جاسوسپىرىمدەردىڭ مەكتەپتەن تىس ۋاقىتىن ءتيىمدى پايدالانۋدى ۇيىمداستىرۋ قىلمىستىڭ الدىن الۋداعى ىزگى شارالاردىڭ ءبىرى. وسى ورايدا قۇقىق بۇزۋشىلىقتىڭ الدىن الۋ ماقساتىندا الماتى قالاسى ناۋرىزباي اۋدانىنىڭ جاسوسپىرىمدەر پوليتسياسى «Hard way» ترەناجەرلىق زالىنىڭ قولداۋىمەن الەۋمەتتىك قولداۋعا ءزارۋ وتباسىلاردىڭ بالالارى ءۇشىن ءۇش اي بويى ترەناجەر زالىندا سپورتپەن تەگىن اينالىسۋعا مۇمكىندىك جاسادى.
الماتى قالاسى ىشكى ىستەر دەپارتامەنتى جەرگىلىكتى پوليتسيا قىزمەتىنە قاراستى يۋۆەنالدىق پوليتسيا ءبولىمىنىڭ باستىعى, پوليتسيا پولكوۆنيگى لەيلا اليپباەۆانىڭ ايتۋىنشا, جاسوسپىرىمدەردىڭ بوس ۋاقىتىن ءتيىمدى پايدالانۋىن ۇيىمداستىرۋ جالپىقوعامدىق مىندەت. ناۋرىزباي اۋدانىندا قولعا الىنعان جاسوسپىرىمدەردىڭ مەكتەپتەن تىس ۋاقىتتا سپورتپەن شۇعىلدانۋى سالاۋاتتى ءومىر سالتىن ۇستانۋىنا مۇمكىندىك بەرەدى.
بۇگىندە سپورت كلۋبتارى مەن سەكتسيالارىنا بارلىق بالالاردىڭ كەلۋىنە مۇمكىندىك جوق. سوندىقتان دا جەرگىلىكتى اكىمدىكتەر تاراپىنان دا قالا اۋداندارىندا ورنالاسقان سپورت كەشەندەرىنە بالالاردىڭ تەگىن قاتىسۋىن ۇيىمداستىرۋ شارالارى كوپتەپ ۇيىمداستىرىلسا يگى.
ەلۆيرا سەرىكقىزى,
«ەگەمەن قازاقستان»
الماتى