كەنشىلەر استاناسىندا «ۇزدىك ديزاينەر» اتتى بايقاۋ ءوتىپ, وندا رەسەي, وزبەكستان جانە قازاقستاننان كەلگەن ديزاينەرلەر وزدەرى تىككەن كيىم-كەشەكتەرى مەن قولدان جاساعان اشەكەي زاتتارىن قازىلار القاسىنىڭ تالقىسىنا ۇسىندى.
– قاراعاندىدا Fashion يندۋسترياسىن دامىتۋ كوپتەن بەرى ويىمدا جۇرگەن يدەيا ەدى. بۇگىندە بۇل سالانىڭ ماڭىزدى ءارى قاجەت ەكەنىنە جۇرتتىڭ دا كوزى جەتە باستادى. پىكىرلەستەرىم مەن قولداۋشىلارىمنىڭ بارلىعىنا قۋانىشتىمىن. ال اتالعان بايقاۋدىڭ جاڭا دەيگەيگە شىققانى – ءبىز تاڭداعان جولدىڭ دۇرىستىعىن كورسەتەدى, – دەيدى جوبا اۆتورلارىنىڭ ءبىرى يرينا نەچاەۆا.
بايقاۋداعى اشەكەيشىلەر سايىسىندا قاراعاندىلىق ولگا تسەللەرگە تەڭ كەلەر ەشكىم بولمادى. قولونەر شەبەرىنىڭ كەنشىلەر قالاسىنىڭ ەرەكشەلىگىن پاش ەتەتىن توپتاماسىندا تاس كومىر مەن تابيعي گۇلدەر ۇيلەسىم تاۋىپ, كوزدىڭ جاۋىن الاتىن الۋان ءتۇرلى اشەكەي بۇيىمدارىنا اينالعان. باس جۇلدەگە يە بولعان جەڭىمپاز ەندى ماسكەۋ قالاسىندا وتەتىن حالىقارالىق بايقاۋدا باق سىنايتىن بولادى.
ولگانىڭ نەگىزگى ماماندىعى ەكونوميست. بەزەندىرۋ ديزاينىمەن ءتورت جىلدان بەرى اينالىسىپ كەلەدى.
– بارلىعى حوببيدەن باستالدى. مەن وزىمە جانە قۇربىلارىما ارنالعان اكسەسسۋارلار جاسادىم. سودان كەيىن شايىر ۇستىنە تابيعي گۇلدەردەن اشەكەي جاساۋ تەحنولوگياسىن مەڭگەردىم. ءحوببيىم كەلە-كەلە كاسىبىمە اينالدى. قازىر كوللەكتسيالارمەن جۇمىس ىستەيمىن جانە ءوزىمنىڭ بىرەگەي ءستيلىمدى جاساۋعا تىرىسىپ كەلەمىن, – دەيدى ولگا تسەللەر.
ال «ۇزدىك ديزاينەر» اتالىمى بويىنشا باس جۇلدە ەلوردالىق شەبەر كاميليا سۇلەيمەنوۆاعا بۇيىردى. جەڭىمپازدىڭ كيىز وڭدەۋ ىسىنە زاماناۋي لەپ بەرىپ, ونى جاڭا قىرىنان تانىتا بىلگەن شەبەرلىگى قازىلار القاسىنان جوعارى باعا الدى.
«رۋحاني جاڭعىرۋ» باعدارلاماسى اياسىندا وتكەن بايقاۋدى قالالىق مادەنيەت جانە تىلدەردى دامىتۋ ءبولىمىنىڭ تاپسىرىسى بويىنشا «شاڭىراق ەلگە ورتاق» قوعامدىق بىرلەستىگى ۇيىمداستىرعانىن جانە وعان Nur Otan پارتياسىنىڭ قالالىق فيليالى, ەۋرازيالىق ايەلدەر قاۋىمداستىعى, قاراعاندى وبلىسىنىڭ جەڭىل ونەركاسىپ كوميتەتىنىڭ قولداۋ كورسەتكەنىن ايتا كەتكەن ءجون.
قايرات ءابىلدا,
«ەگەمەن قازاقستان»
قاراعاندى