ەلورداداعى جانتۇرشىگەرلىك جول اپاتى: اۆتوبۋستار جەدەل جاردەم كولىگىنە سوقتىعىسقان

«26 ناۋرىز كۇنى ۇلى دالا مەن قابانباي باتىر داڭعىلى قيىلىسىندا ءۇش اۆتوبۋستىڭ جانە جەڭىل كولىكتەردىڭ سوقتىعىسۋىمەن جول-كولىك وقيعاسى بولدى. قالا ماڭى باعدارىنداعى № 303 اۆتوبۋس № 12 باعدارداعى جولاۋشىلار كولىگىمەن سوقتىعىستى. وسىنىڭ ەكپىنىمەن ولار № 53 اۆتوبۋسقا جانە جەدەل جاردەم كولىگىنە بارىپ سوعىلدى», - دەدى «Astana LRT» جشس قوعاممەن بايلانىس دەپارتامەنتىنىڭ باسشىسى ناۋات ازانباەۆا.

وسى ورايدا ول اپاتتىڭ ءمان-جايى قازىرگى كەزدە ناقتىلانىپ جاتقانىن اتاپ ءوتتى.   «الدىن الا مالىمەت بويىنشا زارداپ شەككەن ادامدار بار. جول-كولىك وقيعاسى سالدارىنان 53-ءشى باعدار مەن بىرنەشە جەڭىل كولىك قاقتىعىستى. وقيعا بويىنشا قوسىمشا مالىمەتتى حابارلايتىن بولامىز»,  - دەدى ول.

ايتا كەتۋ كەرەك, ەلوردا پوليتسياسى كوز جۇمعان ادامدار تۋرالى اقپاراتتى راستادى.

ء«ۇش اۆتوبۋسقا قاتىستى جول-كولىك وقيعاسى تىركەلدى. اپاتتىڭ سەبەبى انىقتالۋدا. الدىن الا مالىمەت بويىنشا 303-ءشى باعداردىڭ جۇرگىزۋشىسى مەن جولاۋشىسى وقيعا ورنىندا كوز جۇمدى», - دەلىنگەن پوليتسيا دەپارتامەنتىنىڭ حابارلاماسىندا.