ءساۋىر ايىنىڭ باسىندا الماتىداعى «شىمبۇلاق» تاۋ شاڭعىسى كۋرورتىندا كسرو-عا ەڭبەك سىڭىرگەن سپورت شەبەرى الەكساندرا ارتەمەنكونىڭ مەموريالى وتەدى.
ەگدە تارتقان جانكۇيەرلەرگە بۇل ەسىم جاقسى تانىس. 1928 جىلى رەسەيدىڭ كراسنودار ولكەسىندە تۋىپ-وسكەن ول كەيىننەن قازاقستانعا قونىس اۋداردى. الماتىداعى دەنە شىنىقتىرۋ ينستيتۋتىندا وقىپ ءجۇرىپ, تاۋ شاڭعىسىنان وتكەن كوپتەگەن جارىستاردا جەڭىس تۇعىرىنا كوتەرىلدى. اتاپ ايتساق, كسرو-نىڭ 11 دۇركىن چەمپيونى جانە 21 دۇركىن جۇلدەگەرى, رەسپۋبليكا بىرىنشىلىگىنىڭ 70 دۇركىن جەڭىمپازى اتاندى. وزگە دە ءدۇبىرلى دودالاردا ەل نامىسىن ابىرويلى قورعادى.
الەكساندرا ارتەمەنكو 1956 جىلى يتاليانىڭ كورتينا-د'امپەتستسو قالاسىندا الاۋى تۇتانعان وليمپيا ويىندارىنا قاتىستى. وسىلايشا, ونىڭ ەسىمى قىسقى عالامدىق دوداعا قاتىسقان قازاقستاننىڭ تۇڭعىش سپورتشىسى رەتىندە تاريحتا قالدى.
عالىم سۇلەيمەن,
«Egemen Qazaqstan»