تاسادا قالعان «بايتەرەك»...

ازاماتتاردىڭ ماڭداي تەرىمەن تاپ­قان اقشالارىنا كەلىستى ەتىپ جاساتقان «بايتەرەك» اۋىلعا ءسان بەرىپ تۇراتىن. قازاق ەلىنىڭ سيمۆولىنا اينالعان بۇل «بايتەرەك» ماڭايىنان وتكەندەر وعان سۇيىسپەنشىلىكپەن قىزىعا قارايتىن.

بىلتىر وسى «بايتەرەك» ورنىنان الى­نىپ تاستالدى. سول ورىنعا تاعى دا اۋىلدان شىققان كاسىپكەرلەر ءوز قا­­را­­جاتىمەن «باق قۇسى» مونۋمەنتىن ور­­ناتتى. اۋدان اكىمى دوسماحانبەت اليەۆتىڭ ءوزى قاتىسىپ, ءسوز سويلەپ, لەن­تاسىن قيدى. جاڭاشىلدىققا قۇ­مار حالىقپىز عوي. بۇعان دا كوزىمىز ۇي­­رە­ن­دى.

ال بۇرىنعى «بايتەرەك» اۋىل­دىق­ مادەنيەت ءۇيىنىڭ الدىنا تۇر­­عى­زىلاتىنىن ەستىگەن جۇرت قاتتى قۋان­دى. كوپشىلىك ءجيى كەلەتىن ورىنعا قويى­لاتىن بولعان سوڭ اۋىل ازاماتتا­رى دا رازى بولىپ ەدىك. الايدا, ورنى­­نان الىنعان «بايتەرەكتى» كەرەكسىز دۇ­نيەدەي كولىككە ارتىپ, كوزدەن تاسالاۋ جەرگە اۋدارا سالعان. تەمىرلەرىنىڭ ءبى­راز جەرلەرى مايىسقان. ازداپ جون­دەۋ­دەن وتكىزسە بۇرىنعى قالپىنا كەل­تى­رۋگە بولادى.

ەلىمىزدىڭ سيمۆولىنا اينالعان «بايتەرەكتى» قالپىنا كەلتىرىپ, تۇر­عىزۋ جونىندە اۋىل وكرۋگىنىڭ اكىمى اسقار قۋانىشقا ايتىلعانىمەن, ول بۇل شارۋانى قولعا المادى. مىنە, وسىلايشا تاسادا قالعان «بايتەرەك» قاشانعا دەيىن جاتارى بەلگىسىز. 

كەزىندە مەكتەپ ءبىتىرىپ كەتكەن تۇ­لەكتەردىڭ اۋىزبىرشىلىگىمەن, ماڭداي تە­رىمەن تاپقان ادال اقشالارىنا تۇر­عىزعان, اۋىلعا ءسان بەرگەن, ەلدىڭ ماق­تا­نىشىنا اينالعان «بايتەرەكتىڭ» قۇ­لاعانى كوپشىلىكتىڭ كوڭىلىنە قاياۋ تۇ­سىرگەنى جاسىرىن ەمەس. سول ىسكە ات­­سا­­لىسقان ازاماتتاردىڭ اراسىندا بۇ­گىندە اللانىڭ جازۋىمەن و دۇ­نيە­لىك بولعاندار دا بار. ارتىندا قال­عان اتا-اناسى, باۋىرلارى سول بالا­لا­رى­نىڭ قولىنان شىققان «بايتە­رەگىن» ىز­دەۋدە. وسى ماسەلەگە كەلگەندە اكىم­شى­لىكتىڭ كوز جۇما قاراۋى كو­ڭىلگە قاياۋ تۇسىرەدى. بۇگىندە ەل اراسىندا «مۇنى سوققانداردىڭ وزدەرى بۇ­زىپ اكەت­كەلى جاتىر. قايتسىن؟ تەمى­رىن سا­­تىپ, باقيلىق بول­عاندارعا قۇ­ران با­عىش­­تاتۋدان باسقا امال­دارى قال­ماپ­تى» دەگەن ءسوز جەلدەي ەسۋدە.

وسىلايشا قولدا باردىڭ قادى­رىنە جەتە الماي وتىرعان جايىمىز­ بار.

سابەن قويشىباي

جامبىل وبلىسى 

تالاس اۋدانى,

اقكول اۋىلى