017 جىلدارى قىزىلوردا قالاسىنداعى ەكى ەمحانادا جانە جاڭاقورعان اۋىلىندا دەنساۋلىق ساقتاۋ مينيسترلىگىنىڭ, يۋنيسەف-ءتىڭ جانە وبلىس اكىمشىلىگىنىڭ بىرلەسكەن كۇشىمەن ءساتتى جۇزەگە اسىرىلعان ەكەن. وسى تاجىريبەنى ەسكەرە وتىرىپ, وتكەن جىلدان باستاپ بۇل مودەل ەل بويىنشا ەنگىزىلەر اۋماعىن ۇلعايتا تۇسكەن.
تۇركىستان وبلىسى