كەيدە كەيبىر باسشىلاردىڭ وزىنە ارتىلعان مىندەتتى باسقاشا ءتۇسىنىپ, كەلگەن باقتى كوتەرە الماي كەرى كەتەتىن ادەتى بولادى. كوبىنەسە باسشىلىق دەگەندى وزگەگە سەس كورسەتۋ, وزىنەن تومەنگە قىرىن قاراۋ دەپ ءتۇسىنۋ دە ادامدى جارعا جىعاتىن كەسەل. ماسەلەن, مۇنداي كەلەڭسىز كورىنىستەر قوعامدا جاپپاي بولماسا دا, ارا-تۇرا بوي كورسەتىپ قالادى. بۇل جەردە وزىنە سەنىپ تاپسىرىلعان جاۋاپكەرشىلىكتى جۇرە سەزىنۋ, قول استىنداعى ازاماتتارمەن ورتاق ءتىل تابىسا الماۋ سياقتى جات ادەتتىڭ بەل الۋى باسىم.
بۇلاي دەۋىمىزگە, شۋ قالالىق مادەنيەت ءۇيىنىڭ ديرەكتورى ماراتحان ادەنوۆكە قاتىستى جاعىمسىز پىكىردىڭ شىعۋى سەبەپ بولىپ ەدى. قىزمەتكە كەلگەنىنە ءتورت اي ەندى بولعان باسشى قىزمەتكەرلەرىنە دورەكى مىنەز كورسەتىپ, بەيادەپ سوزدەر ايتادى ەكەن. ءتىپتى ءبىر كەلىنشەكتى ۇرىپ-سوققانى جايلى دا اقپارات تاراعان. باسشىلارىنىڭ مۇنداي مىنەزىنە شىداي الماعان مەكەمە ۇجىمى شۋ اۋدانىنىڭ اكىمى قايرات دوساەۆتىڭ اتىنا ارىز دا جازىپتى. مادەنيەت ءۇيىنىڭ مىنەزدى باسشىسىنىڭ بۇل ارەكەتىنىڭ انىق-قانىعىنا جەتۋ ماقساتىندا ءبىز شۋ اۋدانىنا ارنايى بارىپ, ءتيىستى ازاماتتارمەن جولىقتىق. اۋەلى شۋ قالالىق مادەنيەت ءۇيىنىڭ ديرەكتورى ماراتحان ادەنوۆتى ىزدەپ بارىپ, ورنىنان تابا المادىق. كورشى اۋىلعا كوكپار كورۋگە كەتكەن باسشى سول كۇنى تاپتىرمادى. ال الگى ديرەكتورعا تىكەلەي باسشىلىق جاسايتىن شۋ قالاسىنىڭ اكىمى باقىتجان تۇرعىنباەۆ باسشى مەن ۇجىمنىڭ اراسىندا مۇنداي اڭگىمەنىڭ بار ەكەنىن راستادى. اكىمنىڭ ايتۋىنشا, اۋدان بويىنشا قىزمەتتىك زەردەلەۋ ماقساتىندا كوميسسيا قۇرىلعان. ديرەكتوردىڭ ورنىندا قالۋ, قالماۋىن ون بەس كۇن ىشىندە سول كوميسسيا مۇشەلەرى شەشەدى. زاڭ بويىنشا ونى ورنىنان بىردەن الىپ تاستاي المايتىنىن ايتقان شۋ قالاسىنىڭ اكىمى ءوز سوزىندە مۇنداي ادامداردىڭ باسشىلىق قىزمەتتە وتىرۋعا لايىق ەمەس ەكەنىن ايتتى.
شۋ اۋدانى اكىمدىگىنىڭ اپپاراتىنان قالالىق مادەنيەت ءۇيىنىڭ ون ءتورت قىزمەتكەرى قول قويعان حاتتى الىپ, تانىسقانىمىزدا, ۇجىم اۋدان اكىمىنە ديرەكتوردىڭ قىزمەتكەرلەرىنە ادامي تۇرعىدان قاراماي, قوعامدىق قىزمەتكە جات, ورەسكەل قىلىقتار كورسەتىپ, مادەنيەت قىزمەتكەرلەرىمەن ساناسپاي بەيپىل اۋىز سوزدەر ايتىپ, وزىمشىلدىك كورسەتىپ وتىرعانىن ايتا كەلە, ونى ديرەكتورلىق قىزمەت ورنىنان بوساتۋىن سۇراپتى. ال ديرەكتوردان اۋىر سوزدەر ەستىگەنى بىلاي تۇرسىن, ءتىپتى تاياق جەگەن اينۇر سامبەكوۆامەن كەزدەسكەنىمىزدە دە, ول ماراتحان ادەنوۆتىڭ وزىنە جات قىلىق كورسەتكەنىن, ونىمەن قويماي قول كوتەرگەنىن راستادى.
