پرەزيدەنت قاسىم-جومارت توقاەۆتىڭ «قازاقستان رەسپۋبليكاسىنىڭ استاناسى – استانا قالاسىن قازاقستان رەسپۋبليكاسىنىڭ استاناسى – نۇر-سۇلتان قالاسى دەپ قايتا اتاۋ تۋرالى» جارلىعىن قاراعاندى وبلىسىنىڭ جۇرتشىلىعى زور قۇرمەت, ىستىق ىقىلاسپەن قابىل الدى. مۇنىڭ باستى سەبەبىنىڭ ءبىرى – قاراعاندىلىقتار تۇڭعىش پرەزيدەنتتىڭ تەمىرتاۋدا ەڭبەكپەن شىڭدالىپ, قازىنالى قاراعاندىدا قايراتكەر تۇلعا بولىپ قالىپتاسقانىن ورىندى ماقتان ەتەدى.
ەلباسىنىڭ ءوزى دە قاراعاندى توپىراعىن «ەڭبەك وتانىم» دەپ ۇلكەن تەبىرەنىسپەن, ايرىقشا قۇرمەتپەن اتايتىنى بەلگىلى. سوندىقتان دا بولار, جاڭا اتاۋدى قولداۋ جونىندەگى جالپىحالىقتىق سيپاتقا يە بولعان اكتسيا بارىسىندا قاراعاندىلىقتاردىڭ بەلسەندىلىگى وتە جوعارى دەڭگەيدە دەپ ايتۋعا بولادى.
كەشە كەنشىلەر قالاسىنداعى ورتالىق ساياباقتا استانا قالاسىنىڭ نۇر-سۇلتان بولىپ قايتا اتالۋىن قولداۋعا ارنالعان كونتسەرت ۇيىمداستىرىلدى. مادەني شارادا ەل ەستراداسىنىڭ تانىمال وكىلدەرى مەن جەرگىلىكتى انشىلەر ساياباققا جيىلعان جۇرتشىلىق الدىندا ونەر كورسەتتى.
سونىمەن قاتار, ەلباسى ءوزىنىڭ ەڭبەك جولىن باستاپ, شاربولاتتاي شىڭدالىپ شىققان بۇرىنعى قاراعاندى مەتاللۋرگيالىق كومبيناتىندا, قازىرگى «ارسەلورميتتال تەمىرتاۋ» كاسىپورنىندا دا اتالعان وزگەرىستەردى قولداعان ارنايى اكتسيا ۇيىمداستىرىلدى.
جالپى, استانا قالاسىنىڭ نۇر-سۇلتان قالاسى بولىپ قايتا اتالۋىن العاشقىلاردىڭ ءبىرى بولىپ قاراعاندى وبلىسىنىڭ سپورتشىلارى قولداعان بولاتىن. ولار اكتسيا بارىسىندا «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ءبىزدىڭ ەلگە سىڭىرگەن ەڭبەگى زور. ءبىز, قاراعاندى وبلىسىنىڭ سپورتشىلارى ەلباسىمىزعا قازاقستان سپورتىنا كورسەتكەن قولداۋى, مەملەكەتىمىزدى نىعايتۋ جولىنداعى ەڭبەگى ءۇشىن العىس ايتامىز. استانامىزدى تۇڭعىش پرەزيدەنت قۇرمەتىنە اتاۋ قۇپتارلىق شەشىم, بۇعان ەلباسىمىزدىڭ ەڭبەگى ءسىڭدى. قازاقستان سپورتشىلارىنىڭ ەسىمى تاريحقا التىن ارىپتەرمەن جازىلدى. ەگەر نۇرسۇلتان ءابىش ۇلى قولداۋ كورسەتپەگەندە, ءبىز مۇنداي جەڭىستەرگە جەتپەس ەدىك», دەگەن ۇندەۋ تاراتقان بولاتىن.
بۇدان بولەك, ءوڭىردىڭ ۇستازدار قاۋىمى مەن دەنساۋلىق سالاسىنىڭ قىزمەتكەرلەرى دە ءوز پىكىرلەرىن ءبىلدىرىپ, يگى وزگەرىستەردى شىن نيەتپەن قولدايتىندىقتارىن جەتكىزدى. مۇنداي باستاماعا وبلىستىڭ قالالارى مەن اۋداندارىنداعى ءتۇرلى سالانىڭ وكىلدەرى دە قىزۋ قولداۋ ءبىلدىرىپ, ءۇن قوستى.
مۇنداي يگى شارادان ايماقتىڭ جاستارى دا شەت قالمادى. مىسالى, وبلىس ورتالىعىنداعى جوعارى وقۋ ورىندارى مەن كوللەدجدەردىڭ ستۋدەنتتەرى تۇڭعىش پرەزيدەنت ءبىلىم العان قاراعاندى مەملەكەتتىك تەحنيكالىق ۋنيۆەرسيتەتىنىڭ الدىندا «ەلباسى, راحمەت» فلەشموبىن ۇيىمداستىردى. ستۋدەنت جاستار ساپ ءتۇزۋ ارقىلى«ەلباسى» دەگەن جازۋدى قۇراپ, بارلىعى ءبىراۋىزدان «راحمەت!» دەپ ۇرانداتتى.
«Nur-sultan – جاڭا ءداۋىر سيمۆولى بولۋعا ابدەن لايىق قالا», دەيدى بولاشاققا ۇمىتپەن قاراعان قاراعاندى حالقى – ەلباسىنىڭ ەڭبەك وتانىنىڭ تۇرعىندارى.
قايرات ءابىلدا,
«Egemen Qazaqstan»
قاراعاندى