قىرعىزستان پرەزيدەنتى سوورونباي جەەنبەكوۆ ەلباسى نۇرسۇلتان نازارباەۆتى ۇلتتىق قانا ەمەس, الەمدىك دەڭگەيدەگى تۇلعا ەكەنىن مالىمدەدى. بۇل تۋرالى قىرعىزستان پرەزيدەنتىنىڭ رەسمي سايتى حابارلادى.
«بۇگىن 19 ناۋرىزدا قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆپەن تەلەفون ارقىلى سويلەستى.
اڭگىمە بارىسىندا پرەزيدەنت سوورونباي جەەنبەكوۆ قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ قازاقستاننىڭ گۇلدەپ, وركەندەۋىنە سىڭىرگەن ەڭبەگىن ەرەكشە اتاپ ءوتتى» دەلىنگەن قىرعىزستان پرەزيدەنتىنىڭ رەسمي سايتىندا جاريالانعان مالىمدەمەدە.
سونداي-اق نۇرسۇلتان نازارباەۆتىڭ قازىرگى تاڭداعى كورنەكتى ساياسي جانە مەملەكەت قايراتكەرى, رەفورماتور ەكەنىن, وڭىردەگى ينتەگراتسيالىق ۇدەرىستىڭ قۇرۋشىسى, ۇلتتىق قانا ەمەس, الەمدىك دەڭگەيدەگى تۇلعا ەكەنىنە توقتالدى.
«نۇرسۇلتان نازارباەۆتىڭ قىرعىزستان مەن قازاقستان اراسىنداعى وداقتاستىقتى, ستراتەگيالىق ارىپتەستىكتى, دوستىق كورشىلەس قارىم-قاتىناستى نىعايتۋعا جانە وركەندەتۋگە قوسقان ۇلەسىن اتاپ كورسەتتى.
قىرعىزستان پرەزيدەنتى سوورونباي جەەنبەكوۆ نۇرسۇلتان نازارباەۆقا جاقسىلىق, ۇزاق ءومىر تىلەدى» دەلىنگەن مالىمدەمەدە.