«جاعالاۋ كۇزەتى» وڭىرلىك باسقارماسىنىڭ «ساردار» شەكارالىق كەمەسى ەلىمىزدىڭ تەڭىزدەگى شەكاراسىن كۇزەتۋ بويىنشا تاپسىرمانى ورىنداي ءجۇرىپ, كەشە كەشكىلىك تەڭىزدەن 12 000 م كالادا, 6000 ىلمەكتى اۋ تاۋىپ, جيناپ الىپ, 400 كيلوگراممعا جۋىق بەكىرە تۇقىمداس بالىقتى قۇتقارىپ, قايتادان تەڭىزگە جىبەردى. بۇل تۋرالى قر ۇقك شق ءباسپاسوز قىزمەتى حابارلادى.
«شەكاراشىلار مەملەكەتكە كەلتىرىلۋى مۇمكىن 100 000 000 تەڭگەگە جۋىق شىعىننىڭ الدىن الدى. جالپى, شەكاراشىلار وتكەن ەكى ايدا عانا مەملەكەتكە بالىق بويىنشا 300 ميلليونعا جۋىق تەڭگە زيان كەلتىرۋدىڭ الدىن الدى. براكونەرلەردەن 6,5 ميلليون تەڭگەنىڭ قۇرال-جابدىقتارىن تاركىلەدى», دەلىنگەن حابارلامادا.
2019 جىلدىڭ وتكەن ەكى ايىندا (1 قاڭتاردان 28 اقپانعا دەيىن) تەڭىزدەگى شەكارالىق كەڭىستىكتى كۇزەتۋ مىندەتتەرىن ورىنداۋ جانە شەكارالىق قۇقىق بۇزۋشىلىقتىڭ الدىن الۋعا باعىتتالعان شارالاردى اتقارۋ بارىسىندا جالپى كولەمى 87 911 مەتر براكونەرلىك قۇرال-جابدىقتار (15 311 مەتر ءارتۇرلى اۋلار, 72 600 مەتر كوللادا) تاركىلەنىپ, جالپى سالماعى مىڭ كيلوگراممعا جۋىق بەكىرە تۇقىمداس جانە باعالى تۇقىمدى بالىقتار قۇتقارىلىپ, قايتادان تەڭىزگە جىبەرىلگەن بولاتىن.
ەكى ايدا اتقارىلعان شارالاردىڭ ناتيجەسىندە شەكاراشىلار مەملەكەتكە 293 ميلليون تەڭگە زيان كەلتىرۋدىڭ الدىن الدى. براكونەرلەردەن 6,5 ميلليون تەڭگەنىڭ قۇرال-جابدىقتارى تاركىلەندى.
تەڭىز شەكاراشىلارى تەڭىز بايلىعىنا, سۋداعى بيولوگيالىق قورعا سۋىق قولدارىن سۇعۋشىلارمەن كۇرەستى ىمىراسىز جالعاستىرا بەرەدى.