وبلىستىق پوليتسيا دەپارتامەنتى جەكە قاۋىپسىزدىك باسقارماسىنىڭ قىزمەتكەرلەرى وبلىستىق مامانداندىرىلعان حالىققا قىزمەت كەرسەتۋ ورتالىعىنىڭ اۋماعىنان «كومەكشىلەردى» ۇستادى. ولار قوستاناي قالاسىنىڭ تۇرعىندارى. بۇل تۋرالى قوستاناي وبلىستىق پوليتسيا دەپارتامەنتى جەكە قاۋىپسىزدىك باسقارماسىنىڭ باستىعى التىنبەك شۇيىنشاليەۆ ايتتى. «كومەكشىلەر» نەمەسە «جۇگەرمەكتەر» ماشينا يەلەرىنىڭ ماسەلەلەرىن اقشاعا ورىنداپ بەرەدى.
«قوستاناي قالاسىنداعى مامانداندىرىلعان حالىققا قىزمەت كورسەتۋ ورتالىعىنىڭ اۋماعىندا ەكى ازامات قالا تۇرعىندارىن كۇتىپ الىپ, ولارعا اۆتوكولىگىن قايتا تىركەتكەندە «جاقسى» نومەر الىپ بەرۋ ءۇشىن 35 مىڭ تەڭگە سۇراعان. بۇل فاكت بويىنشا جەكە قاۋىپسىزدىك باسقارماسىندا قر قك 2-بابىنىڭ 2-ءبولىمى بويىنشا (توپ ادامداردىڭ الدىن الا كەلىسىپ جاساعان الاياقتىق ارەكەتى) قىلمىستىق ءىس قوزعالدى. كۇدىكتىلەر قىلمىسىن مويىنداپ, ىستەگەن ىسىنە وكىنىش ءبىلدىردى» دەدى پوليتسيا پودپولكوۆنيگى التىنبەك شۇيىنشاليەۆ.
باسقارما باسشىسىنىڭ ايتۋىنشا, مۇنداي الاياقتىق جاعدايلاردان قىزمەتتى تسيفرلاندىرۋ مەن اۆتوماتتاندىرۋ عانا قۇتقارادى. ىشكى ىستەر ءمينيسترى ەرلان تۇرعىمباەۆتىڭ تاپسىرماسىمەن بۇل جۇمىستار جالعاسىپ جاتىر. مامانداندىرىلعان حالىققا قىزمەت ەتۋ ورتالىعىندا ازاماتتاردىڭ جۇمىسى 20-30 مينۋتتا ورىندالادى. وتكەن جىلدان بەرى كۋالىگىن اۋىستىرۋدى جانە ماشيناسىن قايتا تىركەتۋدى ەلەكتروندىق ۇكىمەت پورتالىنداعى «ونلاين» رەجيمدە ۇيدە وتىرىپ-اق جاساۋعا بولادى.
«سوندىقتان تسيفرلاندىرۋ الاياقتىقپەن كۇرەسۋدىڭ ەڭ ءتيىمدى ءتاسىلى. ازاماتتارعا تەگىن قىزمەت ءۇشىن اراداعى دەلدالدارعا اقى تولەمەۋ كەرەك ەكەنىن ايتۋداي ايتىپ كەلەمىز» دەيدى التىنبەك شۇيىنشاليەۆ.
جىل باسىنان بەرى قوستانايدا كولىك جۇرگىزۋ كۋالىگىن 168 ادام ەلەكتروندىق ۇكىمەت پورتالى ارقىلى العان. 2018 جىلى مامانداندىرىلعان حالىققا قىزمەت كورسەتۋ ورتالىعىندا 34029 كۋالىك بەرىلگەن, 73161 قىزمەت كورسەتىلگەن.
ءنازيرا جارىمبەت,
«ەگەمەن قازاقستان»
قوستاناي