ەلشىمەن بىرگە دەلەگاتسيا قۇرامىندا فرانتسۋزدىڭ ءىرى جانە بىرلەسكەن قازاقستان-فرانتسۋز كومپانيالارىنىڭ وكىلدەرى كەلدى. بۇل تۋرالى قوستاناي اكىمدىگىنىڭ ءباسپاسوز قىزمەتى حابارلادى.
كەلگەن ساپارلارىنىڭ ماقساتى قوستاناي وبلىسىنا ارنالعان ينۆەستيتسيالىق جوبالاردى ۇسىنۋ بولاتىن.
قوناقتاردى ىستىق ىقىلىسپەن قارسى العان ارحيمەد مۇحامبەتوۆ, قوستاناي وبلىسى مەن فرانتسيانىڭ اراسىنداعى 2018 جىلعى تاۋار اينالىمى 2 ملن. استام اقش دوللارىن قۇراپ وتىرعانىن حابارلادى. «ارينە, بۇل وتە ۇلكەن اينالىم ەمەس, بىراق ءبىز ءوسىپ كەلەمىز» دەپ مالىمدەدى وبلىس اكىمى.
مىسال رەتىندە ا.مۇحامبەتوۆ «سارىارقااۆتوپروم» جشس-نە سىلتەمە جاساپ, ونىڭ نەگىزىندە فرانتسۋزدىق «Peugeot» ماركالى اۆتوكولىكتەرى شىعارىلاتىنىن ايتتى.
ءوز جوبالارىن «وترادا» (قازاقستانداعى تۇقىمدىق شوشقا ءوسىرۋ كومپانياسىن قۇرۋ جانە جەرگىلىكتى نارىققا جەتكىزۋ, قىتايعا ەكسپورتتاۋ) جانە «ەۆروكوپتەر كازاحستان ينجينيرينگ» (تىكۇشاقتاردى جاساۋ جانە جەتكىزۋ) كومپانيالارى تانىستىردى.
ء«بىز يندۋستريالدى ايماقتا, سونداي-اق وبلىستىڭ باسقا دا ايماقتارىندا ءوندىرىس ورىندارىن ورنالاستىرۋعا قىزىعۋشىلىق تانىتقان فرانتسۋز ينۆەستورلارىنىڭ ۇسىنىستارىن قاراستىرۋعا جانە ولاردى قولداۋعا دايىنبىز» دەپ تۇيىندەدى وبلىس اكىمى.