پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى, ساياسي عىلىمدار دوكتورى سانات كوشكىمباەۆ ەلباسىنىڭ قابىلداعان شەشىمىنە قاتىستى پىكىر ءبىلدىردى.
كەشە ەلباسى نۇرسۇلتان نازارباەۆ ەلىمىزدىڭ بولاشاعىنا قاتىستى اسا ماڭىزدى ءارى تاريحي مالىمدەمە جاساپ, ءوزىنىڭ پرەزيدەنتتىك وكىلەتتىگىن توقتاتاتىنىن ايتتى. بۇل ءدال وسى كەزەڭدە ەل كۇتپەگەن, بىراق قازاقستاننىڭ دامۋ ستراتەگياسىن الداعى بىرنەشە جىلدى ەسەپكە الا وتىرىپ انىقتاعان ۇلى ساياساتكەردىڭ شەشىمى. ويتكەنى تەك ەلىنىڭ بولاشاعىن ويلايتىن جاۋاپكەرشىلىگى جوعارى ساياساتكەرلەر عانا ءدال وسىنداي شەشىمدەردى قابىلداپ, قادام جاساي الادى. ونىڭ ۇستىنە قازاقستاننىڭ تۇڭعىش پرەزيدەنتى قازىرگى تاۋەلسىز قازاقستاننىڭ نەگىزىن سالۋشى رەتىندە جانە ونىڭ بەلسەندى ءىس-ارەكەتتەرى مەن قىزمەتىنىڭ ارقاسىندا, داڭقتى جولى ارقىلى ەلىمىز حالىقارالىق دەڭگەيدە مەملەكەت رەتىندە مويىندالدى. قازاقستاندى تەك كورشىلەر عانا ەمەس, الەمدىك گراندتار – دەرجاۆالار مويىندادى. وعان قوسا, ەلباسىن ءار جىلدارى الەمدىك ساياساتتىڭ سايىپقىراندارى جوعارى باعالاعاندىعىن ەسكەرۋ كەرەك. ونىڭ ىشىندە مارگارەت تەتچەر پرەزيدەنت نۇرسۇلتان نازارباەۆتىڭ الەمدىك ساياساتقا قوسقان ۇلەسىن جوعارى باعالاپ, ەلباسىن الەمنىڭ ەڭ داڭقتى 5-6 ساياساتكەرىنىڭ قاتارىنا قوسقاندىعىن كۇللى الەم بىلەدى. سونداي-اق كەزىندە ۇلكەن دجوردج بۋشتىڭ ءوزى نۇرسۇلتان نازارباەۆقا قۇشاعىن ايقارا اشىپ, ءبىزدىڭ پرەزيدەنتتىڭ مارتەبەسىن جوعارى باعالاعانى ەستە.
سونىمەن قاتار نۇرسۇلتان نازارباەۆتى سينگاپۋردىڭ تۇڭعىش پرەمەر-ءمينيسترى لي كۋان يۋ جانە قىتايدىڭ قازىرگى رەفورمالارىنىڭ اكەسى دەن سياوپينمەن سالىستىرا الامىز. قىتايلىق ساياساتكەر ەلدە جوعارى لاۋازىمدا بولماسا دا, قىتايدىڭ زاماناۋي رەفورمالارىنىڭ اكەسى دەپ باعالاۋعا تۇرارلىق تۇلعا. بيىل قىتايلىقتار وسى اشىق رەفورمالارىنىڭ جۇرگىزىلە باستاۋىنىڭ 40 جىلدىعىن اتاپ وتەدى.
ونىڭ ۇستىنە سينگاپۋر, قىتاي سياقتى قازىرگى الىپ مەملەكەتتەر نۇرسۇلتان نازارباەۆ سياقتى ۇلى تۇلعالارىنىڭ ارقاسىندا ءوسىپ-ءوندى.
سوندىقتان دا نۇرسۇلتان نازارباەۆتىڭ قازاقستان تاريحىنداعى ءرولى بۇل تۇلعالاردان ەش كەم تۇسپەيدى. ول قازىرگى ەكونوميكالىق دامۋ مودەلىنىڭ ارحيتەكتورى ەكەندىگىندە داۋ جوق. تاريحتا, ساياساتتا نازارباەۆ مودەلىنىڭ تابىستىلىعى, تيىمدىلىگى مەن ونىمدىلىگى دالەلدەنىپ وتىر. قيىن ۋاقىتتاردا ەكونوميكالىق داعدارىستار, گەوساياسي كۇيزەلىستەر نازارباەۆتىڭ باسشىلىعىنىڭ ارقاسىندا ءبىزدىڭ ەلىمىزگە اسا زالالىن تيگىزە قويعان جوق. ورتالىق ازيا اۋماعىندا ناعىز كوشباسشىعا اينالىپ, ەلدەگى, وڭىردەگى تۇراقتىلىق پەن قاۋىپسىزدىك كەپىلى بولا ءبىلدى.
ەڭ باستىسى, ەلباسى – قازاقستاننىڭ تۇڭعىش پرەزيدەنتىنىڭ ەل دامۋىنداعى ءرولى ارتا تۇسپەك. نۇرسۇلتان نازارباەۆتىڭ قاۋىپسىزدىك كەڭەسىنىڭ توراعاسى رەتىندە قىزمەتىن جالعاستىرۋى ەرتەڭگە سەنىمدى نىعايتا تۇسەدى.