م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى, قازاقستاننىڭ ەڭبەك سىڭىرگەن قايراتكەرى, الماتى قالالىق ءماسليحاتىنىڭ دەپۋتاتى كەنجەحان ماتىجانوۆ ەلباسىنىڭ قابىلداعان شەشىمىنە قاتىستى پىكىر ءبىلدىردى.
نۇرسۇلتان نازارباەۆ شىن مانىندەگى ەلباسى دەگەن ارداقتى اتقا لايىق كەمەڭگەر ساياساتكەر ەكەنىن تاعى دا ءبىر دالەلدەدى.
وتىز جىلعا جۋىق مەملەكەت باسىندا بولىپ, قانشاما قيىن-قىستاۋ جاعدايلاردان شاشاسىنا شاڭ جۇقتىرماي شىعا بىلگەن, قازاقستاندى تاۋەلسىزدىك تۇعىرىنا «ماڭگىلىككە» قوندىرىپ, الەمدىك وركەنيەت كوشىنىڭ الدىڭعى لەگىنە قوسقان تارلان تۇلعا بۇل جولى دا پاراسات بيىگىنەن تانىلا ءبىلدى. بۇل – الەمدىك وركەنيەتتىڭ وزىق ۇلگىسى. وسى تاريحي شەشىم ارقىلى ول ءوزىنىڭ ادامزاتتىق قۇندىلىقتارعا, الەمدىك دەموكراتيالىق ۇردىسكە, ۇلتتىق مۇددەگە ادال الەمدىك دەڭگەيدەگى تۇلعا ەكەندىگىن دالەلدەدى.
نۇرسۇلتان نازارباەۆ باسشىلىعى كەزىندە ەلىمىزدىڭ ءبىلىم, مادەنيەت, ۇلتتىق رۋحىنىڭ قانشالىقتى تۇلەپ وسكەندىگىن تاراتا ايتساق, تالاي تومعا جۇك بولار ەدى. تاۋەلسىزدىك داۋىرىندە الەمدىك ءبىلىم نارىنەن سۋسىنداعان, ەركىن, تاۋەلسىز, مۇلدە جاڭا ۇرپاق دۇنيەگە كەلدى. ون جىل بويىنا قازاق ادەبيەتى مەن ونەرىن, تاريحىن تۇگەندەگەن «مادەني مۇرا» باعدارلاماسى بويىنشا ۇلان-عايىر شارۋالار اتقارىلدى. وسى ۋاقىت ارالىعىندا قازاقستان ارحەولوگياسىنىڭ وركەندەگەنى سونداي, رەسپۋبليكا كولەمىندە بەس «التىن ادام» تابىلعان ەكەن. ال قانشاما مادەني ەسكەرتكىشتەر قالپىنا كەلتىرىلىپ, سانداعان مۋزەيلەر ەسىكتەرىن ايقارا اشتى! استانا قالاسىنداعى الەمدىك ساۋلەت ونەرىنىڭ ۇلگىسىندەگى مادەني وشاقتار قازاق ونەرىنىڭ شالقارىن كەڭەيتىپ تۇر. «بولاشاققا باعدار: رۋحاني جاڭعىرۋ» اتتى باعدارلامالىق ماقالادان باستاۋ العان قازاق ءالىپبيىن لاتىن نەگىزىنە كوشىرۋ, الەمدەگى ەڭ وزىق ءجۇز وقۋلىقتى قازاق تىلىندە سويلەتۋ, قازاقتىڭ كيەلى جەرلەرى, تۋعان جەرگە تاعزىم, قازاقستاننىڭ 100 جاڭا تۇلعاسى سياقتى قوعامدىق سانانى جاڭا بەلەسكە كوتەرەتىن قانشاما كەلەلى ىستەر قولعا الىندى. وسى يگىلىكتى ءىستىڭ زاڭدى جالعاسى بولعان « ۇلى دالانىڭ جەتى قىرى» اتتى ماقالاسىنىڭ وزىندە قانشاما تەرەڭ ويلار مەن كەلەشەگى كەمەل شارۋالار جاتىر. ءبىر عانا «دالا فولكلورىنىڭ انتولوگياسى» مەن « ۇلى دالانىڭ كونە سارىندارى» جيناعىن زاماناۋي تەحنولوگيامەن جارىققا شىعارۋدىڭ ءوزى ادەبيەت پەن ونەر ماماندارىنا ۇلكەن جاۋاپكەرشىلىك جۇكتەپ وتىر. وسىنىڭ ءوزى-اق ەلباسىنىڭ جاس ۇرپاققا الپەشتەپ, ايالاپ ۇستايتىن قۇنارلى اسىل مۇرا قالدىرعانىنىڭ ايعاعى. ول ءوز ەڭبەكتەرى ارقىلى ءبىز قاستەرلەپ ايتاتىن «ماڭگىلىك ەل», « ۇلى دالا ەلى», «قازاق ەلى» سياقتى قاسيەتتى ۇعىمداردى سانامىزعا سىڭىرە ءبىلدى. سول ارقىلى ۇلتتىڭ رۋحىن كوتەرىپ, كەمەل كەلەشەككە دەگەن سەنىمىن ۇيالاتتى.
دەمەك, نۇرسۇلتان نازارباەۆ ەڭبەكتەرىندە تەرەڭنەن تارتىپ, كەلەشەككە قاراي التىن ارقاۋ بولىپ تارتىلعان ۇلتتىق سانانىڭ ۇزاق وركەندەۋ جولى جاتىر. قازاقستاننىڭ تاريحىن تۇگەندەپ, بۇگىنىن بەكەمدەپ, ەرتەڭىنە باعدار تۇزە بىلگەن تۇلعاعا قۇرمەت كورسەتۋ بيىك مادەنيەت بەلگىسى بولۋ كەرەك. ەلباسى سونداي قۇرمەتكە لايىق ەكەندىگىن تاعى ءبىر تانىتىپ وتىر.