بۇگىن ورال قالاسىندا «Nur Otan» پارتياسى باتىس قازاقستان وبلىستىق فيليالى ۇيىمداستىرعان «قازاقستاننىڭ استاناسى – Nur-Sultan» اتتى وبلىستىق فورۋم ءوتتى.
فورۋمعا ستۋدەنت جاستار, ۇكىمەتتىك ەمەس ۇيىمدار بەلسەندىلەرى, قوعامدىق قوزعالىستار مەن پارتيالار وكىلدەرى, ۇلتتىق مادەني ورتالىقتار مۇشەلەرى, ەڭبەك ارداگەرلەرى قاتىستى. ولار قازاقستان رەسپۋبليكاسى استاناسىنىڭ جاڭا اتاۋىنا ءبىر اۋىزدان قولداۋ ءبىلدىردى.
جينالعاندار اتىنان ماحامبەت وتەمىس ۇلى اتىنداعى بقمۋ پروفەسسورى ابات قىدىرشاەۆ, ورال قالالىق №17 مەكتەپ ديرەكتورى تامارا رۋديچ, سامبودان الەم جانە ازيا چەمپيونى نۇربول سەرىكوۆ, «جاس وتان» جاستار قاناتىنىڭ توراعاسى نۇرعالي جولداسقاليەۆ ءسوز سويلەپ, قازاقستان رەسپۋبليكاسىنىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ ەسىمى ەل ورداسىنا بەرىلۋى تاريحي ادىلەتتىلىك ەكەنىن جەتكىزدى.
- وسىدان جەتى جىل بۇرىن ەلىمىزدە تۇڭعىش رەت پرەزيدەنت كۇنى اتالعاندا, ءوز وتباسىمدا مەرەكەلىك داستارحان جايىپ, ۇل-قىزدارىمدى, اعايىن-تۋمالارىمدى, نەمەرە-جيەندەرىمدى جيناپ, نۇرسۇلتان ءابىش ۇلىنىڭ ەلگە جاساپ جاتقان ەڭبەگىن اعالىق, اكەلىك, اتالىق نيەتىممەن ناسيحاتتاعان بولاتىنمىن. كەيىن وسى ءىسىمنىڭ جالعاسى رەتىندە شاكىرتتەرىمە دە ءجيى ايتىپ, ارنايى ماقالا دا جازدىم. ۇلت كوشباسشىسىنىڭ ۇلانعايىر ەڭبەگىن سانامالاپ جاتپاي-اق ەڭ نەگىزگى ەكى نارسەنى اتاپ ايتايىن. ونىڭ ءبىرى – ەلباسى جارلىعىمەن 1991 جىلى سەمەي يادرولىق پوليگونىنىڭ جابىلۋى. بۇل – بۇكىل دۇنيەجۇزىلىك ماڭىزى بار تەڭدەسسىز وقيعا بولاتىن. ەكىنشى – قازاق ەلىنىڭ بويتۇمارى ىسپەتتى استانا شاھارىنىڭ بوي كوتەرۋى دەر ەدىم. جاڭا بۋىننىڭ الەمدىك دەڭگەيدەگى ءبىلىم ساپاسىنا قول جەتكىزۋى, جەر-جەردە جوعارى وقۋ ورىندارى اشىلۋى دا ەلباسىنىڭ ەل بولاشاعىن قامداۋ جولىندا اتقارعان سانسىز ءىسىنىڭ ءبىرى, - دەدى پروفەسسور, پەداگوگيكا عىلىمدارىنىڭ دوكتورى, قازاقستان پەداگوگيكالىق عىلىمدار اكادەمياسىنىڭ اكادەميگى, قر جۋرناليستەر وداعىنىڭ مۇشەسى,«قر جوعارى وقۋ ورنىنىڭ ۇزدىك وقىتۋشىسى» اتاعىنىڭ ەكى مارتە يەگەرى, قر ءبىلىم بەرۋ ءىسىنىڭ قۇرمەتتى قىزمەتكەرى ابات قىدىرشاەۆ.
«قازاقستاننىڭ استاناسى – Nur-Sultan!», «مەنىڭ استانام - Nur-Sultan!» دەپ ۇرانداعان جاستار قازاقستان رەسپۋبليكاسىنىڭ مەملەكەتتىك تۋىن جەلبىرەتىپ, كەڭ زالدىڭ ءىشىن پاتريوتتىق ۇرانعا تولتىردى. فورۋم بارىسىندا كونتسەرتتىك باعدارلاما ۇسىنىلىپ, جينالعان جۇرت وبلىس ونەرپازدارىنىڭ ونەرىن تاماشالادى.
قازبەك قۇتتىمۇرات ۇلى,
«Egemen Qazaqstan»
سۋرەتتى تۇسىرگەن رافحات حالەلوۆ
باتىس قازاقستان