يلون ماسك: مارستا قالاشىق سالىنا باستاعانىن كورگىم كەلەدى

ول ءومىرىنىڭ سوڭىنا دەيىن مارستاعى قالاشىق قۇرىلىسىنىڭ باستالعانىن كورگىسى كەلەتىنىن اتاپ وتكەن. رەپورتاج ناۋرىز مەيرامىنان بۇرىن جاريالاندى.

جالپى, دجيم برايدەنستايننىڭ يلون ماسكپەن جاساعان ينتەرۆيۋىن SpaceX كومپانياسى Crew Dragon زىمىران تاسىعىشىن ۇشىراتىن كۇنى جاساعان. ياعني, ناۋرىز ايىنىڭ 2-ءسى كۇنى اتالعان سۇحبات ۇيىمداستىرىلسا كەرەك. سۇحبات بارىسىندا يلون ماسك ءوزىنىڭ مارسقا ۇشۋعا قاتىستى يدەيالارىمەن ءبولىستى. اتاپ ايتقاندا, عارىش تەحنولوگيالارىنىڭ ءبىر مارتە عانا قولدانىلاتىنى ماسكتىڭ كوڭىلىنەن شىقپايدى ەكەن. ول: ء«وزىڭىز ويلاڭىزشى, ءبىر رەت قانا قولدانىلاتىن ۇشاق بولسا شە؟ ونىڭ قانداي قىمبات بولارىن ەلەستەتە الار ما ەدىڭىز؟!» دەدى. ميللياردەر عارىش تەحنولوگيالارىن دا كوپ مارتە پايدالاناتىن كۇندەلىكتى جابدىقتار دەڭگەيىنە جەتكىزۋدى ارماندايتىن بولسا كەرەك. ونىڭ ايتۋىنشا كوپ مارتە پايدالانىلىلاتىن تەحنولوگيالار ءبىر رەت پايدالاناتىن زىمىراندار مەن اسپاپتاردان 100 ەسە ارزان بولاتىنىن ايتتى. ءوز كەزەگىندە دجيم برايدەنستاين اقش بۇدان بىلاي ايدى زەرتتەۋ ىسىنە مۇقيات كوڭىل بولەتىنىن, وعان بۇرىڭعىداي بارىپ قانا قايتپاي, وندا عىلىمي بازالار ورنالاستىرىپ, اي بەتىنەن عارىشتى زەرتتەۋ ءىسىن جالعاستىراتىنىن تىلگە تيەك ەتتى. ينتەرۆيۋ بارىسىندا دجيم برەيدەنستاين اقش بيىلدان قالماي عارىشكەرلەردى جاڭا زىمىراندارمەن ۇشىراتىنىن ايتتى. Connersial crew باعدارلاماسى ارقىلى حالىقارالىق عارىش ستانساسىنا بىرنەشە عارىشكەر بارۋى مۇمكىن. بىراق, ناقتى قاي مەزگىلدە ۇشاتىنىن ايتقان جوق.

ەڭ قىزىعى يلون ماسك ادامزاتتى عارىشتىق وركەنيەت رەتىندە, مۋلتيپلانەتارلىق ءتۇر رەتىندە كورگىسى كەلەدى ەكەن. ءاۋ باستا بيزنەسمەن رەسەيگە بارىپ قۇرلىقارالىق بالليستيكالىق زىمىراندار ساتىپ الماق بولعان. يادرولىق وقتۇمسىقتارى جوق زىمىراندار ارقىلى ماسك عارىشتى يگەرۋدى كوزدەگەن. الايدا رەسەيلىكتەر ميللياردەردىڭ سۇراعاندارىن تىم قىمباتقا باعالاعاندىقتان, بيزنەسمەن زىمىران جاسايتىن كومپانيا قۇرۋعا بەل بايلاپتى. «ولار ءتىپتى مەنىڭ بار قازىنام جەتپەيتىندەي اقى سۇرادى. ايتپەسە, ءاۋ باستا زىمىران قۇراستىراتىن كومپانيا قۇرۋ ويىمدا جوق ەدى», - دەيدى يلون ماسك. ال YouTube-تە جاريالانعان بەينەجازباعا پىكىر قالدىرعان ازاماتتار اراسىندا رەسەيلىك شەنەۋنىكتەردى اجۋاعا اينالدىرعاندار دا بار.

كورەرمەننىڭ ءبىرى «روسكوسموس-قا راحمەت, ولار بولماعاندا Space X پەن Tesla دۇنيەگە كەلمەس ەدى. ال, «روسكوسموس» قازىر جەرگە قاراپ وتىر»,- دەپ جازسا, تاعى ءبىر كورەرمەن «يلون ماكستى كورگەندە عارىشقا دەگەن قۇمارلىعى ءبىر ساتكە دە كەمىمەگەن, بويىن ەنتۋزيازم كەرنەگەن سەرگەي كورولەۆ ەسىمە تۇسەدى», - دەپ جازدى.

يلون ماسك Falcon زىمىراندارىن العاش سىناقتان وتكىزە باستاعان كەزدە NASA-نىڭ قولداۋىنا سۇيەنگەنىن ايتتى. بيزنەسمەن ءوز قارجىسىنىڭ العاشقى ءۇش زىمىراندى جاساۋعا عانا جەتكەنىن, ءتورتىنشىسىن جاساۋ ءۇشىن ارىپتەستەرى قولدارىندا باردىڭ بارلىعىن ورتاعا سالعانىن ايتتى. ال ءتورت سىناقتىڭ العاشقى ۇشەۋى ءساتسىز بولعان. ءتورتىنشى زىمىران عانا يلون ماسكتىڭ قازىرگى تابىستى جولىنىڭ العاشقى قادامى بولىپتى. ال قازىرگى ارمانى مارستا قالاشىق سالۋ بولسا كەرەك. بيزنەسمەن «مارستا قالاشىق سالۋ جۇمىسىنىڭ باستالعانىن كورۋگە ءومىرىم جەتسە, ەڭ ۇلكەن باقىتى سول بولار ەدى» دەدى.

امانگەلدى قۇرمەت, 

«ەگەمەن قازاقستان»