وقيعا بىلاي بولىپتى. شۋ قالالىق مادەنيەت ءۇيىنىڭ ۇجىمى بيىلعى جىلى 22 اقپان كۇنى جۇمىس ۋاقىتىنان تىس كەزدە باسقوسۋ جاسايدى. ياعني, كەلمەسكە كەتكەن كەڭەس وكىمەتىنىڭ كەزىندەگى 23 اقپان مەرەكەسىن تويلايدى. «سول وتىرىستا ديرەكتور ماراتحان ادەنوۆ وتىرعانداردىڭ بارىنە «سەندەردى جۇمىستان شىعارىپ جىبەرەمىن» دەپ وزىنەن-ءوزى سوقتىعۋمەن بولدى. سول كەزدە مەن جاسىمنىڭ ۇلكەندىگىن سىيلايتىن شىعار دەگەن ويمەن ارىپتەستەرىمە ارا ءتۇسىپ ەدىم, مەنى ارت جاعىمنان كەلىپ قىلقىندىرىپ, ۇردى. مەن دە جۇرگەن بىرەۋ ەمەسپىن. 15 جىل بويى وسى مادەنيەت ءۇيى ديرەكتورىنىڭ ورىنباسارى بولىپ جۇمىس ىستەپ كەلەمىن. ەگەر مەنىڭ جۇمىسىم, بولماسا ءوزىم ناشار بولاتىن بولسام, مۇنىڭ الدىنداعى باسشىلار مەنى شىعارىپ جىبەرەتىن ەدى عوي. بۇل كىسى وسى ۋاقىتقا دەيىن مەكەمە قاراۋىلىن دا ۇرعان بولاتىن», دەيدى اينۇر سامبەكوۆا. الايدا, ا.سامبەكوۆا الەۋمەتتىك جەلىلەردە جازىلعانداي ءوزىنىڭ اۋرۋحاناعا جاتپاعانىن, اۋدان اكىمىنىڭ ورىنباسارى كلارا قوجاعاپپانوۆا, اۋداندىق مادەنيەت جانە تىلدەردى دامىتۋ ءبولىمىنىڭ باسشىسى اسەل جازىقباەۆا سياقتى باسشىلاردان ەشقانداي دا «قورقىتىپ-ۇركىتۋ» بولماعانىن ايتتى. كەرىسىنشە, شۋ قالالىق مادەنيەت ءۇيىنىڭ ۇجىمىنا اۋدان اكىمىنىڭ ورىنباسارى كلارا قوجاعاپپانوۆادان كەلگەن حاتتا «ارىزدا كورسەتىلگەن ءمان-جايلار, ياعني ديرەكتور م.ادەنوۆ تاعايىندالعاننان بەرى قىزمەتكەرلەرىنە دورەكى مىنەز كورسەتىپ, بەيادەپ سوزدەر ايتىپ ۇرىساتىندىعى, قوعامعا جات قىلىقتار كورسەتەدى دەلىنگەن ۋاجدەرى راستالدى», دەلىنگەن. سونىمەن قاتار ديرەكتوردىڭ ءوز قىزمەتكەرىنە قول كوتەرگەنى دە قازىرگى تاڭدا قۇقىق قورعاۋ ورگاندارىمەن تەكسەرىلۋ ۇستىندە ەكەن.
مادەنيەت ءۇيى ونەردىڭ باستاۋى ەكەنى انىق. ۇلت ونەرىنىڭ كيەسى قالىقتاعان وسىنداي شاڭىراقتىڭ باسشىسى بەيادەپ سوزدەر ايتىپ, قىزمەتكەرلەرىن ۇرۋعا دەيىن بارسا, نە بولماق. مادەنيەت مەكەمەسىن باسقارىپ وتىرعان باسشىنىڭ وزىنەن مادەنيەت كەتسە, قالعانى قايدا بارادى؟ كەلگەنىنە ءتورت اي بولعان جاڭا باسشىنىڭ ەندىگى ماسەلەسى اۋدان اكىمدىگىنىڭ مۇشەلەرىنەن قۇرىلعان كوميسسيانىڭ قاراۋىندا بەلگىلى بولادى.
حاميت ەسامان,
«Egemen Qazaqstan»
جامبىل وبلىسى