نۇر-سۇلتان قالاسىنىڭ ساحنا مايتالماندارى حالىقارالىق تەاتر كۇنىن تويلادى. «Nomad سity Hall» كونتسەرت زالىندا وتكەن سالتاناتتى كەشتە ەلوردالىق بارشا تەاتر ۇجىمى باس قوسىپ, كاسىبي مەيرامىن ناعىز ونەر دۋمانى دەڭگەيىندە مەرەكەلەدى.
مەرەكەلىك جيىن شىمىلدىعىن نۇر-سۇلتان قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ ءتۇرىپ, ونەر مايتالماندارىن كاسىبي مەرەكەسىمەن قۇتتىقتادى.
– ونەر سالالارىنىڭ ىشىندە تەاتردىڭ ورنى بولەك. كورەرمەن كوڭىلىن نۇرعا, جۇرەگىن جىرعا بولەيتىن, قوعامنىڭ رۋحىنا دەم بولاتىن, ىشكى جان دۇنيەسىنە ەم بولاتىن – تەاتر ساحناسى. ەلوردامىز بۇگىندە مادەنيەت سالاسى ءومىرىنىڭ ەڭ نەگىزگى تىرەگى, ونەگەلى ونەر ورداسىنا اينالىپ كەلەدى. قالامىزدىڭ مادەني ومىرىندەگى جەتكەن جەتىستىكتەرى الدىمەن ونەردەگى وزدەرىڭىزدەي ونەگەلى جانداردىڭ ەسەلى ەڭبەگى مەن جالىندى جىگەرىنىڭ جەمىسى ەكەنى داۋسىز. سالماعى مەن سىباعاسى اۋىر ونەر جولى مىزعىماس ماقسات پەن تاباندى تالاپ قويا بىلەتىن تاڭداۋلىلارعا عانا تيەسىلى باقىت. تەاتردىڭ تۇعىرىن قاتايتىپ, بەدەلىن بەكەم ەتۋدەگى ەڭبەكتەرىڭىز ۇشان-تەڭىز. ولاي بولسا, الداعى ۋاقىتتاردا دا كورەرمەننىڭ كوڭىل شۋاعىن تىڭ تۋىندىلارمەن تولتىرىپ, ونەرلەرىڭىز بەن كۇش-جىگەرلەرىڭىزدى ەلوردامىزدىڭ رۋحانياتىن بايىتۋ جولىنا ارنايتىندارىڭىزعا كامىل سەنەمىن» – دەدى بولات باۋىرجان ۇلى ءوزىنىڭ قۇتتىقتاۋ سوزىندە.
ايتۋلى شارا استانالىق اكتەرلەر مەن رەجيسسەرلەردىڭ قىزىل كىلەمنەن ءوتۋ سالتاناتىمەن باستالىپ, سوڭى حالىقارالىق تەاتر كۇنىنە ارنالعان مەرەكەلىك كەشكە ۇلاستى. جالپى, ەلوردالىق تەاتر ۇجىمدارىنىڭ كاسىبي مەيرامىن تويلاۋ ءداستۇرى ەرەكشە. مەرەكەلىك ءىس-شاراعا جاۋاپتى تەاترلار جىل بۇرىن الدىن الا ارنايى تاڭدالىپ الىنىپ, بەكىتىلگەن ونەر وشاعى كەزەگىمەن ەستافەتا بويىنشا سالتاناتتى كەشتى ۇيىمداستىرۋ مۇمكىندىگىنە يە بولادى. بيىل ول جاۋاپكەرشىلىك باس قالامىزدىڭ ەڭ جاس ونەر ورداسى – كومەديا تەاترىنا جۇكتەلىپتى. جالىندى جاستاردىڭ ۇيىمداستىرۋىمەن وتكەن كەشتەن جاستىق پەن جاڭاشىلدىقتىڭ لەبى ايقىن سەزىلەدى. قىزىقتى ءازىل, كاسىبي تاقىرىپتى قاۋزايتىن كوڭىلدى قويىلىمدار كەشكە جينالعان ونەر مايتالماندارى مەن كورەرمەندەرگە كوتەرىڭكى كوڭىل كۇي سىيلاپ, مەرەكەلىك ۇلكەن تارتۋ بولعانى انىق. سونداي-اق سالتاناتتى كونتسەرتتە كومەديا تەاترى اكتەرلەرىنەن بولەك, نۇر-سۇلتان قالاسىنىڭ وزگە دە تەاترلارىنىڭ, اتاپ ايتساق, ق.قۋانىشباەۆ اتىنداعى قازاق مۋزىكالىق دراما تەاترى, جاستار تەاترى, م.گوركي اتىنداعى اكادەميالىق ورىس دراما تەاترى, «ناز» بي تەاترى جانە قۋىرشاق تەاترى ۇجىمدارىنىڭ دايىنداۋىمەن 5-7 مينۋتتىق مەرەكەلىك كورىنىس كورسەتىلىپ, جىل بويى جۇمىسىندا ۇزدىك ناتيجە كورسەتكەن تەاتر ارتىستەرى مەن جالپى ساحنا سالاسى قىزمەتكەرلەرى نۇر-سۇلتان قالاسى اكىمى باقىت سۇلتانوۆتىڭ اتىنان ارنايى العىس حاتپەن ماراپاتتالدى.
ءيا, تەاتر – تەكتىلىك مەكەنى, حاس سۇلۋدىڭ كوز جاسىنداي ءمولدىر ونەر. بۇگىنگى كۇن جاي عانا حالىقارالىق تەاتر كۇنى ەمەس, مىنا الەمدە جانى كىرلەپ, رۋحاني شولىركەگەن پەندەنىڭ جانى سايا تابار ورتاق قۇندىلىعىنىڭ, مەلپومەنانىڭ مەرەكەسى. وسى اماناتقا بار ءومىرىن ارناپ, ادال قىزمەت ەتىپ كەلە جاتقان ساحنا مايتالماندارى كورەرمەنىنە بۇگىن دە سول قايتالانباس ونەر قۋانىشىن تارتۋ ەتتى.
نازەركە جۇماباي,
«Egemen Qazaqstan»