قۇرمەتتى نۇرسۇلتان ءابىش ۇلى!
«اتامەكەن» قر ۇلتتىق كاسىپكەرلەر پالاتاسى ەلىمىزدىڭ بارلىق بيزنەس-قاۋىمداستىعى اتىنان وتاندىق كاسىپكەرلىككە تانىتىپ وتىرعان ءار قولداۋىڭىزعا اسا قۇرمەت پەن شەكسىز العىسىمىزدى بىلدىرۋگە رۇقسات ەتىڭىز!
ەگەمەندىگىمىزدى الىپ, مەملەكەتىمىزدى كوركەيتىپ, الەمنىڭ باسەكەگە قابىلەتتى 50 ەلىنىڭ قاتارىنا ەنگىزۋ جولىنداعى جاسالعان ءار سىندارلى قادام - قازاقستاننىڭ تۇڭعىش پرەزيدەنتىنىڭ ەنشىسىندە ەكەنى ءسوزسىز. بۇل جولداعى جەتكەن ءار جەتىستىككە تەك ەلىمىز عانا ەمەس, بارشا الەم كۋا.
ەكونوميكانى دامىتۋداعى العاشقى قادامدار, اۋقىمى كەڭ قاجەتتى رەفورمالار - مۇنىڭ بارلىعى بۇگىنگى كورسەتكىشتەرگە جەتۋ جولىنداعى ءسىز قابىلداعان ساليقالى شەشىمدەردىڭ ناتيجەسى. ەلگە جاڭا باعىت-باعدار بەرۋ, كەڭەستىك داۋىردەن كەيىنگى العاشقى جىلدارى نارىقتىق ەكونوميكاعا سۇرىنبەي ءوتۋ ۇلكەن قاجىرلىقتى قاجەت ەتكەن باتىل قادامدار.
كاسىپكەرلىككە بەت بۇرۋ, وسى باعىتتا حالىققا بارىنشا قولداۋ كورسەتىپ, بيزنەستەگى العاشقى قادامدارعا جول اشقان مەملەكەتتىك باعدارلامالاردى قابىلداۋعا قاتىستى ءار قولداۋىڭىزدى ريزاشىلىقپەن قابىلدادىق. بۇل باعدارلامالاردىڭ بارلىعى ىسكەرلىك احۋالدى جاقسارتىپ, ەلىمىزگە ينۆەستيتسيا تارتىپ, جەكە كاسىبىن اشقىسى كەلگەن ازاماتتار سانىن ارتتىرۋعا سەپتىگىن تيگىزدى. تاۋەلسىزدىك جىلدارى ەلىمىزدە مىڭداعان جاڭا كاسىپورىن مەن بيزنەس-جوبالار ىسكە قوسىلدى. ميلليونداعان ازامات جەكە كاسىبىن اشىپ, تۇراقتى تابىس كوزىن قامتاماسىز ەتتى.
نۇرسۇلتان ءابىش ۇلى, ءسىزدىڭ باستاماڭىزبەن قازاقستاندا «اتامەكەن» ۇلتتىق كاسىپكەرلەر پالاتاسى قۇرىلدى. وسىلايشا, وتاندىق كاسىپكەرلەردىڭ ورتاق شاڭىراعىنا اينالىپ, الەمدىك نارىقتا ەل بيزنەسىنىڭ تەڭ دارەجەدە ءوزىن تانىتۋىنا بار مۇمكىندىكتەر جاسالدى.
ءسىزدىڭ ۇستانعان سىندارلى ساياساتىڭىزدىڭ ارقاسىندا ەلىمىزدە كاسىپكەرلىكپەن اينالىسامىن دەگەن ازاماتتارعا تەڭدەسىز مۇمكىندىكتەر جاسالىپ, قازاقستاننىڭ بيزنەسكە قولايلى جاعدايدى قالىپتاستىرعانى ەلەنىپ, الەمدىك Doing Business رەيتىنگىسىندە الدىڭعى وتىز ەلدىڭ قاتارىنا ەندى.
بۇگىندە ەلىمىزدە 1,2 ميلليوننان استام كاسىپكەر بيزنەسىن جۇرگىزۋدە. بۇل, ەڭ الدىمەن, ءسىزدىڭ جۇرگىزگەن ەكونوميكالىق رەفورمالارىڭىزدىڭ ناتيجەسى!
قاراپايىم مەتاللۋرگتان باستالعان ەڭبەك جولىڭىز بارشامىزعا ەڭبەككە دەگەن ادالدىقتى, وتانعا دەگەن قۇرمەتتى دارىپتەيتىن باعا جەتپەس ۇلگى! ءبىر عانا ءسىزدىڭ ءومىر جولىڭىز ميلليونداعان وتانداسىمىزدىڭ جارقىن بولاشاققا, ءوزىنىڭ قابىلەتى مەن مۇمكىندىگىنە دەگەن سەنىمىن ەسەلەي تۇستەتىنىن اتاپ وتكىمىز كەلەدى.
ءبىز, قازاقستان كاسىپكەرلەرى ەلىمىزدىڭ دامۋ باعىتى ءسىز سالعان سارا جولمەن جۇرەتىنىنە سەنىمدىمىز. كەز كەلگەن ۇلكەن ءىستىڭ قالاي داميتىنىن العاشقى قادامدار ايقىندايدى. كەز كەلگەن مەملەكەتتىڭ ەكونوميكاسى ونىڭ بيزنەسىنىڭ دامۋىمەن تىكەلەي بايلانىستى. ال بيزنەستىڭ تۇراقتى دامۋىن قامتاماسىز ەتەتىن ەلىمىزدەگى باستى تۇعىردى ءسىز قالاپ بەردىڭىز!
قۇرمەتتى نۇرسۇلتان ءابىش ۇلى, بيزنەس-قاۋىمداستىق ءسىز ارتقان مىندەتتەردى, قوعام الدىنداعى الەۋمەتتىك جاۋاپكەرشىلىگىن تولىق سەزىنەتىنىن, ءسىز انىقتاپ بەرگەن ەلدىڭ ستراتەگيالىق ماقساتتارىن ورىنداۋدا بار كۇش-جىگەرىن سالاتىنىن ايتقىمىز كەلەدى.
سىزگە زور دەنساۋلىق, بارلىق ىسىڭىزگە ساتتىلىك پەن ۇزاق عۇمىر تىلەيمىز! ءسىزدىڭ ومىرلىك تاجىريبەڭىز بەن دانالىعىڭىز قازاقستاننىڭ ءارى قاراي وركەندەۋىنە cەرپىن بەرەتىنىنە نىق سەنىمدىمىز!
اسا قۇرمەتپەن, قر «اتامەكەن» ۇلتتىق كاسىپكەرلەر پالاتاسى