وتكەن اپتادا ۇلىبريتانيادا ۇيىمداستىرىلعان لوندون كىتاپ كورمەسىندە (London Book Fair) قازىرگى قازاقستاندىق باسپا سالاسىنىڭ تۋىندىلارى تانىستىرىلدى. جوبا اياسىندا «ۇلتتىق اۋدارما بيۋروسى» قوعامدىق قورى قازاقستاننىڭ ۇلىبريتانيا جانە سولتۇستىك يرلاندياداعى ەلشىلىگىنىڭ قولداۋىمەن وتاندىق باسپالاردان سوڭعى جىلدارى جارىققا شىققان كىتاپتارىن قالىڭ وقىرمان نازارىنا ۇسىندى.
ايتۋلى جوبا مەملەكەت باسشىسى نۇرسۇلتان نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ باستى باعىتتارىنىڭ ءبىرى سانالاتىن «جاھانداعى زاماناۋي قازاقستاندىق مادەنيەت» جوباسى نەگىزىندە جۇزەگە اسىرىلدى. قازىرگى قازاق ادەبيەتى ۇلگىلەرىن بۇۇ-نىڭ 6 تىلىنە اۋدارۋدى ماقسات تۇتقان اۋقىمدى جيناققا پروزا جانە پوەزيا باعىتتارى بويىنشا بارلىعى 60 اۆتوردىڭ شىعارماسى ەندى.
«بۇل – بريتانيا جانە باتىس حالقىن ادەبيەتىمىز ارقىلى ەلىمىزدىڭ تاريحى مەن مادەنيەتىن تانىستىرۋعا باعىتتالعان وتە ماڭىزدى جوبا. ەلشى رەتىندە قازاقستانعا دەگەن قىزىعۋشىلىقتىڭ كۇن ساناپ ارتىپ جاتقانىن كورۋ – مەن ءۇشىن ۇلكەن قۋانىش. بۇل جوبا وسىنداي قىزىعۋشىلىقتى ءارى قاراي ارتتىرىپ, نىعايتا تۇسەتىن كاتاليزاتور بولادى دەگەن سەنىمدەمىن», دەدى ە.ىدىرىسوۆ.
كورمە شەڭبەرىندە حالىقارالىق ءىرى باسپا ۇيىمدارىنىڭ وكىلدەرىمەن قازاقستاندا ىسكە اسىپ جاتقان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ بارىسى تالقىلاندى. اتاپ ايتساق, «Cambridge University Press», «Oxford University Press», «Pearson» جانە وزگە دە تانىمال باسپالار جاڭا وقۋلىقتارى مەن كىتاپتارىن «ۇلتتىق اۋدارما بيۋروسىنا» تانىستىرىپ, ولاردى اۋدارما جوباسىنا قوسۋدى ۇسىندى.
سونداي-اق, ايتۋلى كىتاپ كورمەسىندە «اتامۇرا» كورپوراتسياسىنىڭ «Kazakhstan Geography. Atlas», «Dombyra», «The Kazakh Customs and Traditions», «Flowers of Kazakhstan», «The traditions of the Kazakh dastarkhan», «مەكتەپ» باسپاسىنىڭ «Kazakh Ornament», «الماتىكىتاپ» باسپاسىنىڭ «Alpamys Batyr», «Koblandy Batyr», «Kozy Korpesh – Bayan Sulu», «National Clothes of Kazakh People», «Felt Art of Kazakhs» سياقتى قازاق جانە اعىلشىن تىلدەرىندە باسىلعان قازاق مادەنيەتىنىڭ ءتۇرلى اسپەكتىلەرى جايىنداعى تانىمدىق باسىلىمدارى بريتاندىق وقىرمانداردىڭ قىزىعۋشىلىعىن تۋدىردى. اسىرەسە «ۇلتتىق اۋدارما بيۋروسى» ۇسىنعان ءىلياس جانسۇگىروۆتىڭ اعىلشىن تىلىنە تۇڭعىش رەت اۋدارىلعان «قۇلاگەر» پوەماسى كوپشىلىكتىڭ سۇرانىسىنا يە بولدى. ۇلتتىق اۋدارما بيۋروسى قارجىلاندىرعان بۇل باسىلىمنىڭ اعىلشىن تىلىندەگى اۋدارماسىن بريتاندىق اقىن بەليندا كۋك جاسادى.
جيناقتاردىڭ اعىلشىن تىلىندەگى نۇسقاسى وسى جىلدىڭ قىركۇيەگىندە جارىققا شىعادى دەپ جوسپارلانعان. ونى اعىلشىن تىلىنە اۋدارۋ, باسىپ شىعارۋ جانە تاراتۋ جۇمىسىمەن «Cambridge University Press» باسپا ءۇيى اينالىسادى. تانىمال ۋنيۆەرسيتەت باسپاسى جوباعا تاجىريبەلى اۋدارماشىلار مەن بەدەلدى ادەبيەتشى مامانداردى تارتقان. وزگە تىلدەردەگى انتولوگيالاردى اۋدارىپ باسۋ جانە ناسيحاتتاۋ ىسىنە يسپانيا, قىتاي, مىسىر, رەسەي جانە فرانتسيا مەملەكەتتەرىنىڭ جەتەكشى باسپا ۇيىمدارى اتسالىسادى. ايتۋلى جوبا كەلەشەكتە وتاندىق باسپا وكىلدەرىنىڭ حالىقارالىق ءىرى باسپا ۇيىمدارىمەن جان-جاقتى ءارى ءونىمدى قارىم-قاتىناس ورناتۋىنا كەڭ جول اشادى دەپ كۇتىلۋدە.
نازەركە جۇماباي,
«ەgemen Qazaqstan»