پارلامەنت پالاتالارىنىڭ بىرلەسكەن وتىرىسىندا استانانىڭ اتاۋىن نۇرسۇلتان قالاسىنا وزگەرتۋ تۋرالى زاڭ جوباسى ەكى وقىلىمدا قابىلداندى. بۇل تۋرالى قازاقپارات حابارلادى.
«مەملەكەت باسشىسى كونستيتۋتسيانىڭ 91-بابىنىڭ 1-تارماعىنا سايكەس, پارلامەنتتىڭ قاراۋىنا «قر كونستيتۋتسياسىنا وزگەرىستەر ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن ەنگىزدى. بۇل جوبا رەسپۋبليكا استاناسىنىڭ اتاۋىن استانا قالاسىنان نۇرسۇلتان قالاسىنا وزگەرتۋدى كوزدەيدى. «قر كونستيتۋتسياسىنا سايكەس, ۇكىمەت اتا زاڭىمىزعا استانانىڭ اتاۋىن وزگەرتۋ تۋرالى تۇزەتۋ ەنگىزۋ ءۇشىن رەسپۋبليكالىق رەفەرەندۋم وتكىزۋ جونىندە قر پرەزيدەنتىنە ۇسىنىس جاسادى. پرەزيدەنت بۇل ۇسىنىستى رەفەرەندۋمعا شىعارماي, پارلامەنتتىڭ قاراۋىنا جىبەرۋ تۋرالى شەشىم قابىلدادى. بۇل ماسەلە بويىنشا كونستيتۋتسيالىق كەڭەس ءوزىنىڭ وڭ قورىتىندىسىن دا بەردى» دەدى پارلامەنت ءماجىلىسىنىڭ توراعاسى نۇرلان نىعماتۋلين.
بىرلەسكەن وتىرىس بارىسىنداعى تالقىلاۋدان كەيىن دەپۋتاتتار ءبىراۋىزدان استانانىڭ اتاۋىن نۇرسۇلتان قالاسىنا وزگەرتۋ تۋرالى شەشىمدى قابىلدادى. بۇدان بۇرىن حابارلانعانداي, پرەزيدەنت مىندەتىن ۋاقىتشا اتقارۋعا كىرىسكەن قاسىم-جومارت توقاەۆ استانا قالاسىنىڭ اتاۋىن نۇرسۇلتان دەپ وزگەرتۋ تۋرالى ۇسىنىس جاسادى.