قىزىلوردادا جالپى ءبىلىم بەرەتىن پاندەر بويىنشا رەسپۋبليكالىق وليمپيادا باستالدى

ن.بەكەجانوۆ اتىنداعى قىزىلوردا وبلىستىق مۋزىكالىق-دراما تەاترىندا جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ اشىلۋ سالتاناتى ءوتتى.

وبلىس اكىمى ق.كوشەرباەۆ وليمپيادا قاتىسۋشىلارىمەن كەزدەسىپ, «جاستاردىڭ ءبىلىمى, بىلىكتىلىگى مەن داعدىلارى – بارشا ۇلتتىڭ ەڭ ماڭىزدى ءارى قىمبات رەسۋرسى» ەكەنىن اتاپ ءوتتى.

«جوعارى بىلىكتى ماماندار دايارلاۋ ماسەلەسىندە ءبىلىم بەرۋ ساپاسىنىڭ  دەڭگەيىن كوتەرۋگە ءتيىسپىز. وبلىستىڭ سالا قىزمەتكەرلەرى مەكتەپ تۇلەكتەرىنىڭ كەم دەگەندە 50%  جوو تۇسىرۋگە قول جەتكىزۋى ءتيىس. ءبىز جىل سايىن از قامتىلعان جانە كوپ بالالى وتباسىلاردان شىققان بالالاردى ەڭبەك رەسۋرستارىنىڭ تەڭگەرىمىنە سايكەس وڭىردە سۇرانىسقا يە ماماندىقتار بويىنشا وبلىس اكىمىنىڭ گرانتى ەسەبىنەن ەلىمىزدىڭ جەتەكشى جوعارى وقۋ ورىندارىنا وقۋعا جىبەرەمىز. بيىل اتالمىش گرانت سانى 2 ەسەگە – 100-دەن 205-كە دەيىن ارتتى. وسىلايشا, بۇگىنگى تاڭدا مۇنداي گرانت يەگەرلەرىنىڭ سانى  900 جەتتى. ايتا كەتۋ كەرەك, اعىمداعى جىلدان باستاپ وبلىس اكىمى گرانتتارىنىڭ 70%  IT-ماماندىقتارعا باعىتتالادى»,- دەدى ايماق باسشىسى.

سونىمەن قاتار, 2014 جىلدان باستاپ ايماقتىڭ مەكتەپ تۇلەكتەرى ماسكەۋ مەن سانكت-پەتەربۋرگتىڭ ۇزدىك تەحنيكالىق  جوو  ءبىلىم الۋدا. العاشقى تۇلەكتەر وتكەن جىلدان باستاپ وڭىردەگى كاسىپورىنداردا جۇمىس ىستەپ, كەيبىرى ماگيستراتۋرادا وقۋلارىن جالعاستىرۋدا. ايتا كەتەرلىگى, ەكىنشى جىل قاتارىنان وبلىستاعى مەكتەپ تۇلەكتەرىنىڭ 97%  جوعارى وقۋ ورىندارى مەن كوللەدجدەرگە تۇسكەن, ولاردىڭ 58% مەملەكەتتىك گرانتقا يە بولدى.

سونداي-اق, وبلىس باسشىسى ءبىلىم بەرۋ سالاسىنا قاتىستى بىرقاتار جوسپارلارىمەن ءبولىستى.

"ەندى ءبىزدىڭ مىندەتىمىز - جاستاردى "ليگا پليۋششا" ۋنيۆەرسيتەتتەرىندە وقىتۋعا قول جەتكىزۋ. ەگەر ايقىن ماقساتتى مەجەلەپ, ناقتى مىندەتتەر قويىلماسا, ەش نارسەگە جەتۋ مۇمكىن ەمەس! تەحنولوگيالاردى قۇرۋ جانە پايدالانۋ, الەۋمەتتىك بەلسەندىلىك پەن كاسىپكەرلىك, كوممۋنيكاتسيا مەن ديزاين, سونداي-اق, مەكتەپ باعدارلاماسىنا كىرمەيتىن عىلىم سالالارىنداعى دارىنداردى قولداۋ ماقساتىندا  رەسەيدىڭ "كۆانتوريۋمدار" مەن "سيريۋستار" قۇرۋ بويىنشا تاجىريبەسىن زەردەلەيمىز. ولاردىڭ تاجىريبەسىن زەردەلەپ, جوعارى بىلىكتى ينجەنەر مامانداردى دايارلاۋعا, يننوۆاتسيالىق تەحنولوگيالار مەن يدەيالاردى ازىرلەۋگە, تەستىلەۋگە جانە ەنگىزۋگە باعىتتالعان تولىققاندى تەحنوپاركتەر قۇرعىمىز كەلەدى", - دەپ اتاپ ءوتتى وبلىس اكىمى.

