قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ءوز وكىلەتتىگىن توقتاتۋى ەڭ الدىمەن مەملەكەتىنىڭ كەلەشەگىنە, ساياسي تۇراقتىلىققا جانە بۇدان ءارى قارايعى قازاقستاننىڭ دامۋىنا باعىتتالعان قادام دەپ ويلايمىن. ن.نازارباەۆ كەلەشەكتە تۇركيانىڭ نەگىزىن قالاعان مۇستافا كەمال اتاتۇرىك, مالايزيانىڭ بۇرىنعى ءھام قازىرگى پرەمەر-ءمينيسترى ماحاتحير موحاماد سياقتى تاريحتا مارتەبەلى ورىنعا يە بولۋى عاجاپ ەمەس.
قازاقستان مەن قىرعىزستان ەڭ جاقىن, باۋىرلاس ەلدەر. سوندىقتان قازاقستاندا بولىپ جاتقان وقيعالار ءبىزدى دە بەيجاي قالدىرمايدى. ن.نازارباەۆ وسىناۋ قادامى ارقىلى ورتا ازيا مەملەكەتتەرىندە قالىپتاسقان ءداستۇردى بۇزىپ, تىڭنان تۇرەن سالدى, ءوز ىقتيارىمەن جانە تولىق ليگيتيمدى جولمەن جاڭا بۋىنعا بيلىكتى تابىستادى.
پرەزيدەنتتىڭ مىندەتىن اتقارۋشى رەتىندە جاۋاپكەرشىلىك جۇكتەپ وتىرعان قاسىم-جومارت توقاەۆ تا قىرعىزستان ءۇشىن بەلگىلى قايراتكەر, قازاق-قىرعىزدىڭ سالت-ساناسىن جاقسى بىلەتىن مەملەكەتشىل, كانىگى ديپلومات. ورتا ازيا ساياساتكەرلەرىنىڭ اراسىنان تۇڭعىش رەت ەۋروپادا جوعارى لاۋازىمدى قىزمەت اتقارىپ, بۇۇ-نىڭ ەۋروپاداعى قۇرىلىمدارىنىڭ جەتەكشىسى بولعان تۇلعا. ول بىرقاتار حالىقارالىق باستامالاردىڭ اۆتورى.
نۇرسۇلتان نازارباەۆ ەل باسقارىپ تۇرعان ساتتە قازاقستاننىڭ حالىقارالىق بەدەلى ارتا ءتۇستى. مەملەكەت بەدەلىنىڭ وسۋىنە سىرتقى ىستەر ءمينيسترى, پرەمەر-مينيستر, پارلامەنت سەناتىنىڭ توراعاسى رەتىندە قاسىم-جومارت توقاەۆتىڭ دا زور ەڭبەگى ءسىڭدى دەپ بىلەمىز. قازاقستانداعى ترانزيتتىك بيلىك الماسۋ, الدا بولاتىن سايلاۋ ءادىل ءارى اشىق باسەكەلەستىك نەگىزىندە, دەموكراتيالى تۇردە وتەدى دەپ سەنەمىز.
قانىبەك يماناليەۆ,
قىرعىز رەسپۋبليكاسى جوگوركۋ كەنەشىنىڭ دەپۋتاتى