ايتا كەتەيىك, بۇگىندە قىزىلوردا وبلىسىندا STEM-ەلەمەنتتەردى, عىلىمي يننوۆاتسيالار مەن ماتەماتيكالىق مودەلدەۋدى, روبوتوتەحنيكانى قامتيتىن 46 يننوۆاتسيالىق مەكتەپ جۇمىس ىستەيدى.

ءسوز سوڭىندا ق.كوشەرباەۆ وليمپيادا قاتىسۋشىلارىنا ساتتىلىك تىلەپ: ء«بىزدىڭ جاستارىمىزدىڭ اراسىندا دا اباي قۇنانباي ۇلىنداي اقىن-فيلوسوفتار, قانىش ساتباەۆتاي بىرەگەي عالىمدار, مۇحتار اۋەزوۆتەي ۇلى جازۋشىلار, بيلل گەيتس, يلون ماسك سەكىلدى يننوۆاتورلار ءجۇرۋى ابدەن مۇمكىن»,-دەدى.

سونىمەن قاتار, وقۋشىلاردى قر ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا قۇتتىقتاپ, ءىس-شارانىڭ جوعارى دەڭگەيدە ۇيىمداستىرىلعانىن جانە وليمپيادا ونلاين رەجيمدە وتكىزىلەتىنىن اتاپ ءوتتى.

"قىزىلوردا وبلىسىندا, سىردىڭ قاسيەتتى جەرىندە, تۇركى وركەنيەتىنىڭ بەسىگى, ويشىل قورقىت اتا مەكەن ەتكەن جەردە گۋمانيتارلىق پاندەر بويىنشا وليمپيادا ءوتۋى ەرەكشە مانگە يە. بيىل  "دارىن" رەسپۋبليكالىق عىلىمي-پراكتيكالىق ورتالىعىنىڭ قۇرىلعانىنا 20 جىل تولادى.  ورتالىقتى قۇرۋ يدەياسى سول كەزدەردە قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ باسشىلىعىندا وتىرعان, قازىرگى وبلىس اكىمى قىرىمبەك كوشەرباەۆقا تيەسىلى", - دەدى ۆيتسە-مينيستر.

ايتا كەتەيىك, 25-29 ناۋرىزدا قىزىلوردا وبلىسىندا قازاق, ورىس جانە شەت تىلدەرى, قۇقىق نەگىزدەرى جانە قازاقستان تاريحى بويىنشا وليمپيادانىڭ 2 كەزەڭى وتەدى. سونداي-اق, وليمپيادا قاتىسۋشىلارى قارماقشى اۋدانىندا ورنالاسقان قورقىت اتا مەموريالدىق كەشەنىندە وتەتىن جاستار فورۋمىنا قاتىسادى.

ءبىلىم دوداسىنىڭ قورىتىندىسى 29 ناۋرىزدا انىقتالىپ, جابىلۋ ءراسىمى وتكىزىلەدى.

ەستەرىڭىزگە سالا كەتەيىك, 17-19 ناۋرىز ارالىعىندا ناۋرىز مەيرامى قارساڭىندا قىزىلوردادا رەسپۋبليكانىڭ بارلىق ايماقتارىنان كەلگەن 200 جۋىق وقۋشىنىڭ قاتىسۋىمەن "عارىش. عىلىم. ينتەللەكت" تاقىرىبىندا IX ناۋرىز كەزدەسۋلەرى ءوتتى.